មន្ទីរសម្រាកព្យាបាលជំងឺ មេត្តាសំណង់១២ រងការចោទប្រកាន់ថា ព្យាបាលធ្វេសប្រហែសបណ្ដាល​ឲ្យទារកអាយុ៨ខែម្នាក់ស្លាប់

មន្ទីរសម្រាកព្យាបាលជំងឺ មេត្តាសំណង់១២ កំពុងរងការចោទប្រកាន់ពីអាណាព្យាបាលទារកអាយុ ៨ខែ ថា ព្យាបាលមានការធ្វេសប្រហែសបណ្ដាលកូនរបស់គាត់ស្លាប់បាត់បង់ជីវិត ខណៈម្ចាស់មន្ទីរពេទ្យ រុញឲ្យក្រុមគ្រួសារទារករងគ្រោះអាចដាក់ពាក្យបណ្ដឹងទៅតុលាការបាន បើសិនជាយល់ថា ការព្យាបាលរបស់ក្រុមគ្រូពេទ្យមានបញ្ហា ឬមានការធ្វេសប្រហែស។

តាមព័ត៌មានពីពូបង្កើតរបស់ទារកដែលស្លាប់បានអោយដឹងថា ក្មួយប្រុសរបស់គាត់មានជំងឺគ្រុនឈាម ហើយបាន ដឹកយកទៅសម្រាកព្យាបាលនៅមន្ទីរសម្រាកព្យាបាលជំងឺ មេត្តាសំណង់១២ ដែលមានទីតាំងនៅផ្ទះលេខ ៦៤ Lផ្លូវលេខ ២៦៥ភូមិទី ១៣ (សំណង់១២) សង្កាត់ទឹកល្អក់ទី៣ ខណ្ឌទួលគោក កាលពីថ្ងៃទី៥ ខែកក្កដា ឆ្នាំ២០២៥។

ប្រភពបន្ថែមថា នៅពេលសម្រាកព្យាបាលនៅមន្ទីរពេទ្យខាងលើបានរយៈពេល០២ថ្ងៃ ស្ថានភាពក្មួយប្រុសកាន់តែធ្ងន់ធ្ងរខ្លាំង តែគ្រូពេទ្យហាក់ដូចជាមិនយកចិត្តទុកដាក់ ទើបនៅព្រឹកថ្ងៃទី៧ ខែកក្កដា ឆ្នាំ២០២៥ ក៏បានបញ្ជូនទៅកាន់មន្ទីរពេទ្យគន្ធបុប្ផា ប៉ុន្តែពេលទៅដល់ គ្រូពេទ្យនៅមន្ទីរពេទ្យគន្ធបុប្ផាបានបញ្ជាក់ថា ក្មេងប្រុសខាងលើ ស្លាប់តាំងពីមុនបញ្ជូន​មកម្ល៉េះ។

ជុំវិញករណីនេះ វេជ្ជបណ្ឌិត ហ៊ាង រតនា ម្ចាស់មន្ទីរសម្រាកព្យាបាលជំងឺ មេត្តាសំណង់១២ ដែលរងចោទប្រកាន់បានប្រាប់អ្នកថា ក្នុងលក្ខខណ្ឌបើសិនអាណាព្យាបាលក្មេងយល់ថា ការព្យាបាលរបស់គ្រូពេទ្យមានបញ្ហា ឬមានការធ្វេសប្រហែស ក្រុមគ្រួសារអាចប្តឹងទៅទៅតុលាការបាន។

សមត្ថកិច្ចជំនាញកោសល្យវិច័យ នៃស្នងការដ្ឋាននគរបាលរាជធានីភ្នំពេញ ក្រោយពីពិនិត្យរួចរាល់ បានបញ្ជាក់ថា ទារករងគ្រោះ គឺស្លាប់បណ្តាលមកពីជំងឺគ្រុនឈាមធ្ងន់ធ្ងរ៕

អត្ថបទ៖ រដ្ឋា