នគរបាលព្រហ្មទណ្ឌថា បានប្រកាន់ខ្ជាប់ក្រមសីលធម៌ វិជ្ជាជីវៈ ជាពិសេសលើស្ត្រី ក្នុងការបង្ក្រាបករណីរំដោះអ្នកទោសនៅស្វាយរៀង  

នាយកដ្ឋាននគរបាលព្រហ្មទណ្ឌ នៃអគ្គស្នងការនគរបាលជាតិ បាន​ច្រាលចោលចំពោះការចោទប្រកាន់ថាកងកម្លាំងរបស់ខ្លួន បានធ្វើសកម្មភាពប្រាសចាកក្រមសីលធម៌វិជ្ជាជីវៈ បៀតបៀនអង្អែលថ្ពាល់ស្ត្រី ក្នុងប្រតិបត្តិការបង្ក្រាបករណីរំដោះអ្នកទោសនៅខេត្តស្វាយរៀង។ នាយកដ្ឋាននគរបាលព្រហ្មទណ្ឌអះអាងថា កងកម្លាំងរបស់ខ្លួន បានគោរពយ៉ាងខ្ជាប់ខ្ជួនចំពោះក្រមសីលធម៌វិជ្ជាជីវៈ វិន័យកងកម្លាំង ពិសេសលើស្ត្រី។

នាយកដ្ឋាននគរបាលព្រហ្មទណ្ឌ បញ្ជាក់ក្នុងសេចក្ដីបំភ្លឺផ្សាយលើទំព័រហ្វេសប៊ុក នាថ្ងៃទី១៩ ខែវិច្ឆិកា ថា បន្ទាប់ពីចាប់ខ្លួនបានអ្នកទោសដែលត្រូវរំដោះចេញពីសាលាដំបូងខេត្តស្វាយរៀងចំនួន៦នាក់ និងស្ដ្រីដែលចូលទៅរំដោះម្នាក់ នៅក្នុងភូមិសាស្ត្រស្រុកស្វាយទាប ខេត្តស្វាយរៀង កម្លាំងជំនាញបានរៀបចំបញ្ជូនឧក្រិដ្ឋនទាំងអស់នោះ រួមទាំងស្ដ្រីដែលមករំដោះឡើងលើរថយន្ដ ដើម្បីបន្ដសួរនាំតាមនីតិវិជី។ ប៉ុន្ដែនៅពេលបញ្ជូនឡើងដល់លើរថយន្ដ ក៏មានអ្នកសារព័ត៌មានថត ហើយលូកដៃទៅប៉ះពាល់មុខស្ដ្រីខាងលើ ហើយប្រើពាក្យសម្ដីមិនសមរម្យ។

នាយកដ្ឋាននគរបាលព្រហ្មទណ្ឌ សង្កត់ធ្ងន់ដូច្នេះ៖« អ្នកដែលលូកដៃទៅប៉ះពាល់មុខស្ដ្រីដែលយកទៅកាំភ្លើង ហុចឲ្យជនល្មើសដើម្បីរំដោះខ្លួនចេញទៅសាលាដំបូងខេត្តស្វាយរៀងនោះ មិនមែនជាមន្ដ្រីនគរបាលនោះទេ។ ក្នុងរង្វង់ប្រតិបត្តិការកម្លាំងនគរបាលជំនាញ តែងប្រកាន់ខ្ជាប់នូវក្រមសីលធម៌ វិជ្ជាជីវៈ បទវិន័យនគរបាលជាតិ ពិសេសចំពោះជនល្មើសជាស្ដ្រីភេទ។»។

នាយកដ្ឋាននគរបាលព្រហ្មទណ្ឌ រំពឹងថា អ្នកប្រើប្រាស់បណ្ដាញសង្គមទាំងអស់ នឹងបញ្ចេញមតិលើករណីនេះប្រកបដោយក្រមសីលធម៌ មិនចោទប្រកាន់មកលើកម្លាំងនគរបាល ដែលយកជីវិតទៅប្ដូរដើម្បីតាមចាប់ខ្លួនក្រុមឧក្រិដ្ឋជន។

គួរជម្រាបថា អ្នកសារព័ត៌មាន ដែលបានយកដៃទៅអង្អែលថ្ពាល់ និងប្រើសម្ដីបៀតបៀនស្ត្រីជាជនសង្ស័យ គឺមានឈ្មោះថា ខាន់ សារ័ត្ន ជាអ្នកសារព័ត៌មាន នៃអង្គភាពក្ដាមក្រហម នៅខេត្តស្វាយរៀង។ ក្រសួងព័ត៌មាន បានចាត់វិធានការបន្ទាន់លើបុគ្គលនេះ ដោយបានលុបចោលសុពលភាពនៃបណ្ណសម្គាល់ខ្លួនអ្នកសារព័ត៌មាន និងដាក់ឈ្មោះនេះទៅក្នុងបញ្ជីហាមធ្វើសកម្មភាព អាជីវកម្ម ពាក់ព័ន្ធវិស័យព័ត៌មាន និងសោតទស្សន៍ បន្ទាប់ពីរកឃើញថា ទង្វើរបស់បុគ្គលនេះ ជាទង្វើអសីលធម៌ និងរំលោភបំពានយ៉ាងធ្ងន់ធ្ងរមកលើធម្មនុញ្ញវិជ្ជាជីវៈសារព័ត៌មាន ដែលហាមឃាត់មិនឱ្យអ្នកសារព័ត៌មានប្រើប្រាស់ពាក្យសម្ដី និងបៀតបៀនរូបរាងកាយរបស់ស្ត្រីឡើយ។

កាលពីព្រឹកថ្ងៃទី១៩​ ខែវិច្ឆិកា នេះ មន្ត្រីជំនាញនៃក្រសួងព័ត៌មាន បានចុះទៅដល់មន្ទីរព័ត៌មានខេត្តស្វាយរៀង ហើយបានកោះហៅ អ្នកសារព័ត៌មាន ផាត់ ហ៊ន និងបុគ្គល ខាត់ សារ័ត្ន មកណែនាំ និងអនុវត្តវិធានការស្របតាមលិខិតបទដ្ឋានគតិយុត្ត និងច្បាប់ជាធរមាន។

បន្ទាប់ពីចប់នីតិវិធីរបស់ក្រសួងព័ត៌មានទៅ នៅវេលាថ្ងៃត្រង់ សមត្ថកិច្ច​នគរបាល​ខេត្ត​ស្វាយរៀង​នាំយកឈ្មោះ​ ផាត់​ ហ៊ន​ និង​ ឈ្មោះ​ ខាត់​ សារ័ត្ន​ ត្រូវបាន​ ទៅ​សាកសួរបន្ត​នៅ​ការិយាល័យ​ព្រហ្មទណ្ឌ​កម្រិតស្រាលបន្ថែមទៀត៕

ដោយ៖ ង៉ិល ណារ៉ាត់