ព័ត៌មានជាតិ

ផ្លូវថ្មើរជើងចតុមុខ នឹងដាក់សម្ពោធឱ្យប្រើប្រាស់នាថ្ងៃទី ២១ មិថុនា ក្រោមអធិបតីភាព សម្តេចធិបតី ហ៊ុន ម៉ាណែត តែពលរដ្ឋអាចដើរកម្សាន្តបាន

បានផុស

១ year មុន

នៅ

ថ្ងៃអង្គារ ១៧ មិថុនា ២០២៥

ដោយ

ផ្លូវថ្មើរជើងចតុមុខ នឹងដាក់សម្ពោធឱ្យប្រើប្រាស់នាថ្ងៃទី ២១ មិថុនា ខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៅចំណុចមុខផ្សាររាត្រី តែប្រជាពលរដ្ឋដែលមានបំណងដើរលេងកម្សាន្តនៅផ្លូវថ្មើរជើងតាមបណ្តោយតីរវិថីព្រះស៊ីសុវត្ថិ អាចធ្វើដំណើរដើរកម្សាន្តបានជាធម្មតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្ដីជូនដំណឹងស្ដីពីការដាក់សម្ពោធឱ្យប្រើប្រាស់ជាផ្លូវការនូវផ្លូវថ្មើរជើង និងប្រសិទ្ធិនាមផ្លូវថ្មើរជើង ជា“ផ្លូវថ្មើរជើងចតុមុខ” នៅតាមបណ្ដោយតីរវិថីព្រះស៊ីសុវត្ថិ (ចាប់ពីផ្លូវលេខ ៩៤ រហូតដល់មុខព្រះបរមរាជវាំង) រដ្ឋបាលរាជធានីភ្នំពេញ សូមជម្រាបជូនដំណឹងដល់ប្រជាពលរដ្ឋទាំងអស់ ឱ្យបានជ្រាបថា រាជរដ្ឋាភិបាលកម្ពុជា បានអនុញ្ញាតឱ្យរដ្ឋបាលរាជធានីភ្នំពេញរៀបចំពិធីដាក់សម្ពោធឱ្យប្រើប្រាស់ជាផ្លូវការនូវផ្លូវថ្មើរជើង និងប្រសិទ្ធិនាមផ្លូវថ្មើរជើង ជា“ផ្លូវថ្មើរជើងចតុមុខ” នៅតាមបណ្តោយតីរវិថីព្រះស៊ីសុវត្ថិ (ចាប់ពីផ្លូវលេខ ៩៤ រហូតដល់មុខព្រះបរមរាជវាំង) ស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ដែលនឹងប្រព្រឹត្តទៅនៅមុខផ្សាររាត្រី នាថ្ងៃទី ២១ ខែមិថុនា ឆ្នាំ ២០២៥ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត។

ដើម្បីពិធីដាក់សម្ពោធឱ្យប្រើប្រាស់ជាផ្លូវការ និងប្រសិទ្ធិនាមផ្លូវថ្មើរជើងចតុមុខខាងលើប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ អាជ្ញាធរមានសមត្ថកិច្ច នឹងធ្វើការរៀបចំសម្រួលចរាចរណ៍ជាបណ្ដោះអាសន្ននៅតំបន់ជុំវិញទីតាំងប្រារព្ធពិធី និងតាមបណ្ដោយតីរវិថី ព្រះស៊ីសុវត្ថិ (ចាប់ពីផ្លូវលេខ ៩៤ រហូតដល់មុខព្រះបរមរាជវាំង) ដោយស្នើសុំប្រជាពលរដ្ឋទាំងអស់ដែលត្រូវធ្វើដំណើរឆ្លងកាត់តំបន់ជុំវិញទីតាំងខាងលើមេត្តាយោគយល់ អធ្យាស្រ័យ ដោយអនុគ្រោះ ចាប់ពីវេលាម៉ោង ១៤:០០ នាទី រហូតដល់បញ្ចប់កម្មវិធី។ ដោយឡែកចំពោះប្រជាពលរដ្ឋដែលមានបំណងដើរលេងកម្សាន្តនៅផ្លូវថ្មើរជើងតាមបណ្តោយតីរវិថីព្រះស៊ីសុវត្ថិ អាចធ្វើដំណើរដើរកម្សាន្តបានជាធម្មតា៕

អត្ថបទ ៖ ស្រីរ័ត្ន