ច្បាប់ដកសញ្ជាតិខ្មែរ នឹងក្លាយជាខឿនដ៏រឹងមាំ​ជួយការពារសន្តិភាព និងស្ថេរភាពរបស់ប្រទេសជាតិកម្ពុជា

បណ្តាពលរដ្ឋ និងមន្ត្រីរាជការស៊ីវិលទូទៅយល់ឃើញថា ច្បាប់ដកសញ្ជាតិខ្មែរ ពីជនជ្រុលនិយមឃុបឃិតជាមួយបរទេស នឹងក្លាយជាខឿនដ៏រឹងមាំមួយជួយការពារដល់សន្តិភាព និងស្ថេរភាពរបស់ប្រទេសជាតិ យ៉ាងពិតប្រាកដ។

លោក ឌិន សាវ៉ង ចៅសង្កាត់រងទី១ សង្កាត់អូរឬស្សី១ នៃរដ្ឋបាលខណ្ឌ៧មករា តំណាងពលរដ្ឋទូទាំងសង្កាត់ យល់ឃើញថា ការសម្រេចចិត្តរបស់សម្តេចអគ្គមហាសេនាបតីតេជោ ហ៊ុនសែន ជាការគិតគូរខ្ពស់ដល់ផលប្រយោជន៍របស់ប្រជាជន និងប្រទេសជាតិ ព្រោះសម្តេចជាមេដឹកនាំឆ្នើម ដែលចង់ឃើញប្រទេសមានសន្តិភាព និងប្រជាជនរស់នៅបានសុខស្រួល ទើបសម្តេចតែងតែរិះរកគ្រប់វិធីសាស្ត្រ ដើម្បីកំចាត់រាល់ជន ឬបុគ្គលទាំងឡាយណា ដែលបានចូលដៃចូលជើងជាមួយជាតិសាសន៍ដទៃ ប៉ងមកបំផ្លាញប្រទេសជាតិរបស់ខ្លួនឯង ។

លោកបានបញ្ជាក់ថា កម្ពុជាធ្លាប់ឆ្លងកាត់ភ្លើងសង្គ្រាមកាប់សម្លាប់ប្រជាពលរដ្ឋរាប់លានអ្នកក្នុងរបប ៣ឆ្នាំ ៨ខែ ២០ថ្ងៃ ដោយសារតែជនជាតិខ្មែរ ចូលដៃចូលជើង និងជឿលើបរទេស ដើម្បីបំផ្លាញជាតិសាសន៍ខ្លួនឯង។

កាលពីថ្ងៃទី០៧ ខែកក្កដា ឆ្នាំ២០២៥ម្សិលមិញ រដ្ឋសភា កម្ពុជា បានអនុម័តទទួលយកសំណើររបស់តំណាងរាស្ត្រហត្ថលេខី​១២៥រូប ដែលស្នើសុំធ្វើវិសោធនកម្មមាត្រា៣៣ នៃរដ្ឋធម្មនុញ្ញ ដើម្បីបើកផ្លូវរៀបចំក្របខណ្ឌច្បាប់ ក្នុងការដកសញ្ជាតិខ្មែរចំពោះពលរដ្ឋក្បត់ជាតិ និងក្បត់ពលរដ្ឋខ្លួនឯង៕

អត្ថបទ៖ សុភា