ព័ត៌មានជាតិ

សម្តេច ម៉ែន សំអន ៖ ការពលីគ្រប់យ៉ាងរបស់វីរកងទ័ពក្នុងសមរភូមិមុខ គឺបានចារក្នុងបេះដូងខ្មែរគ្រប់រូបគ្មានថ្ងៃបំភ្លេចបានឡើយ

បានផុស

៩ ខែ មុន

នៅ

ថ្ងៃចន្ទ ៨ កញ្ញា ២០២៥

ដោយ

សម្តេចកិត្តិសង្គហបណ្ឌិត ម៉ែន សំអន ប្រធានក្រុមប្រឹក្សាជាតិរណសិរ្ស សាមគ្គីអភិវឌ្ឍន៍មាតុភូមិកម្ពុជា បានថ្លែងថា ការពលីគ្រប់យ៉ាងរបស់វីរកងទ័ពក្នុងសមរភូមិមុខគឺបានចារក្នុងបេះដូងខ្មែរគ្រប់រូបគ្មានថ្ងៃបំភ្លេចបានឡើយចំពោះសង្គ្រាមឈ្លានពានទឹកដីពីសំណាក់យោធាថៃមកលើកម្ពុជាថ្មីៗ កន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះក្នុងពេលប្រារព្ធពិធីអុជធូប ថ្វាយគ្រឿងសក្ការៈ និងបួងសួងសុំសេចក្ដីសុខសេចក្ដីចម្រើន ជូនដល់ប្រជាពលរដ្ឋខ្មែរទូទាំងប្រទេស នៅប្រាសាទនាគព័ន្ធ នៅតំបន់អច្ឆរិយអង្គរ ខេត្តសៀមរាប ថ្ងៃអាទិត្យ ១៥កើត ខែភទ្របទ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី៧ ខែកញ្ញា ឆ្នាំ២០២៥។

សម្តេចកិត្តិសង្គហបណ្ឌិត បានបួងសួងប្រគេនពរជ័យដល់ព្រះសង្ឃគ្រប់ព្រះអង្គ និងថ្វាយព្រះពរជ័យដល់ព្រះមហាក្សត្រ ព្រះមហាក្សត្រី និងគោរពជូនពរ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុនី ហ៊ុន ម៉ាណែត ថ្នាក់ដឹកនាំ សមាជិក-សមាជិកា ព្រឹទ្ធសភា រដ្ឋសភា មន្ត្រីរាជការ ព្រមទាំងប្រជាពលរដ្ឋខ្មែរ សូមឲ្យជួបតែសេចក្តីសុខ សេចក្តី ចម្រើនគ្រប់ៗ គ្នា ប្រទេសជាតិមានសន្តិភាពជារៀងរហូត។ ជាពិសេស សូមឲ្យប្រទេសជាតិរួចផុតពីជំងឺដង្កាត់ គ្រោះកាចចង្រៃ ចៀសផុតពីគ្រោះរាំងស្ងួត និងសម្បូរសប្បាយជានិច្ចនិរន្ត និងប្រជាពលរដ្ឋខ្មែរ និងសូមឲ្យវីរកងទ័ពជួរមុខកម្ពុជាទទួលបានជ័យជំនះ ពីពួកឈ្លានពាន៕

អត្ថបទ ៖ វិមាន