សហរដ្ឋអាមេរិកចាត់ទុកកម្ពុជា ជា Golden Standard Cooperationក្នុងការស្វែងរក​អដ្ឋិធាតុទាហានអាមេរិក

នេះជាការលើកឡើងនៅក្នុងជំនួបពិភាក្សាការងាររវាងលោក កែវ ឈា ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជាប្រចាំសហរដ្ឋអាមេរិក ជាមួយលោក Kelly McKeague នាយកនៃភ្នាក់ងារ MIA/POW នៃក្រសួងការពារជាតិអាមេរិក ដើម្បីពិភាក្សាលើការងារមួយចំនួនពាក់ព័ន្ធនឹងការ ស្វែងរកអដ្ឋិធាតុទាហានអាមេរិកបាត់ខ្លួន  ដែលនៅសេសសល់នៅព្រះរាជាណាកច្រកកម្ពុជា កាលពីថ្ងៃព្រហស្បតិ៍ទី៣០  ខែមិថុនា ឆ្នាំ២០២២ នៅសហរដ្ឋ អាមេរិក។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ ឈា បានមានប្រសាសន៍ប្រាប់កម្ពុជាថ្មី តាមសារ Messenger នាល្ងាចថ្ងៃទី០១ ខែកក្កដា ឆ្នាំ២០២២ (ម៉ោងនៅកម្ពុជា) នេះថា នៅក្នុងជំនួបពិភាក្សានោះ លោក Kelly McKeague នាយកភ្នាក់ងារ MIA/POW នៃក្រសួងការពារជាតិអាមេរិក បានសម្តែងនូវការសប្បាយរីករាយ ដែលកម្ពុជា ជាប្រទេសមួយផ្តល់កិច្ចសហការយ៉ាង​ល្អប្រសើរ លើបញ្ហារុករកអដ្ឋិធាតុអតីតទាហាន និងកណ្ណធារ របស់ពួកគេ ដោយចាត់ទុកកម្ពុជាថា ជា “Golden Standard Cooperation” ដែលជាកិច្ចសហការល្អជាងគេបង្អស់ក្នុងចំណោមប្រទេសទាំង​៤៦ ប្រទេស ដែលភ្នាក់ងារនេះកំពុងធ្វើការ។

លោកឯកអគ្គរាជទូតបានបញ្ជាក់ថា កិច្ចពិភាក្សាម្សិលម៉ិញ គឺសំដៅរៀបចំប្រតិបត្តិការជាថ្មីបន្ទាប់ពីកូវីដ ដើម្បីរុករកអដ្ឋិធាតុទាហាន​ និងនាយកណ្ណធារ៤៨ រូបទៀត ដែលមិនទាន់រកឃើញ ហើយក្នុងនោះនៅ​សល់អដ្ឋិធាតុទាហានម៉ារីន៦ នាក់ទៀតនៅកោះតាង ដែលរកមិនទាន់ឃើញ។ 

លោកថា ក្រុមនេះបានធ្វើការសហការយ៉ាងជិតស្និទ្ធជាមួយគណ:កម្មការ MIA/POW របស់កម្ពុជា ដែលដឹកនាំដោយនាយឧត្តមសេនីយ ប៉ុល សារឿន៕ កោះកែវ