លោក ម៉ែន អេង៖ ក្នុងនាមជាយុវជន ត្រូវខិតខំសិក្សារៀនសូត្រជាប្រចាំដើម្បីទទួលបានចំណេះ និងជំនាញពិតប្រាកដ

លោក ម៉ែន អេង អភិបាលរងខេត្តស្វាយរៀង បានលើកឡើងថា ក្នុងនាមជាយុវជន ក្នុងនាមជាសិក្សានុសិស្ស និងប្រជាពលរដ្ឋក្នុងជំនាន់ក្រោយ ត្រូវខិតខំសិក្សារៀនសូត្រជាប្រចាំរៀនទាំងចំណេះដឹងទូទៅ បច្ចេកទេស ប្រវត្តិសាស្ត្រ ដើម្បីទទួលបានចំណេះ ចំណេះធ្វើ និងជំនាញពិតប្រាកដ ស្របតាមប្រសាសន៍ដ៏ខ្ពង់ខ្ពស់របស់ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា “រៀនឱ្យចប់ ឱ្យចេះ ឱ្យមានការងារធ្វើ”។

លោកបានលើកឡើងបែបនេះ ក្នុងវេទិកាផ្សព្វផ្សាយស្ដីពីសារៈសំខាន់នៃវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ និងការតម្រង់ទិសវិជ្ជាជីវៈ ដល់សិស្សានុសិស្សនៅវិទ្យាល័យស្វាយរៀង នៅព្រឹកថ្ងៃទី១០ ខែមិថុនា ឆ្នាំ២០២៥។

អភិបាលរងខេត្ត មានប្រសាសន៍ថា «ក្មួយៗដែលបានមកអង្គុយនៅទីដ៏ម្លប់ត្រជាក់នេះ គឺពិតជាមានសំណាងខ្លាំងណាស់ ក្រោមម្លប់នៃសុខសន្តិភាព ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី៧នៃរដ្ឋសភា»។

លោកបន្តថា «បុព្វបុរសខ្មែរបានបន្សល់ទុកនូវស្នាដៃជាច្រើនដើម្បីឱ្យកូនខ្មែរជំនាន់ក្រោយខិតខំកសាង និងថែរក្សាបន្ត ជាក់ស្ដែងថ្ងៃនេះប្អូនៗមានវត្តមាននៅទីនេះ គឺជាសមិទ្ធផលដ៏ធំធេងពុំអាចកាត់ថ្លៃបានរបស់ថ្នាក់ដឹកនាំ ដែលបានឃើញកូនក្មួយមានសមត្ថភាព សិក្សាស្វែងយល់រៀនសូត្រ ក្រេបជញ្ចក់យកចំណេះដឹង ចំណេះធ្វើ ពីលោកគ្រូ អ្នកគ្រូ ដែលបានបង្រៀនក្មួយៗ ដើម្បីជាស្ពាន និងជាសំណង់ទុកក្នុងការកសាងជីវិត ក្នុងការប្រកបមុខរបស់ចិញ្ចឹមជីវិតទៅថ្ងៃអនាគត»។

ក្នុងនោះដែរលោក ម៉ែន អេង ក៏បានរំលេចជូនទៅដល់សិស្សានុសិស្ស ដែលមានវត្តមាននៅក្នុងវេទិកាអំពីសម្បត្តិបេតិកភណ្ឌពិភពលោករបស់កម្ពុជា ទាំងរូបិយ និងអរូបិយ ដែលបានដាក់នៅអង្គការយូណេស្កូ និងវប្បធម៌ខ្មែរជាច្រើនទៀតដែលបានដាក់បញ្ចូលក្នុងសម្បត្តិបេតិកភណ្ឌពិភពលោកដែលជាការខិតខំប្រឹងប្រែងស្ថាបនា និងថែរក្សារបស់បុព្វបុរសខ្មែរយើងរហូតមកដល់សម័យបច្ចុប្បន្ន។ លោកថា ក្នុងនាមជាយុវជន ក្នុងនាមជាសិក្សានុសិស្ស និងប្រជាពលរដ្ឋក្នុងជំនាន់ក្រោយនេះ ត្រូវតែខិតខំថែរក្សាដើម្បីជាទំពាំងស្នងឬស្សី ក្នុងការបន្តវេនពីបុព្វបុរសខ្មែរយើង៕

ដោយ៖ភក្ដី