នគរបាលចរាចរណ៍រាជធានី ចុះអប់រំពលរដ្ឋអ្នកធ្វើដំណើរឆ្លងកាត់ក្រោមស្ពានអាកាសមរតកតេជោ ចៀស​វាង​ជិះបញ្ច្រាសទិសដៅចរាចរណ៍

កម្លាំងនគរបាលការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ បានចុះអប់រំណែនាំទៅដល់ប្រជាពលរដ្ឋអ្នកធ្វើដំណើរ ដែលបានធ្វើដំណើរឆ្លងកាត់ក្រោមស្ពានអាកាសមរតកតេជោ ហើយបានបើកបរបញ្ច្រាសទិសដៅចរាចរណ៍ នៅចំណុចរង្វង់មូលខាងក្រោមស្ពាន។

ការចុះណែនាំអប់រំនេះ ធ្វើឡើងបន្ទាប់ពីជារឿយៗ តែងសង្កេតឃើញមានពលរដ្ឋអ្នកដំណើរមួយចំនួន តែងល្មើសទិសចរាចរណ៍ ដោយពេលធ្វើដំណើរដល់ចំណុចរង្វង់មូលក្រោមស្ពានអាកាសមរតកតេជោ ពួកគាត់ពុំបានធ្វើដំណើរស្របតាមទិសដៅចរាចរណ៍នៃរង្វង់មូលដែលច្បាប់បានកំណត់នោះទេ បែរជានាំគ្នាបត់បញ្ច្រាសផ្លូវ ដើម្បីធ្វើដំណើរសំដៅឡើងត្រលប់ទៅកាន់ស្ពានអាកាសក្បាលថ្នល់វិញ។

តាមការលើកឡើងពីមន្ត្រីនគរបាលចរាចរាណ៍ កត្តាទាំងនេះ គឺអាចប្រឈមឲ្យមានការកកស្ទះ ពិសេសការកើតមាននូវគ្រោះថ្នាក់ជាយថាហេតុណាមួយក៏ថាបាន។ ដូច្នោះហើយទើបនគរបាលរាជធានីភ្នំពេញ ចុះទៅអប់រំបញ្ច្រៀបការយល់ដឹងដល់អ្នកដែលល្មើស និងអំពាវនាវឲ្យពលរដ្ឋអ្នកដំណើរទាំងអស់ ចូលរួមគោរពច្បាប់ឲ្យបានខ្ជាប់ខ្ជួន។

សូមបញ្ជាក់ថា ស្ពានអាកាសមរតកតេជោ ជាស្ពានអាកាសថ្មីស្អាត និងមានច្រើនជាន់ជាងគេ នៅក្នុងរាជធានីភ្នំពេញ ។ ស្ពាននេះ ត្រូវបានកំណត់យ៉ាងច្បាស់ អំពីច្បាប់ចរាចរណ៍ ដោយនៅចំណុចក្រោមស្ពាន ចំណុចស្ពានផ្នែកខាងលើទាំងជាន់ទី១ និងទី២ សុទ្ធតែមានការបំពាក់នូវស្លាកសញ្ញាចរាចរណ៍ កំណត់ទាំងល្បឿន និងបង្ហាញពីទិសដៅសម្រាប់ការធ្វើដំណើរ អមជាមួយគំនូសសញ្ញាចរាចរណ៍ដែលបានគូសស្រាប់នៅលើស្ពាន ដែលអាចឲ្យពលរដ្ឋអ្នកដំណើរចូលរួមគោរពទៅតាមអ្វីដែលច្បាប់បានកំណត់៕

អត្ថបទ៖ សុភា