ព័ត៌មានជាតិ

សហជីពនៅកម្ពុជាថា ការដំឡើងពន្ធអាមេរិក នឹងមិននាំដល់ការរើរោងចក្រ ធ្វើឱ្យពលរដ្ឋខ្មែរបាត់បង់ការងារទេ

បានផុស

១ year មុន

នៅ

ថ្ងៃសុក្រ ៤ មេសា ២០២៥

ដោយ

សហជីពនៅកម្ពុជាថា ការដំឡើងពន្ធរបស់អាមេរិកមកលើកម្ពុជានឹងមិនធ្វើឱ្យពលរដ្ឋកម្ពុជាបាត់បង់ការងារធ្វើនោះទេ ហើយវាស្ថិតនៅក្រោមការគ្រប់គ្រងរបស់រាជរដ្ឋាភិបាលកម្ពុជា។

លោក គង់ អាទិត្យ ប្រធានសហភាពការងារកម្ពុជា បានលើកឡើងថា បើទោះជាអាមេរិកដំឡើងពន្ធដល់កម្ពុជាក៏ដោយ ក៏ការនាំចេញទៅអាមេរិក គឺយើងនៅតែចំណេញក្នុងកម្រិតខ្ពស់ ព្រោះការផលិតនៅកម្ពុជាមានតម្លៃធូរថ្លៃ។

ប្រធានសហភាពរូបនេះបានបន្តថា ការដាក់ពន្ធរបស់អាមេរិកក៏អាចជាឱកាសសម្រាប់អ្នកវិនិយោគិនក្នុងការពង្រីកវិសាលភាពទីផ្សាររបស់ខ្លួនផងដែរ “ការដាក់ពន្ធរបស់អាមេរិកមកកម្ពុជាគឺផ្តល់ឱកាសពីរសម្រាប់កម្ពុជា ឱកាសទីមួយសម្រាប់កម្ពុជា គឺជួនកាលការចរចារពន្ធជាមួយអាមេរិកអាចធ្វើឱ្យការនាំចូលនាំចេញរវាងខ្មែរនិងអាមេរិកកើនឡើងជាងមុន ប្រសិនជាមានការចរចាណាមួយអាចទទួលយកបាន ឯឱកាសមួយទៀតគឺក្រុមអ្នកវិនិយោគទាំងអស់នោះ ព្យាយាមរកទីផ្សារបន្ថែមនៅតាមបណ្តាប្រទេស ដើម្បីកុំឱ្យងាប់ក្រឡា។

ជាមួយគ្នានេះ លោក ហ្វា សាលី ប្រធានសម្ព័ន្ធសហជីពជាតិ បានថ្លែងថា បើទោះជាអាមេរិកដាក់ពន្ធមកលើកម្ពុជាក៏ដោយ ក៏មិនមានការរើរោងចក្រនោះទេ ព្រោះអាមេរិកមិនមែនដាក់សម្ពាធតែលើកម្ពុជានោះទេ គឺដាក់ទាំងបណ្តាប្រទេសនៅអឺរ៉ុប និងអាស៊ាន ហើយវាក៏មិនពាក់ព័ន្ធនឹងរឿងនយោបាយ សិទ្ធមនុស្ស ឬការដាក់សម្ពាធលើប្រទេសណាមួយនោះដែរ។

លោកបានបន្ថែមថា ការបញ្ជាទិញពីរោងចក្រផ្សេងៗក៏ត្រូវបានកំណត់រួចមកហើយដែរ សម្រាប់ពេលប៉ុន្មានឆ្នាំបន្ទាប់ “ទូទៅការបញ្ជាទិញគឺមានការចុះកិច្ចព្រមព្រៀង លើវិស័យកាត់ដេរ អាចមួយឆ្នាំម្តង ឬក្រុមហ៊ុនខ្លះចុះកុងត្រាពីរឆ្នាំម្តង វិស័យស្បែកជើងអាច ៣ឆ្នាំម្តង ដូច្នេះផងប៉ះពាល់យើងគឺតិចដែរ ទី១ ឆ្នាំ២០២៥នេះ ឬ២០២៦ មិនមានផលប៉ះពាល់ធ្ងន់ធ្ងរទេ វាអាចដល់ចុងឆ្នាំ២០២៦ ឬ ២០២៧ គឺវាអាចធ្វើឱ្យវិស័យមួយនេះរងផងប៉ះពាល់ ទន្ទឹមនឹងផងប៉ះពាល់ទាំងអស់នោះ យើងគិតថាពិភពលោកនឹងវិលត្រឡប់មកធម្មតាវិញ ឬមានការដំឡើងពន្ធតិចតួចប៉ុណ្ណោះ ដែលអាចឱ្យប្រទេសជាតិនីមួយៗអាចរស់បាន”។

ទោះបីជាយ៉ាងណា ប្រធានសហជីពទាំងពីររូបបានអំពាវនាវឱ្យប្រជាជនខ្មែរ និងបងប្អូនកម្មករនិយោជិតទាំងអស់ត្រូវរក្សាភាពស្ងៀមស្ងាត់ ហើយបំពេញតួនាទីការងារ ភារកិច្ចរបស់ខ្លួន ព្រោះកម្ពុជានៅតែមានភាពលេចធ្លោ និងមានភាពទាក់ទាញជាងប្រទេសដែលជាដៃគូប្រកួតប្រជែង។

បើយោងតាម លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថាការដាក់ពន្ធរបស់អាមេរិកមកលើកម្ពុជាគឺកម្ពុជានៅតែអាចគ្រប់គ្រងបាន ហើយវាមិនប៉ះពាល់ ១០០% ដល់វិស័យនាំចេញរបស់យើងទេ។ បន្ថែមពីនេះ គឺក្នុងរយៈពេល ៥ ឆ្នាំចុងក្រោយនេះ គឺកម្ពុជាបាននាំចេញទៅអឺរ៉ុបច្រើនជាងអាមេរិក។

យ៉ាងណាក៏ដោយ លោកបានគូសបញ្ជាក់ថា កម្ពុជានឹងបន្តធ្វើការជាមួយអាមរិក និងបង្កើតឱ្យមានបរិយាកាសវិនិយោគកាន់តែប្រសើរថែមទៀត ដើម្បីរក្សាឧត្តមភាពផលិតកម្មរបស់យើង៕