សម្តេច ម៉ែន សំអន ៖ ស្ពានគឺជាសរសៃឈាម នៃសេដ្ឋកិច្ចជាតិ និងជាអាទិភាពគន្លឹះទី ២ ក្នុងចំណោមអាទិភាពគន្លឹះទាំង ៥

សម្តេច​កិត្តិ​សង្គហ​បណ្ឌិត ម៉ែន សំអន ឧ​ត្ត​ម​ប្រឹក្សា​ផ្ទាល់​ព្រះមហាក្សត្រ បាន​ថ្លែងថា ស្ពាន​មេគង្គ​ក្រចេះ គឺជា​សរសៃឈាម​ នៃ​សេដ្ឋកិច្ចជាតិ និង​ជា​អាទិភាព​គន្លឹះ​ទី​ ២ ក្នុងចំណោម​អាទិភាព​គន្លឹះ​ទាំង​ ៥ “​មនុស្ស ផ្លូវ ទឹក ភ្លើង និង​បច្ចេកវិទ្យា​” នៃ​យុទ្ធសាស្ត្រ​បញ្ចកោណ​ដំណាក់កាល​ទី​ ១ ដោយ​ក្នុង​កិច្ចការ​អាទិភាព​ទី​ ២ នៃ​បញ្ចកោណ​ទី​ ២ គឺ​ការលើកកម្ពស់​ការតភ្ជាប់ និង​ការបង្កើន​ប្រសិទ្ធភាព នៃ​វិស័យ​ដឹកជញ្ជូន។

សម្តេច​កិត្តិ​សង្គហ​បណ្ឌិត ម៉ែន សំអន ថ្លែង​បែបនេះ ​ក្នុងពេល​អញ្ជើញ​ទស្សនា ស្ពាន​មេគង្គ​ក្រចេះ បន្ទាប់ពី​កម្មវិធី​ប្រគេន​ទៀន​ព្រះវស្សា​ចំនួន ៤​ វត្ត នៅ​ខេត្តក្រចេះ កាលពី​រសៀល​ថ្ងៃអាទិត្យ ១០ ​រោច ខែ​អាសាឍ ឆ្នាំម្សាញ់ សប្តស័ក ព​.​ស​. ២៥៦៩ ត្រូវ​នឹង​ថ្ងៃទី​ ២០ ខែកក្កដា ឆ្នាំ ២០២៥។

សម្តេច​កិត្តិ​សង្គហ​បណ្ឌិត ម៉ែន សំអន បាន​បញ្ជាក់​ថា ស្ពាន​មេគង្គ​ក្រចេះ គឺជា​សរសៃឈាម​ នៃ​សេដ្ឋកិច្ច​ជាតិ និង​ជា​អាទិភាព​គន្លឹះ​ទី ​២ ក្នុងចំណោម​អាទិភាព​គន្លឹះ​ទាំង ​៥ “​មនុស្ស ផ្លូវ ទឹក ភ្លើង និង​បច្ចេកវិទ្យា​” នៃ​យុទ្ធសាស្ត្រ​បញ្ចកោណ​ដំណាក់កាល​ទី ​១ ដោយ​ក្នុង​កិច្ចការ​អាទិភាព​ទី​ ២ នៃ​បញ្ចកោណ​ទី ​២ គឺ​ការលើកកម្ពស់​ការតភ្ជាប់ និង​ការបង្កើន​ប្រសិទ្ធភាព នៃ​វិស័យ​ដឹកជញ្ជូន។

សូម​បញ្ជាក់​ថា ស្ពាន​នេះ​មាន​ប្រវែង ១.៧៦១​ ម៉ែត្រ គឺជា​ផ្នែក​មួយ​ នៃ​ផ្លូវជាតិ​លេខ ៦០​ បេ ត​ភ្ជាប់​ពី​ខេត្ត​ក្រចេះ ទៅ​ខេត្តកំពង់ធំ ដែលមាន​ភាព​ប្រទាក់ក្រឡា​គ្នា​ជាមួយ​ផ្លូវជាតិ​សំខាន់ៗ ដូចជា ​ត្រើយ​ខាង​លិច​ត​ភ្ជាប់​ផ្លូវជាតិ​លេខ ​៦ ត្រង់​ផ្លូវបំបែក​កំពង់ថ្ម កំពង់ធំ ឆ្ពោះទៅកាន់​ខេត្តសៀមរាប និង​ត​ភ្ជាប់​តាមរយៈ​ផ្លូវ​ខេត្ត​លេខ ​២៧៩ ឆ្ពោះទៅកាន់​ខេត្តកំពង់ចាម ចំណែក​ឯ​ត្រើយ​ខាងកើត​វិញ​នោះ គឺ​ត​ភ្ជាប់​ផ្លូវជាតិ​លេខ​ ៧ ឆ្ពោះទៅកាន់​ខេត្តស្ទឹងត្រែង ខេត្តរតនគិរី ខេត្តមណ្ឌលគិរី និង​ត​ភ្ជាប់​ជាមួយ​ផ្លូវជាតិ​លេខ​ ៧៣ ដោយ​ឆ្លងកាត់​ស្រុក​ឆ្លូង ស្រុក​តំបែរ ឆ្ពោះទៅកាន់​ខេត្ត​ត្បូងឃ្មុំ រួច​ត​ភ្ជាប់​ទៅកាន់​ផ្លូវជាតិ​លេខ ៧ ​ឆ្ពោះទៅកាន់​ខេត្តកំពង់ចាម ឬ​ខេត្តព្រៃវែង រួច​បន្ត​ឆ្ពោះ​ទៅ​រាជធានី​ភ្នំពេញ៕

អត្ថបទ ៖ វិមាន