ព័ត៌មានជាតិ

ពលរដ្ឋសម្ដែងក្ដីរីករាយសាទរជាខ្លាំងចំពោះសមិទ្ធផលស្ពានអាកាសមរតកតេជោ ដែលបានផ្ដល់អត្ថប្រយោជន៍ច្រើន

បានផុស

១ year មុន

នៅ

ថ្ងៃចន្ទ ៧ មេសា ២០២៥

ដោយ

ប្រជាពលរដ្ឋសាទរជាខ្លាំងចំពោះសមិទ្ធផលថ្មី ស្ពានអាកាសមរតកតេជោ ដែលនឹងដើរតួនាទីសំខាន់ក្នុងការផ្ដល់ប្រយោជន៍ច្រើន កាត់បន្ថយការកកស្ទះចរាចរណ៍ ចំណេញពេលវេលា ដល់ការធ្វើដំណើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋ យល់ឃើញថា ស្ពានអាកាសនេះបានជួយសម្រួលដល់ការធ្វើដំណើរទៅមករបស់ពួកគាត់បានលឿនរហ័ស មិនចំណាយពេល និងអាចបញ្ចៀសបានពីការកកស្ទះ ដែលតែងបានរំខាន និងប៉ះពាល់ដល់ពេលវេលាធ្វើដំណើរ។ ជាពិសេសស្ពានអាកាសមរតកតេជោ មានកម្ពស់ ២ ជាន់នេះ ជាស្ពានទី ១ ក្នុងព្រះរាជាណាចក្រកម្ពុជា។

បន្ថែមទៀតនោះ ពួកគាត់ បានថ្លែងអំណរគុណរាជរដ្ឋាភិបាល ចំពោះការបន្តគិតគូរយកចិត្តទុកដាក់ក្នុងការកសាងសមិទ្ធផលថ្មីៗ ជាច្រើន ជាបន្តបន្ទាប់ ជូនប្រជាពលរដ្ឋប្រើប្រាស់ ដែលស្ពានមរតកតេជោនេះ ក៏នឹងក្លាយជាកេរដំណែលសម្រាប់កូនចៅក្នុងពេលបច្ចុប្បន្ន និងតទៅអនាគតកាលផងដែរ។

គួររំលឹកថា ស្ពានអាកាស “មរតកតេជោ” គឺបានដំណើរការបើកការដ្ឋានសាងសង់កាលពីថ្ងៃទី ៣១ ខែសីហា ឆ្នាំ ២០២២ កន្លងទៅ ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតី តេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា។

គិតត្រឹមថ្ងៃទី ០៧ ខែមេសា ឆ្នាំ ២០២៥ នេះ ស្ពានអាកាសខាងលើ ត្រូវបានដាក់សម្ពោធឱ្យប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ស្ពានអាកាសនេះដែរ ត្រូវបានទទួលការសាងសង់ដោយក្រុមហ៊ុនវិនិយោគទុនអាណិកជនកម្ពុជា ( OCIC ) ដោយចំណាយថវិកាសាងសង់ជាង ៣៦ លានដុល្លារអាមេរិក៕

អត្ថបទ ៖ សុភា