អ្នកតាមដានព្រឹត្តិការណ៍សង្គម អំពាវនាវសមត្ថកិច្ចវែកមុខជនបោកប្រាស់ក្លែងបន្លំជាសាច់ញាតិវីរកងទ័ពពលីស្នើសុំជំនួយ មកផ្តន្ទាទោស

អ្នកជំនាញ និងជាអ្នកតាមដានព្រឹត្តិការណ៍សង្គម អំពាវនាវដល់ស្ថាប័នមានសមត្ថកិច្ចកំណត់អត្តសញ្ញាណ និងផ្តន្ទាទោសបុគ្គលដែលក្លែងបន្លំជាសាច់ញាតិរបស់វីរកងទ័ពដែលបានពលីនៅក្នុងសមរភូមិ ហើយស្នើសុំជំនួយ យកមកផ្តន្ទាទោសតាមច្បាប់។ អ្នកជំនាញចាត់ទុកថា ការបោកប្រាស់គ្រាប្រទេសជាតិជួបការលំបាកបែបនេះ គឺជាអំពើអសីលធម៌ធ្ងន់ធ្ងរ និងប៉ះពាល់សេចក្តីថ្លែថ្នូរកងទ័ព។

ការអំពាវនាវនេះធ្វើឡើងបន្ទាប់ពីមានការកើនឡើងនៃអំណោយសប្បុរសធម៌របស់ប្រជាពលរដ្ឋខ្មែរទាំងក្នុង និងក្រៅប្រទេស ដែលបានបរិច្ចាគថវិកាតាមរយៈ QR code ឬបរិច្ចាកសម្ភារៈជួយដល់គ្រួសារយោធិនដែលបានបាត់បង់ជីវិតការពារមាតុភូមិក្នុងជម្លោះព្រំដែនជាមួយប្រទេសថៃ។ ទោះបីជាយ៉ាងណាក៏ដោយ មានជនឆ្លៀតឱកាសបានទាញយកផលប្រយោជន៍ពីស្ថានភាពនេះ តាមរយៈការបង្ហោះរូបថត និងវីដេអូ អះអាងថា ជាសាច់ញាតិរបស់ទាហានដែលបានស្លាប់ និងចែករំលែកលេខកូដ QR Code ផ្ទាល់ខ្លួនរបស់ពួកគេដើម្បីសុំជំនួយពីសាធារណជន។

ពាក់ព័ន្ធបញ្ហានេះ លោកបណ្ឌិត យង់ ពៅ អ្នកជំនាញនយោបាយ និងជាអ្នកតាមដានព្រឹត្តិការណ៍សង្គម អំពាវនាវដល់អាជ្ញាធរមានសមត្ថកិច្ចទប់ស្កាត់នូវចលនាជនបោកប្រាស់មួយចំនួន ដែលយកយុទ្ធជនពលីដ៏អង់អាចនៅសមរភូមិ ទៅជាធ្វើចលនាស្វែងរកភាគលាភដោយខ្លួនឯង តាមរយៈស្កេន QR Code ដើម្បីឱ្យប្រជាពលរដ្ឋបង់លុយ ហើយបង្វែទៅជាផលប្រយោជន៍ផ្ទាល់ខ្លួន។ លោកសង្កត់ធ្ងន់ថា៖«ជនទាំងអស់នេះ បានប្រព្រឹត្តនូវទង្វើអសីលធម៌ ដែលអាចហៅថាជាជនពិកាមនសិការ ពីព្រោះវីរកងទ័ព វីរយុទ្ធជន បានពលីដើម្បីជាតិ មាតុភូមិ បែរជាខ្លួនឯងយកធ្វើជាប្រយោជន៍ផ្ទាល់ខ្លួន បោកប្រាស់ប្រជាពលរដ្ឋទូទៅ»។

ក្នុងន័យនេះ លោកជំរុញអាជ្ញាធរមានសមត្ថកិច្ចត្រូវតែមានវិធានការច្បាប់ដ៏តឹងរឹងចំពោះជនទាំងអស់នោះ ដែលចាត់ចូលជាការឆបោក ដូច្នេះត្រូវតែមានវិធានការច្បាប់ជាបន្ទាន់ ដើម្បីកុំឱ្យប៉ះពាល់ដល់ទឹកចិត្តកងទ័ព កិត្តិយស សេចក្តីថ្លៃថ្នូរជាតិ និងសេចក្តីថ្លៃថ្នូរចំពោះអ្វីដែលយុទ្ធជនខំបូជាជីវិតដើម្បីជាតិ។ លោកបណ្ឌិត យង់ ពៅ ក៏ទទូចទៅដល់ជនដែលមានចរិតបោកប្រាស់ទាំងនោះ សូមបញ្ឈប់ជាប​ន្ទាន់នូវទង្វើបោកប្រាស់ទាំងអស់នេះ បើពុំនោះទេនឹងប្រឈមចំពោះមុខច្បាប់ និងប្រឈមការស្តីបន្ទោសពីមហាជន។ លើសពីនេះ លោកក៏សំណូមដល់ប្រជាពលរដ្ឋ មេត្តាពិនិត្យ និងផ្ទៀងផ្ទាត់ឱ្យបានហ្មត់ចត់មុនបាញ់លុយតាម QR code ចៀសវាងចាញ់បោកជនបោកប្រាស់។

ចំណែកលោកបណ្ឌិត ឈត ប៊ុនថង អ្នកជំនាញទស្សនៈវិជ្ជា គាំទ្រឱ្យមានចំណាត់ផ្លូវច្បាប់ចំពោះជនបោកប្រាស់ ដើម្បីព្រមានអ្នកបោកប្រាស់ផ្សេងទៀតកុំឱ្យយកគំរូតាម។ សម្រាប់លោក ការអំពាវនាវស្វែងរកជំនួយសប្បុសជនដើម្បីជួយដល់វីរៈយុទ្ធជនដែលបានពិលីនៅសមរភូមិជាអាវុធមុខពីរ។ អាវុធមុខពីរ លោកសំដៅថាជំនួយខ្លះពិតជាបានដល់ដៃគ្រួសារសាច់ញតិតបតាមការអំពាវនាវ ប៉ុន្តែជំនួយខ្លះបានទៅលើជនបោកប្រាស់ដែលបានបន្លំធ្វើជាសាច់ញាតិគ្រួសារកងទ័ព។ ត្រង់ចំណុចនេះ មិនខុសពីលោកបណ្ឌិត យង់ ពៅ , លោក បណ្ឌិត ឈត ប៊ុនថង អំពាវនាវដល់សមត្ថកិច្ចស៊ើបអង្កេតវែកមុខជនបោកប្រាស់យកមកផ្តន្ទាទោស។

លោកសង្កត់ធ្ងន់ថា៖«ការប្រើប្រាស់រូបភាពវីរជនដែលបានពលីនៅលើសមរភូមិមិនបានត្រឹមត្រូវ ក្នុងន័យយកទៅប្រើដើម្បីទាញយកផលប្រយោជន៍ផ្ទាល់ខ្លួនជារឿងអសីលធម៌ នឹងប៉ះពាល់ដល់ការយកចិត្តទុកដាក់ជាផ្លូវពីស្ថាប័នរដ្ឋ»។ ជាការពិត ការកៀរគរសប្បុរជនដើម្បីជួយគ្រួសារកងទ័ពគួរតែនៅបន្តធ្វើ ប៉ុន្តែគួរតែមានរបៀបររាបរយ។ លោកយល់ថា៖« អ្វីដែលគួរពិចារណា យើងអាចបង្កើតជាមូលនិធិរួមមួយ ហើយបងប្អូនត្រូវជួយទៅតាមយន្តការនេះ ចៀសវាងការជួយគ្មានសណ្តាប់ធ្នាប់ ដែលធ្វើឱ្យការទទួលបានខុសៗគ្នា និងមិនបានដល់ដៃសាច់ញាតិកងទ័ព»។ សម្រាប់លោកយន្តការមូលនិធិរួមនេះ អាចបង្ការហានិភ័យចំពោះជនដែលមានចេតនាមិនល្អ មិនស្មោះត្រង់យកទៅប្រើប្រាស់មិនត្រឹមត្រូវ ឬសម្រាប់ប្រយោជន៍ខ្លួនជាដើម។

គួរជម្រាបថា ក្នុងជម្លោះព្រំដែនដែនកម្ពុជា-ថៃ បានបណ្តាឱ្យកងទ័ពកម្ពុជាស្លាប់ និងរបួសច្រើននាក់។ ជាការកត់សម្គាល់ ប្រជាពលរដ្ឋខ្មែរទូទាំងនគរដោយរាប់តាំងពីវិស័យឯកជនធំៗ អ្នកលក់អនឡាញ ពលរដ្ឋធម្មតា និងអ្នកប្រកបរបរសេដ្ឋកិច្ចក្រៅប្រព័ន្ធ សស្រាក់ដៃគ្នារៃអង្គាសថវិកា និងជំនួយជាសម្ភារៈជួយដល់គ្រួសារកងទ័ព និងជនភៀសសឹក​។

ចំណែកប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត បានលើកឡើងថា​ ការប្រយុទ្ធគ្នារវាងកងទ័ពកម្ពុជានិងកងទ័ពថៃក្នុងរយៈពេលប៉ុន្មានថ្ងៃនេះបានបណ្តាលឱ្យយោធិនមួយចំនួនត្រូវពលីនិងរងរបួស ក៏ដូចជាប្រជាពលរដ្ឋរាប់ម៉ឺនគ្រួសារក្លាយជាជនភៀសសឹកមិនអាចប្រកបរបរចិញ្ចឹមជីវិតប្រចាំថ្ងៃបាន។ សម្តេចអះអាងថា៖«រាជរដ្ឋាភិបាលបានរៀបចំនិងកំពុងអនុវត្តនូវកញ្ចប់គោលនយោបាយសម្រាប់យោធិនពលី និងរបួស ក៏ដូចជាផ្ដល់កិច្ចអន្តរាគមន៍គាំទ្រដល់បងប្អូនប្រជាជនដែលជាជនភៀសសឹក។

ទន្ទឹមនឹងនេះដែរ ធនាគារ និងសមាគមមីក្រូហិរញ្ញវត្ថុកម្ពុជា បានសម្រេចប្រកាសលុបចោលបំណុលទាំងស្រុងចំពោះយោធិនពលី និងយោធិនពិការ ដើម្បីជាការតបស្នងនូវកិច្ចខិតខំប្រឹងប្រែងពលីជីវិតដើម្បីការពារបូរណភាពទឹកដី៕