កងទ័ពមួកខៀវកម្ពុជា២រូប បាត់បង់ជីវិតក្នុងបេសកកម្មនៅស៊ូដង់ខាងត្បូង

កងទ័ពមួកខៀវកម្ពុជា ចំនួន២រូប គឺ កញ្ញា ដួង ម៉ាហ្គាលី និង លោក ផាត មុន្នី បានបាត់បង់ជីវិតក្នុងអំឡុងពេលបេសកកម្មក្នុងទីក្រុង Malakal នៃកងអនុសេនាធំរាជអាវុធហត្ថ ប្រចាំនៅស៊ូដង់ខាងត្បូង។

រដ្ឋមន្ត្រីក្រសួងការពារជាតិកម្ពុជា លោក ទៀ សីហា តាមរយៈទំព័រ facebook ផ្លូវការ នៅថ្ងៃទី១៤ ខែឧសភា ឆ្នាំ២០២៥ សម្ដែងការសោកស្ដាយ ចូលរួមរំលែកទុក្ខ និងចាត់ទុកការបាត់កញ្ញា ដួង ម៉ាហ្គាលី និង លោក ផាត មុន្នី ថាគឺជាការបាត់បង់យោធិនដ៏ឆ្នើមពីររូប ដែលបានធ្វើពលិកម្ម ដើម្បីបុព្វហេតុជាតិមាតុភូមិកម្ពុជា ចូលរួមថែក្សាសន្តិភាព ក្រោមឆត្រអង្គការសហប្រជាតិ និងរួមសុខទុក្ខជាមួយប្រជាជនកម្ពុជារហូតដល់ថ្ងៃអវសាននៃជីវិត។ យ៉ាងណារដ្ឋមន្ត្រីក្រសួងការពារជាតិកម្ពុជានមិនបានបញ្ជាក់ពីមូលហេតុដែលនាំឱ្យកកងទ័ពទាំងពីររូបនេះបាត់បង់ជីវិតឡើយ។

ចាប់ពីឆ្នាំ២០០៦-បច្ចុប្បន្ន កម្ពុជាបានបន្តបញ្ជូនកងទ័ពមួកខៀវចំនួនជិត១ម៉ឺននាក់ ទៅបំពេញបេសកកម្មចំនួន១២ ក្នុងប្រទេសចំនួន១០ មានជាអាទិ៍៖ ស៊ូដង់ ស៊ូដង់ខាងត្បូង លីបង់ ឆាដ សាយប្រឺស ស៊ីរីម៉ាលី អាហ្រិ្វកកណ្តាល យេមែន និងកុងហ្គោ លើជំនាញបោសសំអាតមីន អាវុធហត្ថ ពេទ្យកម្រិត២ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មសំណង់ផ្តេក-បញ្ឈរ នាយទាហានសេនាធិការ និងសង្កេតការណ៍។

គិតត្រឹមខែកក្កដា ឆ្នាំ ២០២៤ លោក អាទល់ ខារ៉េ អគ្គលេខាធិការរងអង្គការសហប្រជាជាតិ ទទួលបន្ទុកផ្នែកគាំទ្រប្រតិបត្តិការរក្សាសន្តិភាព ឱ្យដឹងថាកងទ័ពមួកខៀវកម្ពុជាចំនួន១១រូប បានបាត់បង់ជីវិត ក្នុងបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ។ បើគេរាប់បញ្ចូល ការបាត់បង់ជីវិតរបស់កងទ័ពមួកខៀវចំនួន២រូបទៀត នាពេលនេះទៀត គឺមានន័យថាចំនួនកងទ័ពមួកខៀវកម្ពុជា ដែលបាត់បង់ជីវិតក្នុងបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ គឺកើនដល់១៣រូបហើយ។

អគ្គលេខាធិការរងអង្គការសហប្រជាជាតិ លោក អាទល់ ខារ៉េ ធ្លាប់បានសរសើរកងកម្លាំងមួកខៀវរបស់កម្ពុជាថា ជានាយទាហានប្រកបដោយភាពក្លាហាន មានវិន័យ វិជ្ជាជីវៈ និងការទទួលខុសត្រូវខ្ពស់ និងចូលរួមរំលែកទុក្ខរាល់ការបាត់បង់កងទ័ពកម្ពុជាក្នុងបេសកកម្មថែរក្សាសន្តិភាពនៅក្រោមឆ័ត្រអង្គការសហប្រជាជាតិ៕

ដោយ÷ង៉ិល ណារ៉ាត់