សន្តិសុខសង្គម

ឆេះរថយន្តព្រះចៅអធិការវត្ត ១ គ្រឿង អស់ទាំងស្រុង នៅបរិវេណវត្តអូរដា ស្រុកកំរៀង

បានផុស

៨ ខែ មុន

នៅ

ថ្ងៃសុក្រ ៧ វិច្ឆិកា ២០២៥

ដោយ

រថយន្តធុនត្រា ១ គ្រឿង ជាកម្មសិទ្ធិព្រះចៅអធិការវត្ត ត្រូវបានអណ្ដាតភ្លើងឆាបឆេះទាំងស្រុង តែសំណាងល្អរបស់អ្វីម្យ៉ាងក្នុងវ៉ាលិស ព្រះចៅអធិការ និងកូនសិស្ស ព្យាយាមគាស់គូទរថយន្តយកចេញបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ នៃគ្រោះអគ្គិភ័យនេះបានកើតឡើងកាលពីវេលាម៉ោង ៩ និង ០០ នាទីព្រឹក ថ្ងៃទី ៦ ខែវិច្ឆិកា ឆ្នាំ ២០២៥ នៅចំណុចបរិវេណ វត្តអូរដា ភូមិអូរគគី ឃុំអូរដា ស្រុកកំរៀង ខេត្តបាត់ដំបង ដោយមានអគ្គិភ័យមួយបានឆាបឆេះរថយន្ត ១ គ្រឿង ម៉ាកធុនត្រា ពាក់ស្លាកលេខ ភ្នំពេញ 2AP 9957 ដែលជាកម្មសិទ្ធិរបស់ព្រះចៅអធិការវត្ត ព្រះនាម ជុំ ប៊ុនណាត មានព្រះជន្ម ៣៥ ព្រះវស្សា រស់នៅភូមិកើតហេតុខាងលើ។

តាមការពិនិត្យរបស់សមត្ថកិច្ចបានបញ្ជាក់ថា ការឆេះរថយន្ត ១ គ្រឿងនេះ បានបាត់បង់អត្តសញ្ញាណប័ណ្ណ ឯកសាររថយន្ត ១ ច្បាប់ និង ប្រាក់ប្រហែល ៥០០ ដុល្លារ ហើយចំពោះមូលហេតុ គឺ ឆ្លងប្រព័ន្ធភ្លើង ទើបបណ្ដាលឲ្យមានការឆាបឆេះ។ ភ្លាមៗ នោះដែរ កម្លាំងជំនាញស្រុក បានចេញរថយន្តពន្លត់អគ្គិភ័យចំនួន ១ គ្រឿង ដើម្បីជួយអន្តរាគមន៍ ប៉ុន្តែទោះជាយ៉ាងណាក្តី ក៏រថយន្តនេះត្រូវបានអគ្គិភ័យលេបត្របាក់ខ្ទេចគ្មានសល់ដែរ។

ដោយឡែកតាមប្រភពឃើញហេតុការណ៍ផ្ទាល់ភ្នែកបានបញ្ជាក់ដែរថា នៅពេលអណ្ដាតភ្លើងចាប់ផ្ដើមឆាបឆេះទៅលើក្បាលរថយន្ត ពេលនោះព្រះចៅអធិការវត្ត រួមជាមួយនឹងកូនសិស្សម្នាក់ បានប្រើដែក និងត្រសេះ គាស់គូទរថយន្ត ដើម្បីទាញយកវ៉ាលិស ដែលគេសង្ស័យថាជារបស់មានតម្លៃអ្វីម្យ៉ាងនៅក្នុងនោះ ហើយនិមន្តយ៉ាងលឿនចូលទៅក្នុងកុដិបាត់តែម្ដង ដោយទុកឲ្យតួរថយន្តទាំងមូលហ៊ុមព័ទ្ធដោយអណ្ដាតភ្លើងយ៉ាងសន្ធោសន្ធៅ រហូតខ្ទេចក្លាយជាផេះ៕

អត្ថបទ ៖ សោ និយមរ័ត្ន