លោក សម រង្ស៊ី ប្រកាសថា បានឆ្លងកូវីដ១៩ ទោះបីបានចាក់វ៉ាក់សាំងអង់គ្លេស និង​អាមេរិក៣​ដូស​ក៏​ដោយ

លោក សម រង្ស៊ី នៅយប់ថ្ងៃពុធនេះ បានចេញមកប្រកាសដោយខ្លួនឯងតាមរយៈទំព័រហ្វេសប៊ុកថា លោក​បាន​ឆ្លងជំងឺកូវីដ១៩ និងបានឈឺជំងឺនេះរយៈពេល ៥ ថ្ងៃ។ អតីតមេអតីតបក្សប្រឆាំងរូបនេះ បានដាក់ការ​សង្ស័យ​ថា ប្រហែលជាលោកបានឆ្លងជំងឺកូវីដ១៩ ប្រភេទបំប្លែងថ្មីអូមីក្រុង។

លោក សម រង្ស៊ី បានសរសេរលើទំព័រហ្វេសប៊ុកថា ទោះបីជាបានទទួលវ៉ាក់សាំង ៣ ម្ជុល (AstraZeneca ពីរម្ជុល និង Pfizer មួយម្ជុល) ក្នុងឆ្នាំ ២០២១ យ៉ាងណាក៏ដោយ ក៏លោកបានធ្វើតេស្ត ហើយ​ទទួល​បាន​លទ្ធផលវិជ្ជមានវីរុសកូវីដ១៩កាលពីថ្ងៃទី៣០ ខែធ្នូ ឆ្នាំ២០២១។ លោក សម រង្ស៊ី ថា នៅពេលនោះ លោក មានរោគសញ្ញាតិចតួច គ្រាន់តែក្អក និងឈឺបំពង់កបន្តិច រយៈពេល ២ទៅ៣ ថ្ងៃ។ មកដល់ថ្ងៃ ០៤ មករា ២០២២ លោក បានធ្វើ​តេស្តមួយទៀត ក៏បង្ហាញលទ្ធផលអវិជ្ជមាន (អស់មានផ្ទុកមេរោគទៀតទេ)។

ចំណែក នៅថ្ងៃទី ០៥ ខែមករា ឆ្នាំ២០២២ នេះ លោក សម រង្ស៊ី បានធ្វើតេស្តម្តងទៀត  ហើយ​បង្ហាញ​លទ្ធផលអវិជ្ជមានដដែល គឺមានន័យថា លោកបានជាសះស្បើយពេញលេញ។ បើតាមលោកសម រង្ស៊ី  គឺនៅក្នុងរយៈពេល ប៉ុន្មានខែចុងក្រោយនេះ នៅប្រទេសបារាំង និងនៅទូទាំងពិភពលោក មាន​មេរោគ​បំលែងខ្លួនឈ្មោះ Omicron បានរាតត្បាតយ៉ាងខ្លាំង និងយ៉ាងលឿន។ នៅប្រទេសបារាំង មានអ្នកឈឺថ្មី ពី ២០ ម៉ឺន ទៅ ៣០ ម៉ឺននាក់ ក្នុងមួយថ្ងៃ ដោយសារមេរោគបំលែង Omicron នេះ៕

អត្ថបទ ៖ វណ្ណ សុគន្ធា