គម្រោង​ស្ថាបនាផ្លូវជាតិលេខ៧ជាបួនគន្លង​ ស្គន់-កំពង់ចាម​ ពេលនេះសម្រេចបានជាង៦០%ហេីយ

អាជ្ញាធរខេត្តកំពង់ចាម ណែនាំឱ្យក្រុមហ៊ុនម៉ៅការពន្លឿនអ៊ុតកៅស៊ូ លើផ្លូវជាតិលេខ៧ បង្ហើយ ៦គីឡូម៉ែត្រ ដើម្បីសម្រួលដល់ការធ្វេីដំណេីររបស់ប្រជាពលរដ្ឋ​ ខណៈ​បច្ចុប្បន្ន​បានសម្រេចជាង៦០%ហេីយ។ 

លោក​ អ៊ុន​ ចាន់ដា​ អភិបាលខេត្តកំពង់ចាម និង​ ​លោក ភី សុភាត់ អនុរដ្ឋលេខាធិការ​ ក្រសួងសាធារណការ​ និងដឹកជញ្ជូន​ តំណាង​ ឯកឧត្តម លឹម សុីដេនីន​ រដ្ឋលេខាធិការក្រសួងសាធារណការ​ និងដឹកជញ្ជូន​និងជានាយកគ្រប់គ្រងគម្រោងស្ថាបនាផ្លូវជាតិលេខ៧នៅថ្ងៃទី២ ខែកក្កដា ឆ្នាំ២០២៥នេះ បានអញ្ជើញដឹកនាំក្រុមការងារមន្ត្រីជំនាញពាក់ព័ន្ធ ចុះពិនិត្យ​វឌ្ឍនា​ភាពគុណភាពការងារស្ថាបនាផ្លូវ​ជាតិលេខ៧​ពីពីរគន្លងទៅបួនគន្លង​ ពីរង្វង់មូល​ស្គន់​ ស្រុកជេីងព្រៃ​ ទៅគល់ស្ពានគីហ្សូណា​ ក្រុងកំពង់ចាម​ ខណៈ​បច្ចុប្បន្ន​សម្រេចបានជាង៦០%ហេីយ។ 

ឆ្លៀតឱកាសនោះដែរ​ លោក អ៊ុន ចាន់ដា អភិបាលខេត្តកំពង់ចាម បានធ្វេីការស្នេីឱ្យក្រុមហ៊ុនជួយសម្របសម្រួលការអ៊ុតកៅស៊ូដែល នៅសល់ប្រវែង៦ គីឡូម៉ែត្រទៀត នៅក្នុងភូមិសាស្ត្រស្រុកព្រៃឈរ និងស្រុកកំពង់សៀម​ ដើម្បីជួយសម្រួលដល់ការធ្វេីដំណេីររបស់ប្រជាពលរដ្ឋប្រចាំថ្ងៃផង។ នឹងដោយឡែក​ លោក​អភិបាលខេត្ត​ ធ្វេីការជំរុញបន្ថែមដល់ក្រុមហ៊ុន​ និងអាជ្ញាធរ​មូលដ្ឋានសហការជាមួយដោះស្រាយនូវផលប៉ះពាល់មួយចំនួន​ដែលនៅសេសសល់ឱ្យរួចរាល់និងចូលរួមពង្រឹងបន្ថែមលើសុវត្ថិភាពសណ្ដាប់ធ្នាប់ និងរៀបចំសោភណ្ឌភាពតាមដងផ្លូវឱ្យបានស្រស់ស្អាតផងដែរ។

ទន្ទឹមនឹងនេះដែរ​ ក្រុមហ៊ុនធ្វើការកែសម្រួលឡើងវិញនៅប្រអប់លូចេញចូលផ្ទះ​របស់ប្រជាពលរដ្ឋ​នៅទីប្រជុំស្គន់​ ដោយធ្វើយ៉ាងណា​ឲ្យមានជំរេលងាយស្រួលធ្វើដំណើរចេញចូលផ្ទះពួកគាត់​ និងជួយដោះស្រាយប្រព័ន្ធលូបង្ហូរទឹកចេញទៅក្រៅពោលគឺកុំធ្វើឱ្យប៉ះពាល់ដល់លំនៅឋាននិងដីភូមិប្រជាពលរដ្ឋ។

សូមជំរាបជូនថា​ គម្រោងស្ថាបនាផ្លូវជាតិលេខ៧ជាបួនគន្លង​​ ចាប់ពីរង្វង់មូលស្គន់​ ដល់​រង្វង់មូលស្ពានគីហ្សូណា​ ក្រុងកំពង់ចាម​នេះ​ បានចាប់ផ្តើមបើកការដ្ឋានស្ថាបនាកាលពីថ្ងៃទី៩​ ខែមករា​​ឆ្នាំ២០២៣​ គម្រោងនេះមានប្រវែងសរុបជាង៤៥គីឡូម៉ែត្រ ចំពោះទទឹង​ផ្លូវវិញ​នៅតំបន់ក្រៅទីប្រជុំ​ មានទទឹង២៤ម៉ែត្រ​កន្លះ​ និងក្នុងទីប្រជុំជន​មានទទឹង២០ម៉ែត្រ​កន្លះ​ ដោយមានសួនច្បារនៅចំចំណុចកណ្តាលផ្លូវ​ ក្រោមឥណទានសម្បទានពីរដ្ឋាភិបាលនៃសាធារណៈរដ្ឋប្រជាមានិតចិន៕

អត្ថបទ​និង​រូបភាព ​៖​ ឡេក​ ចាន់ពេជ្រ​