ទោះបីថ្ងៃបុណ្យ ការធ្វើបច្ចុប្បន្នភាពបញ្ជីឈ្មោះបោះឆ្នោត នៅដំណើរការធម្មតា

ការធ្វើបច្ចុប្បន្នភាពទន្និន័យជីវមាត្រក្នុងបញ្ជីឈ្មោះបោះឆ្នោតនៅដំណើរការធម្មតានៅតាមមូលដ្ឋាន បើទោះបីថ្ងៃទី១៤ ខែឧសភា ឆ្នាំ២០២៥នេះ គឺជាថ្ងៃនៃព្រះរាជពិធីបុណ្យចម្រើនព្រះជន្មព្រះមហាក្សត្រ នៃព្រះរាជាណាចក្រកម្ពុជា និងជាថ្ងៃឈប់សម្រាកក៏ដោយ។

លោក អ៊ុម ហ៊ុយឈុនហេង ចៅសង្កាត់បឹងទំពន់ទី២ នៃរដ្ឋបាលខណ្ឌមានជ័យ បានឱ្យដឹងថា ការធ្វើបច្ចុប្បន្នភាព​ទន្និន័យជីវមាត្រក្នុងបញ្ជីឈ្មោះបោះឆ្នោត សម្រាប់ឆ្នាំ២០២៥នេះ គឺធ្វើឡើងពេញ២៦ថ្ងៃតែម្តង ដោយមិនគិតពីថ្ងៃសៅរិ៍ អាទិត្រ ឬថ្ងៃបុណ្យឈប់សម្រាកនោះឡើយ។ ជាក់ស្តែងនៅថ្ងៃនេះ គឺជាថ្ងៃនៃព្រះរាជពិធីបុណ្យចម្រើនព្រះជន្មព្រះមហាក្សត្រ ក៏ក្រុមការងារនៅបន្តបំពេញការងារ ខណៈពលរដ្ឋជាច្រើនក៏នៅតែបន្តមកទទួលការធ្វើបច្ចុប្បន្នភាពទន្និន័យរបស់ខ្លួនផងដែរ។

លោកចៅសង្កាត់បានបញ្ជាក់ថា ប្រជាពលរដ្ឋដែលមកបំពេញឯកសារ និងធ្វើបច្ចុប្បន្នភាពទន្និន័យជីវមាត្រក្នុងបញ្ជីឈ្មោះបោះឆ្នោត ត្រូវយកឯកសារ អត្ថសញ្ញាណបណ្ឌ ហើយអ្នកដែលមានកូនៗអាយុគ្រប់១៨ឆ្នាំក៏អាចមកចុះឈ្មោះបានផងដែរ។

ប្រជាពលរដ្ឋសាទរចំពោះ គ.ជ.ប ដែលបានរៀបចំការធ្វើបច្ចុប្បន្នភាព នៅថ្ងៃបុណ្យទាន និងថ្ងៃឈប់សម្រាក ពីព្រោះពលរដ្ឋម្នាក់ៗ សុទ្ធសឹងតែមានការមមាញឹកច្រើនលើការប្រកបរបររកស៊ីទទួលទាន ក៏ដូចជាការបំពេញកិច្ចការងារ។ ប្រជាពលរដ្ឋលើកឡើងបន្តថា ការធ្វើបច្ចុប្បន្នភាព ពិតជាមានសារៈសំខាន់ណាស់ ព្រោះពលរដ្ឋម្នាក់ពីមួយឆ្នាំទៅមួយឆ្នាំមានភាពប្រែប្រួលពីរូបរាងកាយ ដូច្នេះ រយៈពេល១០ឆ្នាំ គឺមានការប្រែប្រួលខ្លាំង ត្រូវមកធ្វើបច្ចុប្បន្នភាពភាព និងថតរូបឡើងវិញ។

ពលរដ្ឋបន្តថា នេះជាការបំពេញកាតព្វកិច្ចក្នុងនាមពលរដ្ឋល្អក្នុងសង្គមជាតិ ពិសេសដើម្បីច្បាស់ការណ៍អំពីទន្និន័យត្រឹមត្រូវរបស់ខ្លួន សម្រាប់ការចូលរួមបោះឆ្នោតនៅថ្ងៃខាងមុខ ទាំងបោះឆ្នោតក្រុមប្រឹក្សាឃុំសង្កាត់ និងបោះឆ្នោតជ្រើសតាំងតំណាងរាស្ត្រថ្នាក់ជាតិ។

សូមបញ្ជាក់ថា ការធ្វើបច្ចុប្បន្នភាពទន្និន័យជីវមាត្រក្នុងបញ្ជីរឈ្មោះបោះឆ្នោតឆ្នាំ២០២៥នេះ គឺធ្វើឡើងរយៈពេល២៦ថ្ងៃ គិតចាប់ពីថ្ងៃទី១ ដល់ថ្ងៃទី២៦ ខែឧសភា ឆ្នាំ២០២៥ខាងមុខ៕

អត្ថបទ៖ សុភា