​រដ្ឋបាលខេត្តក្រចេះ​​​ ស្នើ​​វិនិយោគិន​កូរ៉េបង្កើតរោងចក្រ​​កែច្នៃ​​ក្នុង​ខេត្ត​​​ ដើម្បី​ជំរុញការ​នាំចេញ

នៅក្នុងកិច្ចជំនួបពិភាក្សា​ការងារ​ជាមួយ​គណៈប្រតិភូនៃខេត្តដុងសាំងណាមដូ នៃសាធារណៈរដ្ឋកូរ៉េ ក្នុងពិធីប្រគល់ទទួលរថយន្តពន្លត់​អគ្គិភ័យ រថយន្តគិលានសង្គ្រោះចំនួន ១២ គ្រឿង និងឧបករណ៍ពន្លត់អគ្គិភ័យ កាលពីថ្ងៃទី ២២ ខែមេសា ឆ្នាំ​២០២៥ រដ្ឋបាលខេត្តក្រចេះដែល​ដឹកនាំដោយលោក ហឿ ស៊ីយ៉ែម ប្រធានក្រុមប្រឹក្សាខេត្តនិងលោក វ៉ា ថន អភិបាល​ខេត្តក្រចេះ បានលើក​ពីវិស័យសក្តានុពល​ក្នុង​ខេត្ត​ក្រចេះ ដោយស្នើ​ឲ្យ​វិនិយោគិន​កូរ៉េ​ពិចារណា​បោះ​ទុនវិនិយោគដើម្បី​ជំរុញ​ការ​នាំ​ចេញ​​។

នៅក្នុង​ជំនួបជាមួយ​ប្រតិភូ​​ខេត្តដុងសាំងណាមដូ នៃសាធារណៈរដ្ឋកូរ៉េ ថ្នាក់ដឹកនាំ​ខេត្តក្រចេះ​បានស្នើ​​ឲ្យ​វិនិយោគិន​កូរ៉េ​ពិចារណាក្នុងការ​បង្កើត​រោងចក្រកែច្នៃ​​​ក្នុង​នោះ​រួម​មាន​៖ វិស័យកសិកម្ម-កសិឧស្សាហកម្ម ការតំឡើងរោងចក្រកែច្នៃគ្រាប់ស្វាយចន្ទី កែច្នៃម្សៅដំឡូងមីសម្រេច រោងចក្រកែច្នៃជ័រកៅស៊ូ ខណៈ​ដែល​វិស័យរ៉ែ នៅក្នុងខេត្តក្រចេះវិញ​មាន​ថ្មអា ការ​តំឡើងរោងចក្រកិនថ្ម និងការវិនិយោគលើការផលិតអគ្គិសនីស្អាត ដោយផ្អែកលើសក្តានុពលរបស់ខេត្តក្រចេះ។

ជាការ​ឆ្លើយតប គណៈប្រតិភូនៃខេត្តដុងសាំងណាមដូនៃសាធារណៈរដ្ឋកូរ៉េ បានទទួលយកសំណើររបស់​រដ្ឋបាលខេត្តក្រចេះ ដើម្បីយកទៅពិចារណានិង​សិក្សា​បន្ថែម​ទៀត។

នៅក្នុងដំណើរ​ចុះមក​​ទស្សនកិច្ច​នៅក្នុង​ខេត្ត​ក្រចេះ ​គណៈប្រតិភូនៃខេត្តដុងសាំងណាមដូនៃសាធារណៈរដ្ឋកូរ៉េ​ក៏​បាន​ផ្តល់​រថយន្តពន្លត់​អគ្គិភ័យ រថយន្តគិលានសង្គ្រោះចំនួន ១២ គ្រឿង និងឧបករណ៍ពន្លត់អគ្គិភ័យ​ដល់​រដ្ឋបាលខេត្តក្រចេះ។

ជាមួយកា​រផ្តល់​ ​​រថយន្តពន្លត់​អគ្គិភ័យ រថយន្តគិលានសង្រ្គោះ រួមទាំង​ឧបករណ៍ពន្លត់អគ្គិភ័យ​ដល់​រដ្ឋបាលខេត្តក្រចេះគណៈប្រតិភូនៃខេត្តដុងសាំងណាមដូ​បានលើកឡើងថា ប្រទេសកូរ៉េចង់ជួយរដ្ឋបាលខេត្តក្រចេះឲ្យបានច្រើនតាមដែលអាចធ្វើទៅបាន ដើម្បីបង្កើនទំនាក់ទំនងមិត្តភាពប្រទេសកម្ពុជា និងប្រទេសកូរ៉េ កាន់តែស្អិតរមួតថែមទៀត៕

អត្ថបទ៖ ប្រុញ វិធិន