អ្នកធ្វើដំណើរឆ្លងកាត់ស្ពានអាកាសមរតកតេជោ សម្ដែងក្ដីរីករាយ និងថាងាយស្រួលធ្វើដំណើរ ចំណេញពេលវេលា

ប្រជាពលរដ្ឋអ្នកធ្វើដំណើរបានសម្តែងក្តីរីករាយ ក្រោយបានធ្វើដំណើរឆ្លងកាត់លើស្ពានអាកាស មរតកតេជោ បន្ទាប់ពីស្ពានអាកាសដំណាក់កាលទី២នេះ ត្រូវបានអនុញ្ញាតឱ្យប្រើប្រាស់បណ្តោះអាសន្នរួចមក និងថាចំណេញពេលវេលា ងាយស្រួលធ្វើដំណើរ មិនកកស្ទះដូចមុន។

ពួកគាត់បានបង្ហាញភាពរីករាយពេលបានប្រើប្រាស់សម្មទ្ធិផលថ្មីនេះ ដោយស្ពាននេះបានជួយសម្រួលដល់ការធ្វើដំណើរទៅមករបស់ពួកគាត់បានលឿនរហ័សមិនចំណាយពេល និងអាចបញ្ចៀសពីការកកស្ទះ ដែលតែងបានរំខាន និងប៉ះពាល់ដល់ពេលវេលាធ្វើដំណើររបស់ពលរដ្ឋ ។

ពួកគាត់បានថ្លែងអំណរគុណដល់រាជរដ្ឋាភិបាល ចំពោះការបន្តគិតគូរយកចិត្តទុកដាក់ក្នុងការកសាងសម្មទ្ធិផលថ្មីៗជាបន្តបន្ទាប់ជូនប្រជាពលរដ្ឋប្រើប្រាស់ ដែលស្ពាន មរតកតេជោនេះ ក៏នឹងក្លាយជាកេរ្តិ៍ដំណែលសម្រាប់កូនចៅក្នុងពេលបច្ចុប្បន្ន និងតទៅអនាគត់កាលផងដែរ។ ប្រជាពលរដ្ឋបានបន្តទៀតថា សូមអរគុណសន្តិភាព ប្រទេសមានសន្តិភាព ប្រទេសមានការអភិវឌ្ឍ គ្រប់វិស័យ។

សូមបញ្ជាក់ថា ស្ពានអាកាស មរតកតេជោ ដំណាក់កាលទី២នេះ បានដាក់ឱ្យដំណើរការប្រើប្រាស់ជាបណ្តោះអាសន្ន កាលពីថ្ងៃ២៥ ខែធ្នូ ឆ្នាំ២០២៤ កន្លងទៅ។ គួររំលឹកថា ស្ពានអាកាស “មរតកតេជោ” គឺបានដំណើរការបើកការដ្ឋានសាងសង់កាលពីថ្ងៃទី៣១ ខែសីហា ឆ្នាំ២០២២កន្លងទៅ ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតី តេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា។ ស្ពាននេះទទួលការសាងសង់ដោយក្រុមហ៊ុនវិនិយោគទុនអាណិកជនកម្ពុជា ( OCIC ) ដោយគ្រោងចំណាយថវិការសាងសង់ជាង ៣៦លានដុល្លារអាមេរិក ៕

អត្ថបទ៖ សុភា