ព័ត៌មានជាតិ

អភិបាលខេត្តកំពង់ចាម៖ ៦ខែក្រោយ ពលរដ្ឋនៅឃុំព្រែកដំបូក ស្រុកស្រីសន្ធរ នឹងទទួលបានទឹកស្អាតប្រើប្រាស់គ្រប់គ្រាន់

បានផុស

១១ ខែ មុន

នៅ

ថ្ងៃសៅរ៍ ៣១ ឧសភា ២០២៥

ដោយ

លោក អ៊ុន ចាន់ដា អភិបាលខេត្តកំពង់ចាម អះអាងថា រយៈពេល ៦ខែទៀត ប្រជាពលរដ្ឋរស់នៅឃុំព្រែកដំបូក ស្រុកស្រីសន្ធរ នឹងមានទឹកស្អាតប្រើប្រាស់គ្រប់គ្រាន់ ស្របតាមស្តង់ដាបច្ចេកទេស។ ខណៈក្រុមហ៊ុនផ្គត់ផ្គង់ទឹកស្អាតកំពុងមមាញឹកក្នុងការដំឡើងបណ្តាញប្រព័ន្ធផ្គត់ផ្គង់ទឹកស្អាតថ្មីបន្ថែម ដើម្បីឱ្យមានសម្ពាធទឹកខ្លាំងជាងមុន ដែលបច្ចុប្បន្នសម្រេចបានប្រមាណជា ៩ភូមិ/៩ភូមិស្មើនឹង ១០០% ហើយ នៅតែការងារជួសជុលបណ្តាញដែលមានបញ្ហា បន្ថែមបណ្តាញថ្មីតិចតួចតាមជាស្តែងតែប៉ុណ្ណោះ។ លោកបានថ្លែងបែបនេះ នាឱកាសអញ្ជើញដឹកនាំកិច្ចប្រជុំដោះស្រាយវិវាទដីធ្លី និងបញ្ហាផ្សេងៗ នៅសាលាស្រុកស្រីសន្ធរ កាលពីថ្ងៃទី៣០ ខែឧសភា ឆ្នាំ២០២៥ ។

ក្នុងឱកាសនោះ លោក អ៊ុន ចាន់ដា បានបញ្ជាក់ថា ដោយសារពេលកន្លងមកប្រជាពលរដ្ឋមានការត្អូញត្អែរពីផលលំបាកក្នុងការផ្គត់ផ្គងទឹកស្អាតនៅក្នុងឃុំព្រែកដំបូក ស្រុកស្រីសន្ធរ លោកក៏បានរាយការណ៍ទៅក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងក៏បានចាត់ឱ្យមន្ត្រីជំនាញ សហការជាមួយមន្ទីរឧស្សាហកម្មខេត្តកំពង់ចាមដែលមានតួនាទីគ្រប់គ្រងសេវាករទឹកស្អាត ឱ្យពិនិត្យមើលករណីខ្វះខាត់ទឹកស្អាតប្រើប្រាស់នៅក្នុងឃុំព្រែកដំបូក ក៏សង្កេតឃើញថាមានបញ្ហាបច្ចេកដែលនាំការផ្គត់ផ្គង់ទឹកមិនគ្រប់គ្រាន់។ ស្របពេលនោះក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ក៏បានណែនាំឱ្យសេវាករទឹកស្អាត រៀបចំបណ្ដាញចែកចាយផ្គត់ផ្គង់ទឹកថ្មីបន្ថែម ដែលបច្ចុប្បន្នសម្រេចបាន ៩ភូមិ /៩ ភូមិ ស្មើនឹង ១០០ % ហើយ នៅតែការងារជួសជុលបណ្តាញខូចខាតតែប៉ុណ្ណោះ។

លោកបន្តថា ទន្ទឹមនឹងនេះ សេវាករទឹកស្អាតកំពុងសិក្សាផ្លាស់ប្តូរប្រព័ន្ធបណ្តាញខែ្សភ្លើងប្រវែង ២ ៥០០ ម (រយ:ពេល ៦ ខែ ) និងសិក្សាពង្រីកអាងស្តុកទឹកស្អាតបន្ថែមទៀត ដើម្បីត្រៀមនៅពេលបន្ទុកប្រើប្រាស់ខ្លាំង ដោប្រើ (រយ:ពេល ៥ ខែ) បន្ទាប់មកជំរុញឱ្យប្រជាពលរដ្ឋនៅក្នុងភូមិអំពិលចំនួន ១៣២ខ្នងផ្ទះ/៣៨៧ ខ្នងផ្ទះស្មើនឹង ៣៤.១០% ងៀកមកប្រើប្រាស់ទឹកស្អាតវិញ។

លោកអភិបាល បានបញ្ជាក់បន្ថែមថា បច្ចុប្បន្ន នៅតាមភូមិមានខ្នងផ្ទះបានប្រើប្រាស់ទឹកស្អាតចាប់ពី ៧០% ឡើងទៅបើគិតនៅក្នុងឃុំព្រែកដំបូកទាំងមូលចំនួនខ្នងផ្ទះ(តំណ)ដែលបានប្រើប្រាស់ទឹកស្អាត ១,៨៦១%/២,៣៦៣ ខ្នងផ្ទះស្មើនឹង ៧៨.៧៥% ។ ដូច្នេះនៅសល់ ៥០២ ខ្នងផ្ទះ ស្មើនឹង ២១.២៤%ទៀតនៅប្រើប្រាស់ប្រភពទឹកទន្លេខ្ពប ទឹកអណ្តូង ទឹកស្រ: ទឹកព្រែក និងទឹកភ្លៀង ដោយមិនបានឆ្លងកាត់ប្រព័ន្ធប្រព្រឹត្តកម្មសម្អាតទឹក និងការត្រួតពិនិត្យគុណភាពទឹកឡើយ៕