ព័ត៌មានជាតិ
តើការដំឡើងកម្រិតទំនាក់ទំនងកម្ពុជា-បារាំងជា«ដៃគូយុទ្ធសាស្ត្រ»ផ្ដល់ប្រយោជន៍អ្វីខ្លះដល់កម្ពុជា?
កម្ពុជានិងបារាំងបានរៀបចំផែនទីបង្ហាញផ្លូវដើម្បីឈានដល់ការលើកកម្រិតទំនាក់ទំនងប្រទេសទាំងពីរជាដៃគូយុទ្ធសាស្ត្រ នាពេលខាងមុន។ ការសម្រេចជំហានថ្មីនៃទំនាក់ទំនងកម្ពុជានិងប្រទេសមហាអំណាចមួយនេះកើតឡើងក្នុងពេលនាយករដ្ឋមន្ត្រីកម្ពុជា សម្ដចធិបតី ហ៊ុន ម៉ាណែត បានចេញទៅបំពេញការងារនិងជួបជាមួយប្រធានាធិបតីបារាំងលោក អេម៉ាញូអ៊ែល ម៉ាក្រុង នៅទីក្រុងនីស ប្រទេសបារាំងកាលពីថ្ងៃទី១០ ខែមិថុនា កន្លងទៅ។
តើការតម្លើងកម្រិតទំនាក់ទំនងជា «ដៃគូយុទ្ធសាស្ត្រ» នឹងផ្ដល់ប្រយោជន៍អ្វីខ្លះដល់កម្ពុជា?
«ការលើកកម្ពស់ភាពជាដៃគូយុទ្ធសាស្ត្រនេះគឺលើសពីចំណងការទូតធម្មតារវាងប្រទេសមួយនិងប្រទេសមួយ» នេះជាការលើកឡើងរបស់អ្នកតាមដានភូមិសាស្ត្រនយោបាយ លោកបណ្ឌិត ជ័យ តិច។
លោកបណ្ឌិតបានពន្យល់ថា កម្រិតទំនាក់ទំនងដៃគូយុទ្ធសាស្ត្រ គឺជាការបន្ស៊ីចូលគ្នានូវគោលនយោបាយ ការចែករំលែកធនធាន សម្របសម្រួលភូមិសាស្ត្រនយោបាយក្នុងតំបន់ និងបង្កើនកិច្ចសហប្រតិបត្តិការដែលមានភាពយូរអង្វែងទៅលើវិស័យសំខាន់រវាងប្រទេសនិងប្រទេសដែលមានដូចជា ពាណិជ្ជកម្ម ការពារជាតិ សន្ដិសុខ វប្បធម៌ និងទេសចរណ៍ជាដើម។
លោកយល់ថាការតម្លើងកម្រិតទំនាក់ទំនងជាដៃគូយុទ្ធសាស្រ្តជាមួយបារាំងនឹងផ្ដល់ប្រយោជន៍ជាច្រើនដល់កម្ពុជាជាពិសេសគឺបានតភ្ជាប់ពង្រឹងទំនាក់ទំនងកម្ពុជាកាន់តែខ្លាំងជាមួយនឹងសហភាពអឺរ៉ុប ព្រមទាំងរក្សាបាននូវតុល្យភាពនៃទំនាក់ទំនងការបរទេស និងភូមិសាស្ត្រនយោបាយ។
លោកបណ្ឌិត ជ័យ តិច៖ «ពិសេសនឹងជួយរួមចំណែកឱ្យកម្ពុជាអាចនឹងធ្វើពិពិធកម្មសេដ្ឋកិច្ចនិងពង្រឹងនូវពាណិជ្ជកម្មជាមួយហ្នឹងសហគមន៍អឺរ៉ុបដោយសារតែបារាំងគឺជាបងធំមួយនៅអឺរ៉ុប»។
អគ្គលេខាធិការរាជបណ្ឌិត្យសភាកម្ពុជា លោកបណ្ឌិត យង់ ពៅ យល់ថាជារឿងល្អដែលកម្ពុជានិងបារាំងព្រមព្រៀងគ្នាក្នុងការដំឡើងកម្រិតទំនាក់ទំនងនេះដែលបានបង្ហាញពីទំនាក់ទំនងដ៏រឹងមាំរវាងប្រទេសនិងប្រទេស។ លោកបន្ថែមថាគឺជារឿងត្រឹមត្រូវបំផុតដែលកម្ពុជានិងបារាំងអាចឈានដល់ការតម្លើងកម្រិតដៃគូរយុត្តិសាស្ត្រនេះ។
លោកថា៖ «ប្រទេសទាំងពីរនេះមានប្រវត្តិសាស្ត្រជាប់ពាក់ព័ន្ធគ្នារាប់រយឆ្នាំមកហើយពោលគឺចាប់ពីសម័យអាណានិគមបារាំងតាំងពីចុងសតវត្សទី១៩តរហូតមកជាង១០០ឆ្នាំ។ ការតម្លើងជាដៃគូយុទ្ធសាស្ត្រគឺជារឿងត្រឹមត្រូវបំផុតសម្រាប់ប្រវត្តិទំនាក់ទំនងក៏ដូចជាស្ថានការណ៍បច្ចុប្បន្ន»។
លោកបណ្ឌិត យង់ ពៅ បន្ថែមថាការតម្លើងកម្រិតដៃគូយុទ្ធសាស្ត្រនឹងជួយដល់នយោបាយការទូតកម្ពុជា ព្រមទាំងវិស័យផ្សេងទៀតដែលប្រទេសទាំងពីរអាចនឹងតម្លើងកម្រិតទំនាក់ទំនង។
លោកថា៖ «ចំណេញទី១គឺការទូតហ្នឹងហើយ! រូបភាពនយោបាយនិងការទូត និងចំណេញផ្សេងទៀតទៅលើវិស័យផ្សេងៗដែលយើងតម្លើងកម្រិតហ្នឹង។ [..] ហើយបើយើងផ្អែកលើសេដ្ឋកិច្ចពាណិជកម្មនោះមានន័យថាពេលដែលយើងដំឡើងកម្រិតទំនាក់ទំនងទៅការដោះដូរសេដ្ឋកិច្ចពាណិជ្ជកម្មនិងកាន់តែប្រសើរជាងមុន ជំរុញឱ្យមានការវិនិយោគទៅវិញទៅមកកាន់តែប្រសើរជាងមុន ជាពិសេសការវិនិយោគបារាំងមកកម្ពុជាជាដើម្បី និងការទទួលទិញទំនិញពីកម្ពុជា»។
លោកបណ្ឌិតបន្ថែមថាអ្វីដែលសំខាន់នៅពេលនេះគឺការរៀបចំផែនទីបង្ហាញផ្លូវក្នុងដៃគូយុទ្ធសាស្ត្រដែលជ្រើសរើសចំណុចអទិភាពណាខ្លះក្នុងការតម្លើងភាពជាដៃគូរនេះ។
កម្ពុជានិងបារាំងមានទំនាក់ទំនងប្រវត្តិសាស្ត្រយ៉ាងស៊ីជម្រៅតាំងពីសម័យអាណានិគមបារាំង (១៨៦៣-១៩៥៣)។ នៅខែឧសភា ឆ្នាំ១៩៧៥ បារាំងបានបិទស្ថានទូតរបស់ខ្លួនចេញពីកម្ពុជា ដោយសាររបបខ្មែរក្រហម និងចាប់បង្កើតទំនាក់ទំនងការទូតឡើងវិញក្នុងទស្សវត្សរ៍ឆ្នាំ១៩៩០ ប្រទេសបារាំងបានជួយដល់ការអភិវឌ្ឍន៍របស់ប្រទេសកម្ពុជា ជាពិសេសក្នុងវិស័យអប់រំ វប្បធម៌ និងអភិបាលកិច្ច។ បច្ចុប្បន្នបារាំងបានក្លាយជាដៃគូមួយដ៏សំខាន់របស់កម្ពុជាក្នុងចំណោមប្រទេសក្នុងសហភាពអឺរ៉ុបទាំងអស់៕
អត្ថបទដោយ ហ៊ុន សិរីវឌ្ឍន៍
-
ព័ត៌មានជាតិ២ ថ្ងៃ agoសមត្ថកិច្ចឃាត់ខ្លួនជនសង្ស័យជនជាតិថៃ២នាក់និងខ្មែរម្នាក់ ករណីជួញដូរសារធាតុញៀន
-
ព័ត៌មានជាតិ១ សប្តាហ៍ agoទេសចរគួរដឹងអ្វីខ្លះ ពេលទៅកម្សាន្តតំបន់អេកូទេសចរណ៍រ៉ាមសារសម្រស់កោះហានក្នុងខេត្តស្ទឹងត្រែង?
-
ព័ត៌មានអន្ដរជាតិ១ សប្តាហ៍ agoខេត្ត Kochi នៅជប៉ុនផ្តល់ប្រាក់ ១២៥ដុល្លារឲ្យអ្នកនៅលីវ ចំណាយលើការណាត់ចួបបង្កើតស្នេហា
-
ព័ត៌មានជាតិ៧ ថ្ងៃ agoតំណាងអយ្យការសម្រេចចោទប្រកាន់លោកផ្កាយបីនិងលោកផ្កាយពីរ រួមអ្នកពាក់ព័ន្ធ៤នាក់ផ្សេងទៀត
-
ព័ត៌មានអន្ដរជាតិ១ សប្តាហ៍ agoវិមានក្រឹមឡាំង៖ ពូទីន ត្រៀមជួបហ្សេលេនស្គី ទាល់តែមានការចុះហត្ថលេខាលើកិច្ចព្រមព្រៀងសន្តិភាព
-
ព័ត៌មានជាតិ១៦ ម៉ោង agoស្ថានទូតអូស្ត្រាលីប្រចាំកម្ពុជាឆ្លើយតបនឹងហេតុការណ៍ទាហានថៃផ្ទុះអាវុធកាលពីថ្ងៃទី២៩ ខែមេសា
-
ព័ត៌មានជាតិ២ ថ្ងៃ agoទាហានថៃបាញ់កាំភ្លើង៩គ្រាប់ មុខអនុព័ន្ធយោធាអាម៉េរិក ចិន រុស្ស៊ី ជប៉ុន ដែលចុះសង្កេតការណ៍នៅអូរស្មាច់
-
សន្តិសុខសង្គម៧ ថ្ងៃ agoតុលាការខេត្តកំពត បង្គាប់ឲ្យឃុំខ្លួនមន្ត្រីនគរបាលដែលគប់កែវស្រាលើអ្នកចាប់ទឹកកកដាក់ពន្ធនាគារ