អាវុធហត្ថខេត្តតាកែវសហការជាមួយអាវុធហត្ថលើផ្ទៃប្រទេស ស្រាវជ្រាវបង្ក្រាបក្រុមគ្រឿងញៀន​១១នាក់ រឹបអូសថ្នាំញៀន និងសម្ភារៈមួយចំនួន

កម្លាំងមន្ទីរស្រាវជ្រាវ និងបង្រ្កាបបទល្មើស នៃមូលដ្ឋានកងរាជអាវុធហត្ថខេត្តតាកែវ​ សហការជាមួយកម្លាំងកងរាជអាវុធហត្ថលើផ្ទៃប្រទេស និងកងរាជអាវុធហត្ថរាជធានីភ្នំពេញ ស្រាវជ្រាវ និងបង្ក្រាបក្រុមជនសង្ស័យប្រើប្រាស់ និងចែកចាយគ្រឿងញៀនសរុប១១នាក់ និងរឹបអូសថ្នាំញៀន និងសម្ភារៈប្រើប្រាស់វេចខ្ចប់មួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍របស់មូលដ្ឋានកងរាជអាវុធហត្ថខេត្តតាកែវ ប្រតិបត្តិការបង្ក្រាបនេះធ្វើឡើងកាលពីថ្ងៃទី៣១ ខែធ្នូ ឆ្នាំ២០២៥ នៅពីរគោលដៅផ្សេងគ្នា ទី១ នៅចំណុចផ្ទះសំណាក់យីហោរ លីហ៊ួរ ស្ថិតនៅភូមិស្នោ សង្កាត់រកាក្នុង ក្រុងដូនកែវ ខេត្តតាកែវ និងគោលដៅទី២នៅចំណុចក្នុងផ្ទះសំណាក់យីហោរ ប៉ារ៉ាឌី ស្ថិតនៅភូមិថ្នល់បំបែក សង្កាត់ចោមចៅបី ខណ្ឌពោធិ៍សែនជ័យ រាជធានីភ្នំពេញ។

ក្នុងប្រតិបត្តិការបង្ក្រាប កម្លាំងជំនាញបានរកឃើញវត្ថុតាង ម្សៅក្រាមពណ៌សថ្លា ចំនួន ០៧កញ្ចប់(ធំ៣) ទម្ងន់ ៣២៥.៤៤ក្រាម (ថ្លឹងទាំងសំបកថង់) ជញ្ជីងថ្លឹងថ្នាំញៀនចំនួន ០១គ្រឿង ម៉ូតូចំនួន ០៤គ្រឿង ទូរស័ព្ទ ចំនួន១២គ្រឿង និងថង់វេចខ្ចប់ថ្នាំញៀនមួយចំនួន។ ជនសង្ស័យ រួមទាំងវត្ថុតាង ត្រូវបានកម្លាំងការិយាល័យជំនាញ កំពុងកសាងសំណុំរឿងបញ្ជូនទៅសាលាដំបូងខេត្តតាកែវ ដើម្បីចាត់ការវិធានការតាមនីតិវិធីច្បាប់៕