សម្ដេចតេជោ អរគុណទីម័រឡេស្តេ ចំពោះការទទួលបដិសណ្ឋារកិច្ចដ៏អស្ចារ្យក្នុងកម្រិតដ៏ខ្ពស់បំផុត

សម្តេចតេជោ ហ៊ុន សែន ប្រធានព្រឹទ្ធសភា បានសម្តែងនូវសេចក្តីរីករាយ និងអរគុណទីម័រឡេស្តេ ចំពោះការទទួលបដិសណ្ឋារកិច្ចដ៏អស្ចារ្យ និងក្នុងកម្រិតដ៏ខ្ពស់បំផុតជូនចំពោះសម្ដេចតេជោ និងគណៈប្រតិភូ ដែលបង្ហាញអំពីចំណងមិត្តភាពដ៏រឹងមាំ ជាពិសេសទំនាក់ទំនងដ៏ស្និទ្ធស្នាលបំផុតរវាងថ្នាក់ដឹកនាំ នៃប្រទេសទាំងពីរ។ បដិសណ្ឋារកិច្ចដ៏អស្ចារ្យនេះ ដោយមានប្រជាជនទីម័រឡេស្តឈរអមដំណើរ កាន់រូបថតសម្តេច មានកងកម្លាំងការពារចាប់ពីថ្នាក់កំពូល និងមានបំពាក់គ្រឿងឥស្សរិយយស ជូនសម្តេចតេ ហ៊ុន សែន ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងទស្សនកិច្ចផ្លូវការររបស់សម្តេចតេជោ ហ៊ុន សែន ទៅកាន់សាធារណរដ្ឋប្រជាធិបតេយ្យទីម័រឡេស្តេ កាលពីថ្ងៃទី ០៨ ខែឧសភា ថ្នាក់ដឹកនាំទីម័រឡេស្កូ បានសម្តែងនូវការស្វាគមន៍យ៉ាងកក់ក្តៅបំផុត ចំពោះសម្តេចតេជោ និងគណៈប្រតិភូ និងបានសម្តែងការដឹងគុណចំពោះមិត្តភាពដ៏វិសេស។ ក្នុងដំណើរទស្សនកិច្ចនេះ សម្តេច មានជំនួបដាច់ដោយឡែកពីគ្នា ជាមួយឯកឧត្តម ចូហ្សេ រ៉ាមូស អរតា ប្រធានាធិបតី ឯកឧត្តម កៃ រ៉ាឡា សាណាណា ហ្គូសម៉ៅ នាយករដ្ឋមន្ត្រី និងលោកជំទាវ ម៉ារៀ ហ្វើណាន់ដា ឡៃ ប្រធានរដ្ឋសភា។

ថ្នាក់ដឹកនាំទីម័រឡេស្ត ក៏បានអរគុណសម្តេច ដែលបានរួមចំណែកឱ្យទីម័រឡេស្តអាចក្លាយជាអ្នកសង្កេតការណ៍របស់អាស៊ាន កាលពីឆ្នាំ២០២២ នៅពេលកម្ពុជាធ្វើជាប្រធានប្តូរវេនអាស៊ាន និងការបន្តខិតខំជួយជ្រោមជ្រែង ដើម្បីឱ្យទីម័រឡេស្តេបាន ចូលជាសមាជិកពេញសិទ្ធិរបស់អាស៊ាននាពេលខាងមុខ។

បន្ថែមពីនេះ ថ្នាក់ដឹកនាំទាំងពីរបានវាយតម្លៃខ្ពស់ចំពោះវឌ្ឍនភាពនៃទំនាក់ទំនង មិត្តភាព និងកិច្ចសហប្រតិបត្តិការដ៏ជិតស្និទ្ធ ចាប់តាំងពីពេលបង្កើតទំនាក់ទំនងការទូតនៃប្រទេសទាំង ពីរនៅឆ្នាំ២០០២។ សម្តេចតេជោ បានសម្តែងនូវការពេញចិត្តចំពោះទំនាក់ទំនងកម្ពុជា-ទីម័រឡេស្តេ នៅ ក្នុងក្របខ័ណ្ឌអន្តរជាតិ ទោះបីជាសេដ្ឋកិច្ចពាណិជ្ជកម្ម នៅមានកម្រិតតិចតួចនៅឡើយ។

ភាគីទាំងពីរ បានឯកភាពជំរុញទំនាក់ទំនងដែលល្អស្រាប់ឱ្យកាន់តែរីកចម្រើនមួយកម្រិតទៀត តាមរយៈការបន្តផ្លាស់ ប្តូរទស្សនកិច្ចគ្រប់កម្រិត ការលើកកម្ពស់ការទូតសភា និងការពង្រឹងកិច្ចសហប្រតិបត្តិការអន្តរសភា ការពង្រីកកិច្ចសហប្រតិបត្តិការលើវិស័យដែលមានសក្តានុពលជាច្រើន រួមមាន ពាណិជ្ជកម្ម, វិនិយោគ, រ៉ែ, ថាមពល, អប់រំ, ទេសចរណ៍, ការតភ្ជាប់ និងប្រៃសណីយ៍។ ឆ្លៀតក្នុងឱកាសនោះ សម្ដេចតេជោ បាន គូសរំលេចអំពីចំណុចខ្លាំង និងចំណុចខ្សោយរវាងប្រទេសទាំងសងខាង ដោយទីម័រឡេស្តេមានចំណុចខ្លាំងខាងសន្តិសុខថាមពល រីឯកម្ពុជាមានចំណុចខ្លាំងខាងសន្តិសុខស្បៀង ដែលភាគីទាំងពីរអាចជួយ បំពេញតម្រូវការឱ្យគ្នា។

សម្តេចតេជោ ហ៊ុន សែន បានស្នើថា រដ្ឋាភិបាលទាំងពីរគួរតែពង្រីកនូវកិច្ចសហការជាមួយគ្នា ដើម្បីបំពេញបន្ថែមឱ្យគ្នាទៅវិញទៅមក ដោយបង្ហាញក្តីសង្ឃឹមថា រដ្ឋាភិបាលទាំងពីរ ជាពិសេសនាយករដ្ឋមន្តី នៃប្រទេសទាំងពីរ អាចបន្តជួបគ្នាក្នុងកិច្ចប្រជុំអាស៊ាននាពេលឆាប់ៗខាងមុខ៕