ព័ត៌មានជាតិ

យីហោទឹកត្រី ទឹកស៊ីអីវ ក្នុងស្រុកចំនួន ៥ ផលិតស្តង់ដាអន្តរជាតិ ភ្ជាប់គោលការណ៍សុវត្ថិភាពខ្ពស់

បានផុស

១១ ខែ មុន

នៅ

ថ្ងៃពុធ ១៣ សីហា ២០២៥

ដោយ

សហគ្រាសផលិតទឹកត្រី ទឹកស៊ីវ ក្នុងស្រុកចំនួន ៥ បានអនុវត្តគោលការណ៍ស្តង់ដាសុវត្ថិភាពចំណីអាហារ ថែមទាំងទទួលបានវិញ្ញាបនបត្របញ្ជាក់ទទួលស្គាល់សុវត្ថិភាពម្ហូបអាហារតាមគោលការណ៍ស្ម័គ្រចិត្ត CQS “Cambodia Quality Seal” ពីអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម (UNIDO)។

CQS សំដៅទៅលើនិមិត្តសញ្ញាបញ្ជាក់ពីគុណភាពផលិតផលកម្ពុជា ដែលផលិតភ្ជាប់គោលការណ៍សុវត្ថិភាពអាហារជាចម្បង។

សហគ្រាសផលិតទឹកត្រី នី អៀងណេង

សហគ្រាសផលិតទឹកត្រី នី អៀងណេង បង្កើតឡើងបានរយៈពេលជាង ១៥ ឆ្នាំតាំងពីឆ្នាំ ២០១០ ដែលមានទីតាំងនៅសង្កាត់អរិយក្សត្រ ក្រុងអរិយក្សត្រ ខេត្តកណ្ដាល។

សហគ្រាសផលិតទឹកត្រី នី អៀងណេង ប្រើប្រាស់ស្លាកយីហោរូបបង្កង ដែលមានរសជាតិច្រើនជម្រើសមានបង្កង០៧ បង្កង០៩ និងបង្កង០៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហគ្រាសផលិតទឹកត្រី នី អៀងណេង ទទួលបានវិញ្ញាបនបត្របញ្ជាក់គុណភាពស្ដង់ដារសុវត្ថិភាពចំណីអាហារដល់ទៅ ៣ (រួមមានស្ដង់ដារកម្ពុជា CS “Cambodia Standard “, ស្ដង់ដារ CQS “Cambodia Quality Seal” និងស្តង់ដារ HALAL) ថែមទាំងទទួលបានពានរង្វាន់ (ស៥) ពីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។

សហគ្រាសផលិតទឹកត្រី លាង ឡេង

សហគ្រាសផលិតទឹកត្រី លាង ឡេង មានផលិតទាំង ទឹកត្រី ទឹកស៊ីអីវ ទឹកខ្មេះ ទឹកសៀង ទឹកម្ទេស រួមទាំងទឹកប្រេងខ្យង។

សហគ្រាសផលិតទឹកត្រី លាង ឡេង មានប្រវត្តិបង្កើតឡើងតាំងពីឆ្នាំ ១៩៨៣។ សហគ្រាសប្រកាន់គោលការណ៍អនុលោមភាពផលិតផលទាំងស្តង់ដាជាតិ និងអន្តរជាតិ រួមទាំងផ្នែកបរិស្ថាន និងបានការទទួលស្គាល់ស្តង់ដា ISO ស្តង់ដា HALAL និងស្ដង់ដារសុវត្ថិភាពចំណីអាហារពីអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម (UNIDO) CQS “Cambodia Quality Seal”។

សហគ្រាស ភ្នំពេជ្រ ប៊ុនឃា

សហគ្រាស ភ្នំពេជ្រ ប៊ុនឃា បានចាប់ផ្តើមពីការផលិតសៀងជាលក្ខណៈគ្រួសារនៅឆ្នាំ២០១៣ និងបានពង្រីកផលិតកម្មទឹកត្រី និងទឹកស៊ីអ៊ីវបន្ថែមទៀត។

ក្រៅពីផលិតទឹកត្រី ទឹកស៊ីអីវ ទឹកសៀង សហគ្រាសបានកែច្នៃគ្រុំជំពុះទាដែលជាផលិតផលក្នុងស្រុកចិញ្ចឹមនៅខេត្តកោះកុង ផលិតចេញជាប្រេងគ្រុំរសជាតិមិនចាញ់ប្រេងខ្យងឡើយ។

ដោយផ្ដោតលើគុណភាព សហគ្រាសផលិតទឹកត្រី ភ្នំពេជ្រ ប៊ុនឃា បានការបញ្ជាក់ទទួលស្គាល់ពីស្ដង់ដារជាតិ CS និង ស្តង់ដា CQS ពីអង្គការ UNIDO ពាក់ព័ន្ធសុវត្ថិភាពចំណីអាហារ។ មិនតែប៉ុណ្ណោះ សិប្បកម្ម ភ្នំពេជ្រ ប៊ុនឃា កំពុងពង្រឹងបន្ថែមដើម្បីទទួលបាននូវស្ដង់ដា GMP, GHP និង HAccp បន្ថែមទៀត។

សហគ្រាសផលិតទឹកត្រី និង ទឹកស៊ីអ៊ីវ ង៉ូវ ហេង

សហគ្រាសដែលមានមូលដ្ឋានផលិតទឹកត្រី និងទឹកស៊ីអ៊ីវ នៅខេត្តកំពត មានប្រវត្តិអាជីវកម្មបង្កើតឡើងតាំងពីឆ្នាំ ១៩៩៥ គិតមកដល់ពេលនេះមានរយៈពេលជាង ៣០ ឆ្នាំ។

បច្ចុប្បន្ន សហគ្រាសមានផលិតផលដូចជា៖ ទឹកត្រី ទឹកស៊ីអ៊ីវ ទឹកម្ទេស ទឹកសៀង ទឹកប្រេងខ្យង អំបិល និងម្រេចកំពត ដែលភាគច្រើនសុទ្ធសឹងតែជាទំនិញសម្គាល់ភូមិសាស្រ្ដប្រចាំខេត្តកំពត-កែប។

ក្រៅពីការផលិតសម្រាប់ចែកចាយក្នុងស្រុក ក្រុមហ៊ុនផលិតទឹកត្រី ង៉ូវហេង ក៏បាននាំយកផលិតផលទៅដាក់លក់នៅលើឆាកអន្តរជាតិ ដែលមានដូចជាសហរដ្ឋអាមេរិក បណ្ដាប្រទេសនៅអឺរ៉ុប រួមទាំងនៅប្រទេសអូស្ដ្រាលី។

សហគ្រាសផលិតទឹកត្រី គឹមហ៊ី សញ្ញាទន្សាយមួយ

សិប្បកម្មផលទឹកត្រី គីមហុី សញ្ញាទន្សាយមួយ មានទីតាំងសិប្បកម្មផលិតនៅភូមិ កែប សង្កាត់ កែប ក្រុងកែប ខេត្តកែប។

ទឹកត្រីខ្មែរនេះមានផលិតទឹកត្រីច្រើនជម្រើសមានទឹកត្រីពិសេស ទឹកត្រីលេខ1 ទឹកត្រីលេខ2 និងទឹកត្រីលេខ3៕

ក្រៅពីសហគ្រាសទាំង ៥ នេះ ក៏មានសិប្បកម្មក្នុងស្រុកមួយចំនួនទៀត កំពុងតែជំរុញការផលិតសម្រាប់ផ្គត់ផ្គង់ទីផ្សារក្នុងស្រុកមានដូចជា៖

សហគ្រាសផលិតទឹកត្រី ថៃ ហុងកៀត

យីហោទឹកត្រីនេះ មានប្រវត្តិឈរជើងនៅក្នុងស្រុកខ្មែរតាំងពីឆ្នាំ១៩៨៨ ដែលមហាជនស្គាល់តាមរយៈផលិតទឹកត្រីរូបបង្កងប៉ាកនៅលើសំបកដប។

បច្ចុប្បន្នសហគ្រាសមានផលិតទឹកត្រី ៣ ប្រភេទមានដូចជា ទឹកត្រីកន្ទុយបី ទឹកត្រីកន្ទុយបីពិសេស ទឹកត្រីរូបបង្កងប៉ាក និងទឹកស៊ីអ៊ីវក្របីឃ្លៀច។

សហគ្រាសខេមហ្វូដ (ចំការដូង)

សហគ្រាសខេមហ្វូដ (ចំការដូង) ក៏ជាសហគ្រាសក្នុងស្រុកដែលមានជំនាញផ្នែកផលិតគ្រឿងទឹកជ្រលក់ជាច្រើនមុខមានដូចជាទឹកស៊ីអ៊ីវ ទឹកម្ទេស ទឹកប៉េងប៉ោះ ទឹកសៀង រួមទាំងទឹកប្រេងខ្យងផងដែរ។

សហគ្រាសផលិតទឹកស៊ីអ៊ីវ ផេង លី សញ្ញារូបគោ

សហគ្រាសនេះផ្តោតចម្បងលើការផលិតទឹកស៊ីអ៊ីវ ដែលទឹកស៊ីអ៊ីវរូបគោមានការពេញនិយមពីស្រទាប់ពលរដ្ឋទូទៅ។ ក្រៅពីផលិតទឹកស៊ីអ៊ីវរូបគោ សហគ្រាសក៏បានបន្ថែមការផលិតទឹកស៊ីអ៊ីវមូយម៉ាកទៀតគឺរូបជួងមាស ដែលទទួលបានវិញ្ញាបនបត្រទទួលស្គាល់ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

សហគ្រាស រារី

សិប្បកម្ម រ៉ារី មានជំនាញផ្នែកផលិតទឹកជ្រលក់ដោយប្រើប្រាស់វត្ថុធាតុដើមផលិតពីម្ទេសរបស់ខ្មែរ។

សិប្បកម្ម រ៉ារី បានចាប់ផ្តើមដំណើរការតាំងពីឆ្នាំ២០១៤ ដែលបច្ចុប្បន្នសហគ្រាសមានផលិតទឹកជ្រលក់ ៥ រសជាតិ មានដូចជា ទឹកម្ទេស ម្ទេសឆា កាពិកឆា និងទឹកជ្រលក់ហឹរជាដើម៕