គម្រោងសហគ្រិនស្ត្រីដែលផ្តួចផ្តើមដោយ​អាមេរិក ផ្តល់ឱកាសស្រ្តីកម្ពុជាពង្រីកអាជីវកម្ម

គម្រោងសហគ្រិនស្ត្រី ដែលមានឈ្មោះជាអង់គ្លេសថា Academy of Women Entrepreneur (AWE) គឺជាគំនិតផ្តួចផ្តើមមួយរបស់ក្រសួងការបរទេសសហរដ្ឋអាមេរិក ដែលមានបំណងផ្តល់អំណាចដល់ស្ត្រីដោយផ្តល់ជាមធ្យោបាយ និងធនធានចាំបាច់ សម្រាប់ចាប់ផ្តើម និងអភិវឌ្ឍអាជីវកម្មរបស់ពួកគេ។ កម្មវិធីនេះ រួមមានការបណ្តុះបណ្តាលក្នុងការគ្រប់គ្រងអាជីវកម្ម ការយល់ដឹងផ្នែកហិរញ្ញវត្ថុ និងភាពជាអ្នកដឹកនាំ ព្រមទាំងឱកាស​ក្នុងការទទួលបានការបណ្តុះបណ្តាល និងឱកាសក្នុងការបង្កើតបណ្តាញទំនាក់ទំនង។

កាលពីថ្ងៃទី​៣១ ខែឧសភា ឆ្នាំ ២០២៥ តាមរយៈគម្រោងសហគ្រិនស្ត្រី បានរៀបចំពិធីបិទបញ្ចប់វគ្គបណ្តុះបណ្តាលក្រុមទីមួយ ដល់ស្ត្រីជាម្ចាស់អាជីវកម្មចំនួន ៣០ នាក់ ដែលម្ចាស់អាជីវកម្មដ៏ក្លាហានទាំងនេះ បានទទួលការបណ្តុះបណ្តាល និងការគាំទ្រផ្នែកមូលនិធិ ដើម្បីបង្កើនអាជីវកម្មរបស់ពួកគេ និងរួមចំណែកដល់ការរីកចម្រើនសេដ្ឋកិច្ច តាំងពីកម្មវិធីនេះចាប់ផ្តើម​​​នៅខែកញ្ញា ឆ្នាំ ២០២៤។

ពិធីបិទបញ្ចប់វគ្គនេះ រៀបចំឡើងនៅទីតាំង Factory Phnom Penh ដើម្បីចូលរួមអបអរដល់អាជីវកម្មជាច្រើន រាប់តាំងពីសេវាផ្នែកបដិសណ្ឋារកិច្ច ដល់ផលិតកម្មស្បៀងអាហារ និងពាណិជ្ជកម្មតាមអេឡិចត្រូនិច។ អ្នកចូលរួម បានបង្ហាញពីរបៀបដែលពួកគេបានបង្កើតអតិថិជនថ្មី បង្កើតផែនការអាជីវកម្មប្រកបដោយចីរភាព និងកែលម្អផលិតផលរបស់ពួកគេ។ សហគ្រិនទាំង​នោះ ដែលមកពីភ្នំពេញ និងសៀមរាប បានចូលរួមប្រកួតបង្ហាញលើគំនិតអាជីវកម្ម ហើយមានបីនាក់ទទួលបានមូលនិធិដើម្បីពង្រីកអាជីវកម្មរបស់ពួកគេថែមទៀត។

កម្មវិធីនេះ ក៏មានការអញ្ជើញចូលរួមពី លោកស្រីភារធារី Bridgette Walker  នៃស្ថានទូតអាមេរិក ប្រចាំកម្ពុជា និងលោកស្រី ចម និម្មល រដ្ឋមន្រ្តីក្រសួងពាណិជ្ជកម្ម ដោយថ្នាក់ដឹកនាំស្រ្តីទាំងពីរ បានប្រគល់ពានរង្វាន់ ចំពោះការបង្ហាញគំនិតអាជីវកម្មដែលធ្វើឱ្យគេមានការចាប់អារម្មណ៍បំផុត។

លោកស្រីភារធារី Walker បានមានប្រសាសន៍ថា គម្រោង AWE បានបង្ហាញពីស្មារតីនវានុវត្តន៍ និងសហគ្រិនភាពបែបអាមេរិក។ តាមរយៈការបង្ហាញពីគុណតម្លៃទាំង​នេះ និងតាមរយៈការផ្តល់អំណាចដល់សហគ្រិនស្រ្តីនៅជុំវិញពិភពលោក កម្មវិធី AWE នេះ ជួយបង្កើនភាពជាដៃគូសាកលរឹងមាំ បង្កើនឱកាសសេដ្ឋកិច្ច និងលើកកម្ពស់ស្ថិរភាព។​ លោកស្រីបន្តថា៖«នៅពេលដែលស្ត្រីទទួលបានជោគជ័យ សហគមន៍នឹងរីកចម្រើន ហើយវានឹងធ្វើឱ្យសហរដ្ឋអាមេរិក ប្រទេសកម្ពុជា និងពិភពលោក មានសុវត្ថិភាព ភាពរឹងមាំ និងវិបុលភាពច្រើនជាងមុន»៕