អភិបាលខេត្តកំពង់ចាម ប្រគល់រថយន្តពន្លត់អគ្គីភ័យ ៣គ្រឿង ដល់ស្រុកចំនួន២ ដើម្បីជួយអន្តរាគមន៍បញ្ហានានាជូនពលរដ្ឋ​

អភិបាលខេត្តកំពង់ចាម លោក អ៊ុន ចាន់ដា បានអញ្ជើញប្រគល់ រថយន្តពន្លត់អគ្គីភ័យ ចំនួន៣គ្រឿង ជូនប៉ុស្តិ៍នគរបាលរដ្ឋបាល ក្នុងស្រុកកំពង់សៀម និងស្រុកកោះសូទិន នៃស្នងការដ្ឋាននគរបាលខេត្តកំពង់ចាម ដើម្បីជួយអន្តរាគមន៍បញ្ហានានាជូនប្រជាពលរដ្ឋ​។ ពិធីប្រគល់ និងទទួល​ រថយន្តពន្លត់អគ្គីភ័យនេះត្រូវបានធ្វើឡើងនាព្រឹកថ្ងៃទី២ ខែមិថុនា ឆ្នាំ២០២៥ នៅសាលាខេត្តកំពង់ចាម។

លោក អ៊ុន ចាន់ដា បានបញ្ជាក់ថា រថយន្តពន្លត់អគ្គីភ័យ ចំនួន ៣គ្រឿងនេះ ជាអំណោយរបស់លោក នេត សាវឿន ឧបនាយករដ្ឋមន្ត្រី ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម តាមរយៈលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងនោះ ២គ្រឿង ប្រគល់ជូនប៉ុស្តិ៍នគរបាលរដ្ឋបាលកោះរការ និងប៉ុស្តិ៍ រដ្ឋបាលកោះសំរោង នៃអធិការដ្ឋាននគរបាលស្រុកកំពង់សៀម និង ១គ្រឿងទៀត ប្រគល់ជូនប៉ុស្តិ៍ នគរបាលរដ្ឋបាលកោះសូទិន នៃអធិការដ្ឋាននគរបាលស្រុកកោះសូទិន​។

បើតាមលោក វរៈសេនីយ៍ឯក យ៉ន ឌីន នាយការិយាល័យនគរបាលបង្ការពន្លត់អគ្គីភ័យ និងសង្គ្រោះនៃស្នងការដ្ឋាននគរបាលខេត្តកំពង់ចាម បានឱ្យដឹងថា ខេត្តកំពង់ចាម មានរថយន្តពន្លត់ អគ្គីភ័យ សរុប ១៧គ្រឿង (រថយន្តស្ទូច ១គ្រឿង)។ ក្នុងនោះស្នងការដ្ឋាននគបាលខេត្ត មាន ៤គ្រឿង អធិការដ្ឋាននគរបាលស្រុកបាធាយ មាន ២គ្រឿង ស្រុកស្រីសន្ធរ មាន ២គ្រឿង ស្រុកព្រៃឈរ មាន ២គ្រឿង និងនៅតាមបណ្តាក្រុងស្រុកទាំង ៧ទៀត មានរថយន្តពន្លត់អគ្គីភ័យ ១គ្រឿងៗដូចគ្នា ដោយឡែកថ្ងៃនេះបានទទួលអំណោយរថយន្តពន្លត់អគ្គីភ័យ ចំនួន ៣គ្រឿងផងដែរ៕