នគរបាលរាជធានី សហការជាមួយនគរបាលខេត្តតាកែវ បង្ក្រាបក្រុមកាប់ប្លន់៤នាក់ ក្នុងនោះមានមុខសញ្ញាចាស់ម្នាក់

កម្លាំងជំនាញការិយាល័យនគរព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាលខណ្ឌមានជ័យ នគរបាលខណ្ឌដង្កោ និងកម្លាំងនគរបាលនៃស្នងការដ្ឋាននគរបាលខេត្តតាកែវ បានស្រាវជ្រាវបង្ក្រាប និងឃាត់ខ្លួនក្រុមជនសង្ស័យកាប់ប្លន់សរុប៤នាក់ ក្រោយពីធ្វើសកម្មភាពកាប់ប្លន់ម៉ូតូជនរងគ្រោះបានសម្រេចក្នុងមូលដ្ឋានខណ្ឌមានជ័យ។

ប្រតិបត្តិការបង្ក្រាបនេះធ្វើឡើងកាលពីវេលាម៉ោង១០និង០០នាទី ថ្ងៃទី១៦ ខែវិច្ឆិកា ឆ្នាំ២០២៥ ដោយរកឃើញម៉ូតូចំនួន៣គ្រឿង។ ជនសង្ស័យដែលឃាត់ខ្លួនមានឈ្មោះ នួន ធាន ភេទប្រុស អាយុ២៧ឆ្នាំ ជាមុខសញ្ញាចាស់ទើបនឹងចេញពីពន្ធនាគារ។ ឈ្មោះ វិន ចាន់ខា ភេទប្រុស អាយុ២៦ឆ្នាំ។ ឈ្មោះ មិន ចាន់ឬទ្ធី ភេទប្រុស អាយុ៣៩ឆ្នាំ។ និងឈ្មោះ មាច ថាវរុន ភេទ ប្រុស អាយុ៣៤ឆ្នាំ។

បើតាមសមត្ថកិច្ច ក្រុមជនសង្ស័យបានធ្វើសកម្មភាពកាប់ប្លន់ម៉ូតូជនរងគ្រោះកាលពីវេលាម៉ោងប្រហែល ៣និង៤៣នាទីទាបភ្លឺ ថ្ងៃទី១៥ ខែវិច្ឆិកា ឆ្នាំ២០២៥ នៅចំណុចផ្លូវបេតុង សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ។

បច្ចុប្បន្ន ក្រុមជនសង្ស័យត្រូវបានបញ្ជូនមកការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿងអនុវត្តនិតិវិធីច្បាប់៕