ធនាគារជាតិ រៀបចំពិធីសូត្រមន្តចម្រើនព្រះបរិត្ត ប្រោះព្រំលើករាសី សុំសិរីសួស្តី ក្នុងឱកាសចូលឆ្នាំថ្មីប្រពៃណីជាតិខ្មែរ

លោកស្រីបណ្ឌិត ជាសិរី ទេសាភិបាលនៃធនាគារជាតិនៃកម្ពុជា និងថ្នាក់ដឹកនាំជាន់ខ្ពស់ ព្រមទាំងមន្ត្រីបុគ្គលិកទាំងអស់នៅព្រឹកថ្ងៃទី៦ ខែមេសា ឆ្នាំ២០២៥ បានរៀបចំពិធីសូត្រមន្តចម្រើនព្រះបរិត្តពុទ្ធជ័យមង្គល និងរាប់បាត្រព្រះសង្ឃចំនួន ១២០អង្គ នៅធនាគារជាតិនៃកម្ពុជាអគារសែនសុខ ដើម្បីអបអរសាទរបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ សប្ដស័ក ព.ស. ២៥៦៩ តាមគន្លងប្រពៃណីព្រះពុទ្ធសាសនា ដែលនឹងឈានចូលមកដល់ឆាប់ៗខាងមុខនេះ។

ពិធីសូត្រមន្តប្រោះព្រំលើករាសី នៅពេលនេះបានប្រារព្ធធ្វើឡើងតាម ទំនៀមទម្លាប់ប្រពៃណីព្រះពុទ្ធសាសនា ដោយមានរៀបចំបូជាទៀនធូប ផ្កាភ្ញីថ្វាយព្រះពុទ្ធបដិមា និងនមសក្កាព្រះរតនត្រៃ និមន្តព្រះសង្ឃចំរើនព្រះបរិត្ត ដើម្បីសុំសេចក្តីសុខ សិរីសួស្តី ក្នុងឱកាសចូលឆ្នាំថ្មី ប្រពៃណីជាតិខ្មែរ ជូនដល់ថ្នាក់ដឹកនាំបុគ្គលិកឱ្យទទួលបានសិរីសួស្តី ចៀសផុតពីគ្រោះចង្រៃ ជួបតែសេចក្តីចម្រើនរុងរឿង បំពេញភារកិច្ចទទួលបានជោគជ័យ។

ក្នុងពិធីដ៏សិរីមង្គលនេះ លោក ស្រីបណ្ឌិត ជាសិរី បានបួងសួងដល់ទេវតាឆ្នាំថ្មីដែលនឹងមកគ្រប់គ្រងភពផែនដីបន្ដពីទេវតាឆ្នាំចាស់ សូមប្រោះព្រំសព្វសាធុការពរជ័យ សិរីមង្គលបវរមហាប្រសើរ ជូនដល់ថ្នាក់ដឹកនាំ មន្ត្រី និងបុគ្គលិកទាំងអស់ក្រោមឱវាទនៃធនាគារជាតិនៃកម្ពុជា ឱ្យទទួលបានសុខភាពល្អ សេចក្ដីសុខចម្រើនរុងរឿង ជោគជ័យរាល់ការបំពេញភារកិច្ចនានាក្នុងឆ្នាំថ្មីនេះ។

ពិធីសាសនាដ៏ជ្រះថ្លានាពេលនេះ ជាការគោរពប្រតិបត្តិប្រពៃណីទំនៀមទំលាប់ជាតិ និងបង្ហាញពីភាពសុខសាន្ដរបស់ប្រជាពលរដ្ឋ ស្របពេលប្រទេសជាតិមានសុខសន្តិភាពពេញលេញ ក្រោមម្លប់នៃសន្ដិភាព ដែលរក្សាបាននូវខឿនសេដ្ឋកិច្ច វឌ្ឍនភាពសង្គមដ៏ល្អប្រសើរ និងការអភិវឌ្ឍលើគ្រប់វិស័យនៃប្រជាជាតិកម្ពុជាទាំងមូល៕

អត្ថបទ៖ សំអឿន