ព័ត៌មានជាតិ

ផ្លូវថ្នល់ខ្វាត់ខ្វែងជាង ២០០ គីឡូម៉ែត្រ សាងសង់តភ្ជាប់ពីប្រាសាទតូចធំក្នុងរមណីយដ្ឋានអង្គរ

បានផុស

១១ ខែ មុន

នៅ

ថ្ងៃអង្គារ ៣ មិថុនា ២០២៥

ដោយ

រមណីយដ្ឋានអង្គរដែលគ្របដណ្ដប់លើផ្ទៃដីទំហំ ៤០១ គីឡូម៉ែត្រការ៉េ មានការសាងសង់ហេដ្ឋារចនាសម្ព័ន្ធផ្លូវថ្នល់ខ្វាត់ខ្វែង ដើម្បីសម្រួលលំហូរចរាចរណ៍ធ្វើដំណើរ និងការដើរទស្សនារបស់ភ្ញៀវទេសចរ។

លោក ឡុង កុសល អគ្គនាយករង និងមន្ត្រីអ្នកនាំពាក្យឲ្យអាជ្ញាធរជាតិអប្សរាបានគូសបញ្ជាក់ថា ការសាងសង់ផ្លូវតភ្ជាប់នៅក្នុងរមណីយដ្ឋានអង្គរ គឺជាអាទិភាពចម្បងមួយរបស់អាជ្ញាធរ។ បច្ចុប្បន្នអាចនិយាយបានថា ផ្លូវក្នុងរមណីយដ្ឋានអង្គរចង់ធ្វើដំណើរចេញពីកន្លែងណាទៅកន្លែងណាក៏ងាយស្រួល ដោយសារមានការស្ថាបនាតភ្ជាប់គ្នាយ៉ាងប្រទាក់ក្រឡា។

ការសាងសង់ផ្លូវតភ្ជាប់គ្នាតាមប្រាសាទតូចធំក្នុងរមណីយដ្ឋានអង្គរ ដើម្បីបង្កកុំឲ្យកកស្ទះនិងសំខាន់ដើម្បីជំរុញឲ្យការទស្សនារបស់ភ្ញៀវទៅបានគ្រប់កន្លែង។ យ៉ាងណាមិញ ការអភិវឌ្ឍត្រូវគិតគូរពីលទ្ធផល ទៅតាមជំហាន និងទៅតាមភាពជាក់ស្ដែង។ លោក ឡុង កុសល បន្ថែម។

បើតាមនាយកដ្ឋានគ្រប់គ្រងព្រៃឈើ ទឹក និងអភិវឌ្ឍហេដ្ឋារចនាសម្ព័ន្ធនៃអាជ្ញាធរជាតិអប្សរា ក្នុងរយៈពេល ៣០ ឆ្នាំនេះ អាជ្ញាធរជាតិអប្សរាបានអភិវឌ្ឍ និងស្ថាបនាហេដ្ឋារចនាសម្ព័ន្ធផ្លូវថ្នល់ក្នុងរមណីយដ្ឋានអង្គរបានប្រវែងសរុបប្រមាណ ២០៦ គីឡូម៉ែត្រ ក្នុងនោះផ្លូវបេតុងកៅស៊ូ (AC) និង DBST បានប្រវែង ៩៨ គីឡូម៉ែត្រ។ បន្ថែមពីនេះ ក៏បានសាងសង់ផ្លូវបេតុងបានប្រវែង ៣៣ គីឡូម៉ែត្រ ផ្លូវក្រួសក្រហមបានប្រវែង ៣៨ គីឡូម៉ែត្រ និងផ្លូវដីសបានប្រវែង ១៤ គីឡូម៉ែត្រ រួមទាំងផ្លូវជិះកង់បានប្រវែង ២៥ គីឡូម៉ែត្រ សរុបបណ្តាញហេដ្ឋារចនាសម្ព័ន្ធផ្លូវថ្នល់ដែលបានស្ថាបនាតភ្ជាប់នៅក្នុងរមណីយដ្ឋានអង្គរដែលគ្របដណ្តប់លើផ្ទៃដីទំហំ ៤០១ គីឡូម៉ែត្រការ៉េ បានប្រវែងសរុប ២០៦ គីឡូម៉ែត្រ៕