ព័ត៌មានជាតិ

ក្រសួងការងារ នឹងចុះតាមភូមិផ្ដល់ព័ត៌មានការងារ និងជំនាញផ្សេងៗ ដល់ពលករខ្មែរទើបវិលត្រឡប់មកពីថៃ

បានផុស

១ year មុន

នៅ

ថ្ងៃអង្គារ ១ កក្កដា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ នឹងសហការជាមួយអាជ្ញាធរមូលដ្ឋាន ចុះតាមភូមិជួបជាមួយពលករខ្មែរដែលទើបវិលត្រឡប់មកពីប្រទេសថៃ ដើម្បីសាកសួរសុខទុក្ខ និងផ្តល់ព័ត៌មានទីផ្សារការងារ និងជំនាញផ្សេងៗ បន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសអញ្ជើញទទួលស្វាគមន៍ និងសួរសុខទុក្ខប្រជាពលរដ្ឋ ជាពិសេសពលករខ្មែរនៅច្រកព្រំដែនអន្តរជាតិដូង និងមណ្ឌលសំចតច្រកដូង ខេត្តបាត់ដំបង កាលពីថ្ងៃទី ៣០ មិថុនា លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា គម្រោងចុះតាមភូមិជួបជាមួយពលករខ្មែរនេះធ្វើឡើងតាមការណែនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីសាកសួរព័ត៌មានពលករដែលទើបវិលត្រឡប់ទៅស្រុកកំណើតតើពួកគាត់ចង់រៀនជំនាញបន្ថែម ឬចង់ស្វែងរកការងារធ្វើ ដើម្បីធានាថាពលករខ្មែរមិនមានបញ្ហាក្រោយវិលត្រឡប់មកពីប្រទេសថៃវិញ។

លោករដ្ឋមន្ត្រី បានបន្តថា «មានពលករខ្លះ ពេលឆ្លងកាត់ព្រំដែនពីប្រទេសថៃចូលមកដល់ព្រំដែនយើង ដោយសារគាត់នឹកស្រុកកំណើត សាច់ញាតិគាត់ គាត់មិនបានទទួលបានព័ត៌មានស្ដីពីឱកាសការងារ និងជំនាញផ្សេងៗ ពីភ្នាក់ងារយើងរង់ចាំផ្តល់ជូនតាមច្រកព្រំដែនទេ។ អីចឹងគាត់បានធ្វើដំណើរត្រឡប់ទៅស្រុកកំណើត។ ដូចនេះវាមានរយៈពេលជាង ១ សប្ដាហ៍ ហើយក្រសួងនឹងសហការជាមួយអាជ្ញាធរមូលដ្ឋាន ដើម្បីផ្តល់ព័ត៌មានពីឱកាសការងារ និងជំនាញផ្សេងៗ ជូនដល់ពួកគាត់នៅនឹងមូលដ្ឋានផ្ទាល់តែម្តង ដើម្បីឱ្យគាត់ជ្រើសរើសស្វែងរកការងារធ្វើ ឬត្រូវរៀនជំនាញបន្ថែម»។

បើតាមលោករដ្ឋមន្ត្រី គិតត្រឹមថ្ងៃទី ៨ ខែមិថុនា រហូតមកដល់ថ្ងៃទី ៣០ ខែមិថុនា ឆ្នាំ ២០២៥ នេះ មានពលករចូលមកកម្ពុជាតាមច្រកអន្តរជាតិនានា ប្រមាណជិត ៤ ម៉ឺននាក់ហើយ ច្រើនជាងគេរស់នៅខេត្តបាត់ដំបង បន្ទាយមានជ័យ ព្រៃវែង កំពង់ធំ និងសៀមរាប ក្នុងនោះមានអ្នកចុះស្វែងរកការងារធ្វើជាង ១ ម៉ឺននាក់។

លោករដ្ឋមន្ត្រី បានឱ្យដឹងថា ជាមធ្យម ក្នុង ១ អាទិត្យ កម្ពុជា មានតម្រូវការការងារ ២៥ ម៉ឺនកន្លែង ក្នុងនោះ មាន ២១ ម៉ឺនកន្លែង ការងារក្នុងរោងចក្រដូចជា កាត់ដេរ ស្បែកជើង កាបូប គ្រឿងសង្ហារិម និងអេឡិចត្រូនិក។

លោករដ្ឋមន្ត្រី បានបន្តទៀតថា ពលករខ្មែរដែលវិលត្រឡប់មកស្រុកកំណើតវិញនេះ ដោយសារតែទទួលការទូទាត់ប្រាក់ខែមិនទៀងទាត់ ហើយការងារមិនលើសនៅកម្ពុជា ថៃរឹតបន្តឹងការចុះធ្វើអធិការកិច្ចនៅតាមកន្លែងធ្វើការមួយចំនួន មានការរើសអើង និងមើលងាយប៉ះពាល់ដល់កិត្តិយស ក៏ដូចជាប្រទេសជាតិ និងការព្រួយបារម្ភពីសន្តិសុខ ពិសេសពួកគាត់បានដឹងថា នៅស្រុកកំណើតសម្បូរការងារច្រើន និងទទួលបានការគាំពារសង្គម និងអត្ថប្រយោជន៍ជាច្រើន៕

អត្ថបទ ៖ សំអឿន