គណបក្សនយោបាយ ត្រៀមខ្លួនរួចរាល់សម្រាប់ការឃោសនាបោះឆ្នោត នាពេលខាងមុខនេះ

តំណាងគណបក្សនយោបាយចំនួន ៣ បានអះអាងថា គណបក្សរបស់ខ្លួន បានត្រៀមលក្ខណៈសម្បត្តិរួចរាល់ហើយ សម្រាប់ការឃោសនាការបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥ ដែលនឹងប្រព្រឹត្តទៅចាប់ពីថ្ងៃទី ២១ ខែឧសភា ដល់ថ្ងៃទី ៣ ខែមិថុនា ឆ្នាំ ២០២២។

លោក សុខ ឥសាន អ្នកនាំពាក្យប្រជាជនកម្ពុជា មានប្រសាសន៍ប្រាប់កម្ពុជាថ្មី នៅថ្ងៃទី ២១ ខែមេសា ឆ្នាំ ២០២២ នេះថា គណបក្សប្រជាជនកម្ពុជា ដែលជាគណបក្សកាន់អំណាចបច្ចុប្បន្ននេះ បានត្រៀមខ្លួនរួចរាល់ហើយ សម្រាប់ការឃោសនាបោះឆ្នោត នាពេលខាងមុខនេះ។ លោកថា​ «ឥឡូវនេះ គឺយើងបានត្រៀមលក្ខណៈសម្ភារៈឃោសនា ក៏ដូចជាស្ពតផ្សាយតាមវិទ្យុទូរទ​ស្សន៍ ហើយអនុវត្តត្រឹមត្រូវតាមកម្មវិធីរបស់ គ.ជ.ប អត់មានឲ្យខ្វះ ចំណុចណាមួយទេ»។

លោក សុខ ឥសាន មានប្រសាសន៍បន្តថា គណបក្សប្រជាជនកម្ពុជា នឹងទទួលបានជ័យជំនះយ៉ាងធំធេងសម្រាប់ការបោះឆ្នោត នាពេលខាងមុខនេះ។ អ្នកនាំពាក្យគណបក្សប្រជាជនកម្ពុជារូបនេះ បានបញ្ជាក់ទៀតថា «យើងមិនវាយតម្លៃមុន ការសម្ដែងឆន្ទៈរបស់ប្រជាពលរដ្ឋទេ ក៏ប៉ុន្តែយើងមានសុទិដ្ឋិនិ​យមថា យើងទទួលបានជោគជ័យដ៏ធំធេង នៅក្នុងការបោះឆ្នោត នាពេលខាងមុខនេះ»។

រីឯលោក ពេជ្រ ស្រស់ ប្រធានគណបក្សយុវជនកម្ពុជា មានប្រសាសន៍ថា គណបក្សរបស់លោក បានត្រៀមខ្លួនរួចជាស្រេចហើយ ដើម្បីឃោសនាស្វែងរកសំឡេងឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥នេះ។ លោកថា «គណបក្សយុវជនកម្ពុជា បានត្រៀមគោលនយោ​បាយសំខាន់ៗ ដើម្បីឃោសនាប្រកួតប្រជែងផងដែរ ហើយសារគោលនយោបាយជាខិតប័ណ្ណ និងចម្រៀងផងដែរ»។

ជាមួយគ្នានេះលោក ពេជ្រ ស្រស់ ប្រធានគណបក្សយុវជនកម្ពុជា ក៏បានបង្ហាញក្ដីសង្ឃឹមផងដែរថា នឹងទទួលបានការគាំទ្រពីប្រជាពលរដ្ឋម្ចាស់ឆ្នោត សម្រាប់ការបោះឆ្នោតឃុំ-សង្កាត់អាណត្តិទី ៥នេះ។ លោកបន្ថែមថា «យើងមានសង្ឃឹមទទួលបានការគាំទ្រពីពលរដ្ឋ»។

ចំណែកឯគណបក្សហ៊្វុនស៊ិនប៉ិចវិញ ក៏បានត្រៀមខ្លួនរួចជាស្រេចហើយដែរ សម្រាប់ការឃោសនាបោះឆ្នោតចាប់ពីថ្ងៃទី ២១ ខែឧសភា ដល់ថ្ងៃទី ៣ ខែមិថុនាខាងមុខនេះ។ លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច បានមានប្រសាសន៍ប្រាប់កម្ពុជាថ្មីថា «គណបក្សហ៊្វុនស៊ិនប៉ិច យើងបានត្រៀមការបោះពុម្ភ អាវ មួក ខិត្តប័ណ្ណគោលនយោបាយ និងសម្ភារៈមួយចំនួន ដែលបំរើការងារដល់ការឃោសនាបោះឆ្នោត»។

លោក ញឿន រ៉ាដែន ក៏បានបង្ហាញក្ដីសង្ឃឹមដែរថា គណបក្សហ៊្វុនស៊ិនប៉ិច ដែលជាគណបក្សរាជានិយ​ម នឹងទទួលបានការគាំទ្រពីសំណាក់ប្រជាពលរដ្ឋម្ចាស់ឆ្នោត ដោយលោកសង្កត់ធ្ងន់ថា គណបក្សរប​ស់​លោក នឹងទទួលបានអាសនៈជាមេឃុំ-សង្កាត់ ឬសមាជិកក្រុមប្រឹក្សា។

សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥នេះ នឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២។ ការបោះឆ្នោតនេះ នឹងមានគណបក្សនយោបាយចំនួន ១៧ ចូលរួមប្រកួតប្រជែង៕

អត្ថបទ៖ ឃួន សុភ័ក្រ