​មីយ៉ាន់ម៉ា​បន្តឹងការនាំចូលទំនិញពីថៃ បង្កការកកស្ទះរថយន្តដឹកទំនិញថៃរាប់រយគ្រឿងនៅព្រំដែន

យោធាមីយ៉ាន់ម៉ារឹតបន្តឹងការដឹកជញ្ជូនទំនិញ​ពីប្រទេសថៃនៅតាម​ច្រកព្រំដែន Mae Sot-Myawaddy 2 ដែល​បង្កការកកស្ទះរថយន្តដឹកទំនិញពីថៃទាំងតូច និងធំប្រមាណ ៦០០ គ្រឿង គិតត្រឹមព្រឹកថ្ងៃសុក្រនេះ។ នេះបើតាមការចុះផ្សាយរបស់បណ្ដាញទូរទស្សន៍ថៃ Thai PBS ។

ច្រកព្រំដែន Mae Sot-Myawaddy 2 ស្ថិតនៅក្នុង​ក្រុង​ Mae Sot នៃខេត្ត តាក់ របស់ថៃ និងក្រុង Myawaddy នៃរដ្ឋ Kayin របស់មីយ៉ាន់ម៉ា ដែលជាចំណុចព្រំដែនរសើបនាពេលកន្លងមក ពាក់ព័ន្ធការជួញដូរមនុស្សពីថៃទៅមីយ៉ាន់ម៉ា ដើម្បីធ្វើការក្នុងមជ្ឈមណ្ឌលបោកប្រាស់អនឡាញ។

ប៉ុន្តែបើការផ្សាយតាម Thai PBS កាលពីយប់ថ្ងៃព្រហស្បតិ៍ ឈ្មួញមីយ៉ាន់ម៉ាបានអះអាងថា ​ការរឹតបន្តឹងការត្រួតពិនិត្យ​លើរថយន្តដឹកទំនិញពីថៃឥឡូវនេះ ត្រូវ​បាន​ចេញបញ្ជាពីអគ្គមេបញ្ជាការរងនៃកងកម្លាំងប្រដាប់អាវុធភូមា ​ដើម្បីរក​មើលរថយន្តដឹកទំនិញដែលគ្មានអាជ្ញាប័ណ្ណជួញដូរតាម​ព្រំដែនត្រឹមត្រូវ។

បន្ថែមពីលើនោះ ឈ្មួញមីយ៉ាន់ម៉ាបាន​អះអាងថា មន្ត្រីរដ្ឋាភិបាលយោធាមីយ៉ាន់ម៉ាដែលគ្រប់គ្រងប៉ុស្តិ៍ត្រួតពិនិត្យ កំពុងទាមទារឱ្យឈ្មួញបង់ពន្ធផ្លូវជាលុយ​ដុល្លារអាមេរិក ប្រសិនបើពួកគេចង់ឱ្យរថយន្តដឹកទំនិញរបស់​ខ្លួន ធ្វើដំណើរចូលទៅក្នុងប្រទេសកាន់តែជ្រៅ​។

​ពួកគេបាន​ឱ្យដឹងទៀតថា ហេតុផលពិតប្រាកដនៅពីក្រោយវិធានការដ៏តឹងរ៉ឹងចុងក្រោយ​នេះ គឺដើម្បីទប់ស្កាត់ប្រភពចំណូល​របស់ក្រុមឧទ្ទាមប្រដាប់អាវុធប្រឆាំងរដ្ឋាភិបាលផ្សេងៗ ដូចជា KNU និង PDF ដែលរកបានពីប្រតិបត្តិកររថយន្តដឹកទំនិញ៕