រដ្ឋបាលខេត្តមណ្ឌលគិរី អំពាវនាវដល់ សាធារណជនចូលរួមឧបត្ថម្ភគាំទ្រដល់កងទ័ពជួរមុខ ដើម្បីរួមចំណែកការពារជាតិមាតុភូមិ

រដ្ឋបាលខេត្តមណ្ឌលគិរី បានអំពាវនាវដល់ សាធារណជនឱ្យចូលរួមឧបត្ថម្ភគាំទ្រដល់កងទ័ពជួរមុខ ដើម្បីរួមចំណែកការពារជាតិមាតុភូមិ។ នេះបើតាមលិខិតអំពាវនាវរបស់ រដ្ឋបាលខេត្តមណ្ឌលគិរី ចុះថ្ងៃទី៣០ ខែឧសភា ឆ្នាំ២០២៥។

តាមរយៈលិខិតនេះ រដ្ឋបាលខេត្តមណ្ឌលគិរី បានបញ្ជាក់ថា ដើម្បីរួមចំណែកក្នុងកិច្ចការពារជាតិមាតុភូមិ និងក្នុងនាមជាអ្នកសមរភូមិក្រោយ ជួយឧបត្ថម្ភគាំទ្រដល់សមរភូមិមុខ សូមអំពាវនាវដល់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ម្ចាស់ក្រុមហ៊ុន សហគ្រាស ពាណិជ្ជករ សិប្បករ វិនិយោគិន សាធារណជន និងបងប្អូនប្រជាពលរដ្ឋក្នុងខេត្តមណ្ឌលគិរី ឱ្យចូលរួមគាំទ្រដល់កង ទ័ពជួរមុខទាំងស្មារតី និងឧបត្ថម្ភជាថវិកា ជាសម្ភារប្រើប្រាស់ផ្សេងៗ ដើម្បីបង្ហាញពីភាពរួបរួមគ្នាជាធ្លង់មួយ នៃខឿនការពារជាតិរបស់កម្ពុជា។

ជាមួយគ្នានេះ រដ្ឋបាលខេត្តមណ្ឌលគិរី ក៏បានអំពាវនាវដល់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ម្ចាស់ក្រុមហ៊ុន សហគ្រាស ពាណិជ្ជករ សិប្បករ វិនិយោគិន សាធារណជន និងបងប្អូនប្រជាពលរដ្ឋក្នុងខេត្តមណ្ឌលគិរី មេត្តាជឿជាក់លើការដឹកនាំ របស់រាជរដ្ឋាភិបាលកម្ពុជា និងស្ងប់ចិត្តលើបញ្ហាព្រំដែនរវាងកម្ពុជា និងថៃ ព្រមទាំងជឿជាក់លើការដោះ ស្រាយរវាងរាជរដ្ឋាភិបាលទាំងពីរ៕