សម្តេចធិបតី៖ ឆ្នាំ ២០៣០ កប៉ាល់ប៉ាស៊ីហ្វិកផ្ទុកទំនិញលំដាប់ពិភពលោក អាចចូលចតនៅកម្ពុជា

នាយករដ្ឋមន្រ្តី សម្តេចធិបតី ហ៊ុន ម៉ាណែត មានប្រសាសន៍ថា កម្ពុជាកំពុងបន្តភ្ជាប់ហេដ្ឋារចនាសម្ព័ន្ធផ្លូវគោក ដែក និងផ្លូវទឹក ក្នុងនោះពង្រីកកំពង់ផែទឹកជ្រៅនៅខេត្តព្រះសីហនុ ហើយនៅឆ្នាំ ២០៣០ កប៉ាល់ប៉ាស៊ីហ្វិក ផ្ទុកទំនិញរាប់ម៉ឺនតោន អាចចូលចតនៅកម្ពុជាបានហើយ។

អញ្ជើញជាអធិបតី ក្នុងពិធីអបអរសាទរការទទួលបានក្រុមហ៊ុនវិនិយោគចំនួន២០០ និងសំណេះ​សំណាល តំបន់សេដ្ឋកិច្ចពិសេសក្រុងព្រះសីហនុ នៅថ្ងៃទី ២២ ខែឧសភានេះ សម្តេចធិបតី ហ៊ុន ម៉ាណែត មានប្រសាសន៍ថា  រដ្ឋាភិបាលបានរៀបចំផែនការមេ ជំរុញខេត្តជាប់សមុទ្រ ជាពិសេសខេត្តព្រះសីហនុ ហើយការពង្រីកកំពង់ផែ ធ្វើយ៉ាងណាឱ្យកប៉ាល់ជាច្រើនដឹកជញ្ជូនចូលកម្ពុជាតែម្តង កាត់បន្ថយថ្លៃដឹកជញ្ជូន។ សម្តេចថ្លែងថា៖« ផែយើងឥឡូវ ១១.៥០ ម៉ែត្រ យើងកំពុងស្តារ កប៉ាល់ចូលចតទីនេះបានតែ ៤៥ភាគរយទេ កប៉ាល់ប៉ាស៊ីហ្វិកមួយចំនួនត្រូវឈប់ នៅផែប្រទេសជិតខាងដើម្បីផ្ទេរទំនិញ ប្តូរ​កប៉ាល់» ។

សម្តេចបន្តទៀតថា៖««ឥឡូវបន្តិចម្តងៗ យើងនឹងឈានទៅដល់ដំណាក់កាលទី១នៃផែយើងនឹងងង្រីកដល់ ១៤ម៉ែត្រ កន្លះ និងអាចឱ្យកប៉ាល់ ៩៣ ភាគរយនៃកប៉ាលប៉ាស៊ីហ្វិកចូលចតនៅផែយើង ហើយនៅឆ្នាំ ២០៣០ យើងអាចមានកប៉ាល់ទូទាំងពិភពលោកចូលបាន ។ បានន័យថាឈប់ពឹងទៅចតកន្លែងណាទៀតហើយ គឺចូលចតត្រង់តែម្តង ហើយកាត់បន្ថយនូវការដឹកជញ្ជូន»។

សម្តេចធិបតី បញ្ជាក់ថា កំណើនសេដ្ឋកិច្ចក្នុងខេត្តព្រះសីហនុ ត្រូវបានរីកជាបន្តបន្ទាប់ ហើយការពង្រីកផែនេះ គឺជាការពង្រឹងខេត្តព្រះសីហនុ ដែលជាតំបន់សេដ្ឋកិច្ចមួយយ៉ាងសំខាន់ជាប៉ូលទី២ បន្ទាប់ពីភ្នំពេញ ដែលជាប៉ូលសេដ្ឋកិច្ចទី១។

បើតាមសម្តេចធិបតី នៅក្នុងខេត្តព្រះសីហនុ ចំនួនរោងចក្រសហគ្រាស បានកើនឡើងពី៦៩សហគ្រាស ជាមួយកម្មករនិយោជិតប្រមាណជាង១ម៉ឺននាក់ នៅឆ្នាំ២០០៨ រហូតដល់ ៣ ៨៣៣ សហគ្រាស ជាមួយកម្មករនិយោជិតខ្ទង់ ១១ម៉ឺននាក់ គិតត្រឹមខែមេសា ឆ្នាំ២០២៥នេះ ដោយទទួលបានប្រាក់ឈ្នួលសរុបប្រចាំឆ្នាំប្រមាណ ៣៥៩លានដុល្លារ៕