អភិបាលខេត្តបាត់ដំបងណែនាំអាជ្ញាធរក្រោមឱវាទពួតដៃគ្នាទប់ស្ដាត់គ្រឿងញៀនពីសហគមន៍

ថ្លែងនៅព្រឹកថ្ងៃទី១ ខែតុលា ឆ្នាំ២០២៥ ក្នុងពេលដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តបាត់ដំបង លោក សុខ លូ បានណែនាំឱ្យអាជ្ញាធរមានសមត្ថកិច្ចក្រោមចំណុះរដ្ឋបាលខេត្តបន្តពួតដៃគ្នាបង្ការ ទប់ស្កាត់ និងបង្ក្រាបករណីគ្រឿងញៀនឱ្យបានកាន់តែសកម្មថែមទៀត។

អភិបាលខេត្តបាត់ដំបង លោក សុខ លូ និងជាប្រធានគណៈបញ្ជាការឯកភាពរដ្ឋបាលខេត្ត បានណែនាំឱ្យអាជ្ញាធរពាក់ព័ន្ធគ្រប់ផ្នែកបន្តអនុវត្តគោលនយោបាយភូមិ ឃុំ សង្កាត់មានសុវត្ថិភាព ដោយខិតខំបង្រ្កាបទប់ស្កាត់ការជួញដូរ ការដឹកជញ្ជូន និងការកែច្នៃផលិតគ្រឿងញៀន ដើម្បីលុបបំបាត់បញ្ហាគ្រឿងញៀនពីសហគមន៍ និងភ្ជាប់ជាមួយនឹងការបង្ក្រាបករណីល្បែងស៊ីសង។​

លោកអភិបាលខេត្ត បានគូសបញ្ជាក់ទៅកាន់អភិបាលក្រុង ស្រុក កងកម្លាំងប្រដាប់អាវុធ និងអាជ្ញាធរតាមមូលដ្ឋាននៃរដ្ឋបាលខេត្តបាត់ដំបង ត្រូវបន្តការងាររក្សាសន្តិសុខ និងសណ្ដាប់ធ្នាប់ជូនប្រជាពលរដ្ឋ ក្នុងភូមិសាស្ត្ររបស់ខ្លួនឱ្យបានកាន់តែល្អប្រសើរ។

ដោយបាត់ដំបង ជាខេត្តជាប់ព្រំដែន លោក សុខ លូ ក៏បានណែនាំឱ្យអាជ្ញាធរ និងគ្រប់ភាគីពាក់ព័ន្ធបន្តយកចិត្តទុកដាក់បង្ក្រាបការឆ្លងដែនមនុស្ស និងទំនិញខុសច្បាប់តាមព្រំដែន។ ខណៈការងារត្រៀមបង្ការគ្រោះមហន្តរាយ ដោយសារទឹកជំនន់ ក៏ជាការណែនាំរបស់លោកអភិបាលខេត្តទៅកាន់អាជ្ញាធរជំនាញផងដែរ ដែលត្រូវត្រៀមចាត់វិធានការឆ្លើយតបឱ្យបានទាន់ពេលវេលាក្នុងការជួយសង្គ្រោះប្រជាពលរដ្ឋ និងសង្គ្រោះផលដំណាំរបស់កសិករដែលនឹងរងផលប៉ះពាល់៕