សម្ដេចតេជោ ហ៊ុន សែន ប្រាប់កងទ័ពថា កម្ពុជាជាប្រទេសរាជានិយម ការប្រមាថព្រះមហាក្សត្រ មិនអាចអត់ឱនឲ្យបានទេ

សម្ដេចអគ្គមហាសេនាបតីតេជោ ហ៊ុន សែន នាយឧត្តមសេនីយ៍ផ្កាយមាស៥ និងជានាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាក់ថា ប្រទេសកម្ពុជា ជាប្រទេសរាជានិយម ដែលមានបាវចនា៣ គឺ ជាតិ សាសនា ព្រះមហាក្សត្រ។ ដូច្នេះហើយ នាយទាហាន ពលទាហាន ត្រូវប្ដូរផ្ដាច់ការពាររាជានិយម ការពាររាជបល្ល័ង្ក។

សម្ដេចតេជោ ហ៊ុន សែន បញ្ជាក់យ៉ាងដូច្នេះថា៖ «ស្អីឡើងប្រមាថព្រះមហាក្សត្រ ហើយកងទ័ព ខ្ញុំសូមផ្ដាំ ប្រទេសនេះ ជាប្រទេសរាជានិយម យើងមានបាវចនា៣ ជាតិ សាសនា ព្រះមហាក្សត្រ អស់លោក នាយទាហាន ពលទាហាន ត្រូវប្ដូរផ្ដាច់ការពាររាជានិយម ការពាររាជបល្ល័ង្កខាងតែបាន។ ការប្រមាថណាមួយចំពោះព្រះមហាក្សត្រ គឺមិនអាចអត់ឱនឲ្យបានទេ។ ការប៉ុនប៉ងផ្ដួលរំលំរបបរាជានិយមអាស្រ័យរដ្ឋធម្មនុញ្ញ មិនអាចអត់ឱនឲ្យបានទេ។ ការវ៉ៃបកលើខ្ញុំ គឺជាការបើកការវ៉ៃទៅរាជបល្ល័ង្គ ប៉ុន្តែសច្ចាប្រណិធានរបស់យើង យើងបានសច្ចាប្រណិធាន ការពារទឹកដី ការពាររបបរាជានិយម»។

សូមបញ្ជាក់ថា ការបញ្ជាក់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានធ្វើឡើង ខណៈសម្តេចអញ្ជើញជាអធិបតីភាពក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគាររដ្ឋបាល និងសាលប្រជុំទីស្តីការក្រសួងការពាជាតិថ្មី នៅព្រឹកថ្ងៃទី២៩ ខែធ្នូ ឆ្នាំ២០២១នេះ ដែលចំខួបលើកទី២៣ឆ្នាំ នៃជោគជ័យក្នុងការនាំមកនូវសន្តិភាពពេញលេញ តាមរយៈនយោបាយឈ្នះឈ្នះ របស់សម្តេច ( ២៩-ធ្នូ-១៩៩៨ – ២៩-ធ្នូ-២០២១)៕

អត្ថបទ ៖ កោះកែវ