កំពង់ផែដែកទេសចរណ៍ខេត្តកំពង់ចាម គ្រោង បើកការដ្ឋានសាងសង់អំឡុង​ខែតុលា ឆ្នាំ២០២៥

គម្រោងកែលម្អកំពង់ចម្លងចាស់នៅក្រុងកំពង់ចាម ខេត្តកំពង់ចាមឱ្យប្រែក្លាយជាកំពង់ផែទេសចរណ៍ស្តង់ដារ មានសោភ័ណភាព សមស្របសម្រាប់នាវាចូលសំចត ដោយសាងសង់ប្រើប្រាស់ថវិកាជាតិ គ្រោងបើកការដ្ឋានសាងសង់នៅថ្ងៃទី ០៣ ខែតុលា ឆ្នាំ២០២៥។ នេះបើតាមក្រសួងសាធារណការ​ និង​ដឹកជញ្ជូន។

តាមរយៈចំណតកំពង់ផែទេសចរណ៍ដែកបណ្តែតទឹកនេះ នឹងផ្តល់ប្រយោជន៍ដ៏ធំធេងដល់ខេត្តកំពង់ចាម និងបម្រើដល់ការ​តភ្ជាប់ផ្លូវនាវាចរណ៍ទៅកាន់ខេត្តតាមបណ្តោយផ្លូវទឹកនានាផងដែរ។

បើតាម​ប្រភពពី​មន្រ្តីក្រសួងសាធារណការ​និង​ដឹកជញ្ជូន​ ពិធីបើកការដ្ឋានសាងសង់កំពង់ផែដែកទេសចរណ៍ខេត្តកំពង់ចាម នឹងប្រព្រឹត្តទៅនៅថ្ងៃទី ០៣ ខែតុលា ឆ្នាំ២០២៥ ស្ថិតនៅក្រុងកំពង់ចាម ខេត្តកំពង់ចាម ដែល​នឹង​ធ្វើ​ឡើង​ក្រោមវត្តមាន​ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និង​លោក ហួត ហាក់ រដ្ឋមន្ត្រីក្រសួងទេសចរណ៍ រួមទាំងអភិបាល​ខេត្ត​កំពង់ចោម លោក អ៊ុន ចាន់ដា អភិបាល៕