ព័ត៌មានជាតិ

លួចសង់ផ្ទះក្បែរច្រាំងទន្លេទាំងយប់ រំពឹងទទួលបានលុយកាក់ខ្លះ មានអីឲ្យរុះរើជាបន្ទាន់

បានផុស

៥ years មុន

នៅ

ថ្ងៃពុធ ៣១ មីនា ២០២១

ដោយ

យោងតាមប្រភពពីលោក យ៉ិន វុធ ចៅសង្កាត់ច្បារអំពៅទី២បានឲ្យដឹងថា នៅវេលាម៉ោង៩យប់ថ្ងៃទី៣០ ខែមីនានេះ លោកបានទទួលព័ត៌មានពីប្រជាពលរដ្ឋថាមានប្រជាពលរដ្ឋមួយគ្រួសារបានលួចសង់ផ្ទះស្ថិតនៅដីច្រាំងទន្លេដែលជាដីរបស់រដ្ឋនិងជាតំបន់ហាមឃាត់។

លោកចៅសង្កាត់បានបន្តថា ទីតាំងដែលមានប្រជាពលរដ្ឋមួយគ្រួសារលបលួចសង់ផ្ទះស្នាក់នៅនោះ គឺស្ថិតនៅច្រាំងទន្លេបាសាក់ក្នុងភូមិដើមចាន់១ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។

លោកយ៉ិន វុធ បានបញ្ជាក់ថា កាលដែលប្រជាពលរដ្ឋមួយគ្រួសារមកលបលួចសង់ផ្ទះនេះ គឺពុំមានការឃុបឃិតពីអាជ្ញាធរភូមិ ក្រុម នោះទេដោយគាត់លបសាងសង់ដោយចិត្តឯងតែម្តង។

គួរបញ្ជាក់ថា កាលពីថ្ងៃទី២៤ ខែមីនានេះ លោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានចេញលិខិតជូនដំណឹងស្តីពីការចុះបោះបង្គោលកំណត់ព្រំដីច្រាំងទន្លេរួមទាំងស្ថាបនាផ្លូវចាក់ក្រាលបេតុងចាប់ពីគល់ស្ពានព្រះមុនីវង្សចាស់ក្នុងសង្កាត់ច្បារអំពៅទី២រហូតដល់តំបន់អភិវឌ្ឍន៍កោះនរា ស្ថិតក្នុងសង្កាត់និរោធខណ្ឌច្បារអំពៅ តែបែជាមានមនុស្សមកលួចសង់ផ្ទះទៅវិញ។ពួកគាត់នឹកស្មានថាពេលដែលអាជ្ញាធរចុះធ្វើច្រាំងទន្លេក្រែងមានដំណោះស្រាយជាថ្នូរនឹងលុយកាក់ឬដីធ្លីហើយមើលទៅបានជាខំណាស់៕

អត្ថបទ ៖ នរា