រដ្ឋបាលខេត្តបាត់ដំបងចាប់ផ្ដើមចាក់បេតុងបណ្ដើរៗ ដើម្បីសម្រួលចរាចរណ៍ដល់ពលរដ្ឋ

ផ្លូវមួយខ្សែស្ថិតក្នុងក្រុងបាត់ដំបង ដែលកន្លងមកមានជង្ហុក ដូចរន្ធបាយខុម នឹងធ្វើឱ្យប្រជាពលរដ្ឋមានការលំបាកក្នុងការធ្វើដំណើរ ឥឡូវត្រូវបានអាជ្ញាធរខេត្ត ចាប់ផ្តើបចាក់ក្រាលបេតុងយ៉ាងរឹងមាំដើម្បីឲ្យពលរដ្ឋធ្វើដំណើរងាយស្រួល។

ទីតាំងផ្លូវមួយខ្សែនេះ គឺស្ថិតក្នុងភូមិទួលតាឯក សង្កាត់ទួលតាឯក ក្រុងបាត់ដំបង ដោយចាប់ពីចំណុចផ្លូវរថភ្លើង ទៅទល់នឹងរង្វង់មូលព្រះនរាយណ៍ ដែលមានចម្ងាយប្រវែង ៣៦៥ ម៉ែត្រ និងទទឹង ១២ ម៉ែត្រ ជាបេតុងអាមេសរសៃដែកហើយកន្លងមកផ្លូវនេះមានការលំបាកខ្លាំងក្នុងការធ្វើដំណើរ ដោយសារតែផ្លូវនេះមានជង្ហុកធំៗ និងជាទីប្រជុំជនដែលមានអ្នកធ្វើដំណើរច្រើនផងដែរ។

លោក ព្រួញ រិទ្ធថា ប្រធានមន្ទីរសាធារណការនិងដឹកជញ្ជូនខេត្តបាត់ដំបងបានបញ្ជាក់ថា គម្រោងផ្លូវមួយខ្សែនេះ គឺជាគម្រោងថ្នាក់ក្រោមជាតិ របស់រដ្ឋបាលសាលាខេត្តបាត់ដំបង ដែលថ្មីៗនេះកម្លាំងជំនាញចុះទៅសិក្សាព្រមទាំងបានក្រាលបេតុងអាមេ តាមការណែនាំរបស់រដ្ឋបាលខេត្ត ដើម្បីឱ្យសមតាមតម្រូវការរបស់ប្រជាពលរដ្ឋក្នុងការធ្វើដំណើរនិងប្រកបអាជីវកម្មក្បែរតំបន់នោះផង។

លោកប្រធានមន្ទីរបានបន្តថា រយៈពេលប៉ុន្មានថ្ងៃនេះក្រុមការងាររបស់រដ្ឋបាលនៃសាលាខេត្តបាត់ដំបង បានចាក់ក្រាលបេតុងសរសៃដែក មួយចំហៀងរួចរាល់ហើយ ដោយរង់ចាំឱ្យរឹងដើម្បីបើកឱ្យពលរដ្ឋធ្វើដំណើរនិងឱ្យរថយន្តបើកបរឆ្លងកាត់បាន ទើបក្រុមជំនាញចាប់ផ្ដើមក្រាលមួយចំហៀងទៀត ដើម្បីសម្រេចជាស្ថាពរ។

លោកប្រធានមន្ទីរ ក៏បានសំណូមពរដល់បងប្អូនប្រជាពលរដ្ឋដែលរស់នៅក្នុងក្រុងបាត់ដំបង មេត្តាយោគយល់ដល់រដ្ឋបាលខេត្ត អំពីបញ្ហាដីហុយដោយសារតែការស្ថាបនាប្រព័ន្ធលូមិនទាន់រួចរាល់ ដែលបច្ចុប្បន្នរដ្ឋបាលខេត្តកំពុងស្ថាបនាផ្លូវជាបណ្ដើរៗ ទៅលើតំបន់ណាដែលបានបង្កប់ប្រព័ន្ធលូរួចរាល់ រហូតដល់ដើមឆ្នាំ ២០២៦ ដើម្បីបញ្ចប់គម្រោងដែលជាជំនួយរបស់ធនាគារអភិវឌ្ឍន៍អាស៊ី (ADB) ៕

អត្ថបទ ៖ សោ និយមរ័ត្ន