សម្ដេច ហ៊ុន សែន អរគុណព្រុយណេដែលបន្ថែមកម្លាំងមកតាមដានលើបញ្ហាព្រំដែនកម្ពុជា-ថៃ  

កម្ពុជា បានអរគុណរដ្ឋាភិបាលព្រុយណេ ដែលបានបន្ថែមអ្នកសង្កេតការណ៍របស់ខ្លួនមកតាមដានស្ថានការណ៍នៃជម្លោះព្រំដែនរវាងកម្ពុជា-ថៃ ខណៈដែលបញ្ហានេះនៅកំពុងបន្តអូសបន្លាយដោយសារការបន្តរំលោភបំពានរបស់ភាគីថៃមកលើបូរណភាពទឹកដីរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអរគុណនេះ គឺបានធ្វើឡើងដោយប្រមុខរដ្ឋស្ដីទី សម្ដេចតេជោ ហ៊ុន សែន ក្នុងឱកាសដែលសម្ដេចបានទទួលជួបសម្ដែងការគួរសមពីអគ្គមេបញ្ជាការកងទ័ពភូមិន្ទព្រុយណេ លោកឧត្តមសេនីយ៍ទោ Dato Paduka Seri Haji Muhammad Haszaimi Bin Bol Hassan នៅវិមានព្រឹទ្ធសភា។

សម្តេចតេជោ ហ៊ុន សែន បានសម្ដែងនូវការស្វាគមន៍ចំពោះលោកមេបញ្ជាការកងទ័ពភូមិន្ទព្រុយណេ និងគណៈប្រតិភូ ដែលបានមកបំពេញទស្សនកិច្ចនៅកម្ពុជាពេលនេះ ហើយសម្ដេចចាត់ទុកថា នេះជាផ្នែកដ៏សំខាន់ធ្វើឱ្យទំនាក់ទំនងរវាងកម្ពុជា និងព្រុយណេ ពិសេសក្នុងវិស័យយោធាកាន់តែរីកចម្រើនបន្ថែមទៀត។

ក្នុងជំនួបនាព្រឹកថ្ងៃទី១៩ ខែកញ្ញា ឆ្នាំ២០២៥ សម្ដេចតេជោ ហ៊ុន សែន និងលោកមេបញ្ជាការកងទ័ពភូមិន្ទព្រុយណេ បានជជែកគ្នាអំពីសភាពការណ៍វិវត្តចុងក្រោយនៃបញ្ហាជម្លោះតាមបន្ទាត់ព្រំដែនរវាងកម្ពុជា និងថៃផងដែរ។ សម្ដេចតេជោបានពន្យល់ទៅកាន់មេបញ្ជាការកងទ័ពភូមិន្ទព្រុយណេ អំពីរឿងរ៉ាវពិតនៃជម្លោះ ហើយសម្ដេច សង្ឃឹមថា ព្រុយណេនឹងបន្តតាមដានលើបញ្ហានេះ ក្នុងឋានៈជាសមាជិកអាស៊ាន។

ក្នុងន័យនេះ សម្ដេចតេជោ បានស្នើឱ្យព្រុយណេខិតខំជួយក្នុងការជំរុញឱ្យភាគីថៃ រក្សានូវភាពអត់ធ្មត់ ហើយដោះស្រាយបញ្ហាដោយសន្តិវិធី។ នេះជាខ្លឹមសារជំនួបដែលថ្លែងឱ្យដឹងដោយលោក ជា ធីរិទ្ធ អ្នកនាំពាក្យព្រឹទ្ធសភា។

បើតាមលោក ជា ធីរិទ្ធ សម្ដេចតេជោ បានសម្ដែងការអរគុណចំពោះតួនាទីរបស់ព្រុយណេ ក្នុងឋានៈជាសមាជិកអាស៊ាន ដែលបានបន្ថែមនូវកម្លាំងអ្នកសង្កេតការណ៍ក្នុងការតាមដានទៅលើស្ថានការណ៍ជម្លោះព្រំដែនកម្ពុជា និងថៃ ដែលបានកំពុងកើតមានឡើង៕