កម្ពុជាច្រានចោលការចោទរបស់ថៃដែលថាអ្នកភូមិព្រៃចាន់ទន្ទ្រានចូលដីខ្លួន តែការពិតថៃបំពានលើកម្ពុជា

ក្រសួងការបរទេសកម្ពុជា ចេញសេចក្តីថ្លែងការណ៍ឆ្លើយតបនឹងការចោទប្រកាន់របស់ថៃ ដែលថា អ្នកភូមិព្រៃចាន់កម្ពុជាបានទន្ទ្រានចូលទឹកដីថៃធ្វើការតវ៉ា។ ក្រសួងការបរទេសបានច្រានចោល និងបញ្ជាក់ថា ការតវ៉ារបស់អ្នកភូមិកម្ពុជា គឺជាការឆ្លើយតបត្រឹមត្រូវចំពោះការរំលោភបំពានរបស់ថៃមកលើទ្រព្យសម្បត្តិរបស់ពូកគាត់ និងដែនអធិបតេយ្យរបស់កម្ពុជា។

កាលពីថ្ងៃទី២៣ ខែកញ្ញា ឆ្នាំ២០២៥ អ្នកនាំពាក្យក្រសួងការបរទេសថៃ បានអះអាងក្នុងសន្និសីទសារព័ត៌មានថា អ្នកភូមិព្រៃចាន់កម្ពុជាបានទន្ទ្រានចូលទឹកដីថៃដើម្បីធ្វើការតវ៉ា ដែលជំរុញឱ្យប្រទេសថៃ ត្រូវអនុវត្តច្បាប់របស់គេលើអ្នកភូមិទាំងនោះ។

ប្រតិកម្មតបនឹងការចោទនេះ ក្រសួងការបរទេសកម្ពុជា បានបញ្ជាក់ថា ថៃមិនអាចទាមទារអធិបតេយ្យ ឬអនុវត្តច្បាប់ក្នុងស្រុករបស់ខ្លួនចំពោះសហគមន៍រស់នៅក្នុងតំបន់មិនទាន់មានការកំណត់ខណ្ឌសីមាព្រំដែនរួចរាល់ជាផ្លូវការនោះទេ ជាពិសេសទៀតនោះ គឺក្នុងពេលបទឈប់បាញ់ ដែលភាគីទាំងពីរបានឯកភាពរក្សាឱ្យនៅឋិតថេរ ដោយមិនធ្វើសកម្មភាពបង្កហេតុ។ ការព្រមានអនុវត្តច្បាប់ថៃទាំងខុសក្រិតក្រមមកលើប្រជាជនកម្ពុជា ក្រសួងការបរទេសថា ជារឿងគួរឱ្យបារម្ភជាខ្លាំង។

«ការតវ៉ារបស់អ្នកភូមិកម្ពុជា គឺជាការឆ្លើយតបត្រឹមត្រូវចំពោះការរំលោភបំពានលើទ្រព្យសម្បត្តិ និងផ្ទះសម្បែងរបស់ពួកគេ ជាមួយនឹងលួសបន្លាឡោមព័ទ្ធភូមិ និងរបាំងបិទផ្លូវចូលផ្ទះ និងដីស្រែចម្ការរបស់ពួកគេ»។ នេះជាការបញ្ជាក់ជាថ្មីរបស់ក្រសួងការបរទេសកម្ពុជា តាមរយៈសេចក្ដីថ្លែងការណ៍ នាថ្ងៃទី២៣ ខែកញ្ញា។

សេចក្ដីថ្លែងការណ៍ បន្តថា ការចោទប្រកាន់របស់ថៃដែលថា អ្នកភូមិព្រៃចាន់កម្ពុជាបានទន្ទ្រានចូលទឹកដីថៃធ្វើការតវ៉ា ជារឿងបំភ្លៃបំភ័ន្ត ខណៈក្រុមការងារបច្ចេកទេសនៃប្រទេសទាំងពីរបានឯកភាពលើទីតាំងបង្គោលព្រំដែនលេខ៤៣ ប៉ុន្តែមិនទាន់បានឯកភាពគ្នាលើទីតាំងបង្គោលព្រំដែនលេខា៤២ ដែលមានភូមិព្រៃចាន់ស្ថិតក្នុងចន្លោះនោះទេ។

ជាថ្មីម្ដងទៀត កម្ពុជាបានអំពាវនាវឱ្យថៃដោះស្រាយបញ្ហាតំបន់ជម្លោះនេះ តាមរយៈគណៈកម្មការព្រំដែនចម្រុះ (JBC) ប្រទេសទាំងពីរ ជាជាងការប៉ុនប៉ងអនុវត្តច្បាប់ថៃ និងទាមទារអធិបតេយ្យ រួមទាំងតាមរយៈការប្រើកម្លាំងបណ្តេញអ្នកភូមិកម្ពុជា។

បើតាមសេចក្ដីថ្លែងការណ៍ខាងលើ រាជរដ្ឋាភិបាលកម្ពុជាប្តេជ្ញាស្វែងរកដំណោះស្រាយប្រកបដោយស្មារតីមេត្រីភាពចំពោះ រាល់ទំនាស់ព្រំដែនជាមួយប្រទេសថៃ ក៏ដូចជាប្រទេសជិតខាងទាំងអស់ តាមរយៈមធ្យោបាយសន្តិវិធី ស្របទៅតាមច្បាប់អន្តរជាតិ ទន្ទឹមនឹងការប្តេជ្ញាចិត្តរក្សាជំហរជាគោលការណ៍របស់ខ្លួនថា ព្រំដែនមិនត្រូវ ផ្លាស់ប្តូរដោយកម្លាំងនោះឡើយ៕