ព័ត៌មានជាតិ

ប្រធានាធិបតីទីម័រថាប្រទេសលោកមានកិត្តិយសបំផុតដែលសម្ដេចតេជោអញ្ជើញធ្វើទស្សនកិច្ច

បានផុស

១២ ខែ មុន

នៅ

ថ្ងៃព្រហស្បតិ៍ ៨ ឧសភា ២០២៥

ដោយ

ប្រធានាធិបតី ប្រទេសទីម័រឡេស្តេ លោក ចូហ្សេ រ៉ាមូស ហូតា បានជម្រាបសម្ដេចតេជោថាប្រជាជនលោកមានកិត្តយស និងមោទនភាពបំផុតដែលប្រធានព្រឹទ្ធសភា សម្ដេចតេជោ ហ៊ុន សែន អញ្ជើញធ្វើទស្សនកិច្ចនៅប្រទេសរបស់លោក។

ថ្លែងក្នុងវិមានប្រធានាធិបតីទីម័រឡេស្ដេក្នុងជំនួបស្វាគមន៍សម្ដេចតេជោ ហ៊ុន សែន ព្រឹកថ្ងៃទី៨ ឃែឧសភា ឆ្នាំ២០២៥នេះ លោក ចូហ្សេ រ៉ាមូស ហូតា បានលើកឡើងថាអ្វីដែលធ្វើឱ្យប្រជាជនប្រទេសលោកកិត្តយស និងមោទនភាពចំពោះដំណើរទស្សនកិច្ចសម្ដេចតេជោនោះគឺដោយសារតែសម្ដេចជាឥស្សរជនដែលមានឥទ្ធិពលបំផុតនៅក្នុងតំបន់អាស៊ីអាគ្នេយ៍ ជាពិសេសគឺការលះបង់របស់សម្ដេចតេជោក្នុងបុព្វហេតុជាតិមាតុភូមិ និងបានកសាងកម្ពុជាឱ្យរីកចម្រើនដល់ពេលបច្ចុប្បន្ន។

អ្នកនាំពាក្យព្រឹទ្ធសភាលោក ជា ធីរិទ្ធ បានឱ្យអ្នកសារព័ត៌មានដឹងថា៖ «ឯកឧត្តមបានហៅសម្ដេចតេជោថាគឺជាអ្នករំដោះកម្ពុជាចេញពីរបបប្រល័យពូជសាសន៍ និងជាស្ថាបនិកម្ពុជាក្នុងសម័យទំនើបដែលឯកឧត្តមប្រធានាធិបតីបានរំលេចនៅក្នុងឱកាសនោះ។ ដូច្នេះវាជាកិត្តិយសដែលរូបឯកឧត្តមផ្ទាល់ប្រជាជនទីម័រទទួលគារវកិច្ចចំពោះសម្ដេចតេជោក្នុងឱកាសនេះ»។

លោកប្រធានាធិបតីទីម័រក៏បានថ្លែងអំណរគុណម្ដងហើយម្ដងទៀតចំពោះការជួយជ្រោមជ្រែងរបស់កម្ពុជាដើម្បីឱ្យប្រទេសទីម័រក្លាយជាសមាជិកអាស៊ាន។

សម្ដេចតេជោ ហ៊ុន សែន បានធ្វើដំណើរទៅដល់ប្រទេសទីម័រឡេស្ដេកាលពីថ្ងៃទី៧ ខែឧសភា ម្សិលមិញ ដោយមានការទទួលស្វាគមន៍ពីសំណាក់ប្រធានាធិបតីទីម័រផ្ទាល់តែម្ដងនៅប្រលានយន្តហោះ នីកូឡៅលូបាតូព្រមទាំងបានបើករថយន្តជូនសម្ដេចទៅកាន់កន្លែងដែលសម្ដេចស្នាក់នៅទៀតផង។ តាមផ្លូវមានផ្ទាំងរូបសម្ដេចតេជោធំៗ ហើយសិស្សានុសិស្ស ប្រជាពលរដ្ឋក៏ចេញអមតាមសងខាងផ្លូវស្វាគមន៍ចំពោះវត្តមានសម្ដេច។

ក្នុងជំនួបនៅព្រឹកនេះផងដែរសម្ដេចតេជោ ហ៊ុន សែន ថាសម្ដេចមានអារម្មណ៍រំភើបចំពោះការទទួលស្វាគមន៍នេះ។ សម្ដេចបានបញ្ជាក់ថាការទទួលគណៈប្រតិភូក្នុងទម្រង់អស្ចារ្យបែបនេះមិនអាចធ្វើបានឡើយប្រសិនជាទំនាក់ទំនងប្រទេសកម្ពុជា-ទីម័រមិនល្អប្រសើរនោះ។ សម្ដេចថាកម្ពុជានឹងពង្រឹងទំនាក់ទំនងជាមួយទីម័រឡេស្ដេបន្ថែមទៀត។

ដំណើរទស្សនកិច្ចនេះគឺជាលើកទី២ហើយរបស់សម្ដេចតេជោទៅកាន់ប្រទេសទីម័រឡេស្ដេបន្ទាប់ពីឆ្នាំ២០១៦។

គួរឱ្យដឹងផងដែរថាទំនាក់ទំនងកម្ពុជានិងប្រទេសទីម័រឡេស្ដេបានបង្កើតឡើងនៅឆ្នាំ២០០២ បន្ទាប់ពីប្រទេសនេះបានប្រកាសឯករាជ្យ។ ចាប់តាំងពីបង្កើតទំនាក់ទំនងកម្ពុជាតែងគាំទ្រជានិច្ចដល់ប្រទេសនេះជាពិសេសលើឆាកអន្តរជាតិ ហើយកម្ពុជាក៏ជាប្រទេសជំរុញខ្លាំងបំផុតមួយឱ្យទីម័រឡេស្ដេក្លាយជាសមាជិកអាស៊ានទៀតផង៕