ព័ត៌មានជាតិ

អាជ្ញាធរសង្កាត់ចោមចៅទី ៣ ចុះស្តារសំរាមចេញពីប្រឡាយទឹក ក្រោយភ្លៀងមួយមេធំ

បានផុស

៨ ខែ មុន

នៅ

ថ្ងៃព្រហស្បតិ៍ ២១ សីហា ២០២៥

ដោយ

ក្រោយភ្លៀងមួយមេធំ អាជ្ញាធរសង្កាត់ចោមចៅទី ៣ បានចុះស្តារសំរាមចេញពីប្រឡាយទឹកដែលអមផ្លូវជាតិលេខ ៤ មុខសាលាវិទ្យាល័យ ហ៊ុន សែន ជម្ពូវ័ន ស្ថិតក្នុងភូមិព្រៃព្រីង ២ សង្កាត់ចោមចៅទី ៣ ខណ្ឌពោធិ៍សែនជ័យ។

លោក វ៉ា សាវឿន ចៅសង្កាត់ចោមចៅទី ៣ បានឱ្យដឹងថា នៅរសៀលថ្ងៃទី ២១ ខែសីហា ឆ្នាំ ២០២៥ នេះ ក្រោយមេឃភ្លៀងមួយមេធំធ្វើឱ្យតំបន់មួយចំនួនបានជន់លិច ទឹកហូរយឺត ស្ទះទៅដោយសំរាម ដោយឃើញថា នៅតាមប្រឡាយអមផ្លូវជាតិលេខ ៤ ពោរពេញដោយកាកសំណល់ស្ទះចរន្តទឹកហូរយឺត ទើបលោកដឹកនាំក្រុមការងារ មេភូមិ ប្រជាការពារ សង្កាត់ ភូមិ ចុះមកកាយស្តារយកសំរាម កាកសំណល់ចេញ ដើម្បីសម្រួលចរន្តទឹកហូរបានលឿន បញ្ចៀសការជន់លិច។

លោកចៅសង្កាត់ បញ្ជាក់ថា ចំពោះកាកសំណល់ដែលស្តាររួច លោកបានទាក់ទងទៅក្រុមហ៊ុន មីសូដា ដើម្បីមកដឹកយកទៅចាក់ចោលនៅទីលានចាក់សំរាម។

លោក វ៉ា សាវឿន បានសំណូមពរដល់ប្រជាពលរដ្ឋទាំងអស់ សូមមេត្តាចូលរួមជួយថែរក្សាបរិស្ថាន អនាម័យ និងវេចខ្ចប់ទុកដាក់សំរាមឱ្យបានត្រឹមត្រូវ ចៀសវាងបោះចោលគ្មានសណ្ដាប់ធ្នាប់ដែលអាចធ្លាក់ចូលប្រឡាយទឹកស្ទះនូវចរន្តទឹកហូរ៕

អត្ថបទ ៖ សុខា