នគរបាលខេត្តស្វាយរៀង បង្ក្រាបករណីជួញដូរគ្រឿងញៀនឆ្លងដែន រឹបអូសថ្នាំញៀន២៤ គីឡូក្រាម

កម្លាំងជំនាញការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តស្វាយរៀង សហការជាមួយកម្លាំងអធិការដ្ឋាននគរបាលក្រុងបាវិត និងកម្លាំងប៉ុស្តិ៍នគរបាលរដ្ឋបាលសង្កាត់បាវិត បានបង្ក្រាបករណីជួញដូរគ្រឿងញៀនឆ្លងដែនខុសច្បាប់ ឃាត់ខ្លួនជនសង្ស័យប្រុសស្រីជាជនជាតិវៀតណាម២នាក់ និងរឹបអូសបានថ្នាំញៀនសរុប២៤គីឡូក្រាម។ បើតាមរបាយការណ៍របស់ស្នងការដ្ឋាននគរបាលខេត្តស្វាយរៀង ជនសង្ស័យត្រូវបានកម្លាំងជំនាញកសាងសំណុំរឿងតាមនីតិវិធី បញ្ជូនទៅសាលាដំបូងខេត្ត ហើយក៏ត្រូវបានសាលាដំបូងខេត្ត ចេញដីកាឲ្យឃុំខ្លួនដាក់ពន្ធនាគាររួចហើយដែរ កាលពីថ្ងៃទី២០ ខែកុម្ភៈ ឆ្នាំ២០២៦កន្លងទៅ។

ជនសង្ស័យដែលឃាត់ខ្លួនក្នុងប្រតិបត្តិការនេះ មានឈ្មោះ ឡេ វាំងហ៊ីវ ភេទប្រុស អាយុ ៣១ឆ្នាំ មុខរបរមិនពិតប្រាកដ មានស្រុកកំណើតស្រុកហុងងឺ ខេត្តដុងថាប់ ប្រេទេសវៀតណាម។ ធ្វើតេស្តទឹកម៉ូត្រស្វែងរកសារធាតុញៀនវិជ្ជមាន (+) ជាប្រភេទកេតាមីន និងឈ្មោះ ឡេ វឹកវឹង ភេទស្រី អាយុ ៣១ឆ្នាំ មុខរបរមិនពិតប្រាកដ មានស្រុកកំណើតខេត្តតៃនិញ ប្រទេសវៀតណាម។ ធ្វើតេស្តទឹកម៉ូត្រស្វែងរកសារធាតុញៀនវិជ្ជមាន (+)ជាប្រភេទកេតាមីន។

ក្នុងប្រតិបត្តិការបង្ក្រាប កម្លាំងជំនាញបានរកឃើញ ថ្នាំញៀនកញ្ចប់ចម្រុះចំនួន ២៤ដុំ ស្មើនឹង ២៤គីឡូក្រាម ក្នុងនោះមាន ម្ស៉ៅក្រាមពណ៌សថ្លា សង្ស័យថ្នាំញៀន១ កញ្ចប់, ម្សៅម៉ត់ពណ៍ស សង្ស័យជាថ្នាំញៀន ២កញ្ចប់, ថ្នាំញៀនកញ្ចប់ពណ៌ ខៀវ ១កញ្ចប់, ថ្នាំញៀនកញ្ចប់ពណ៌មាស(រូបប៉ាវ៉ាន់ណូ) ចំនួន ៦២កញ្ចប់, ទូរសព្ទដៃ ៣គ្រឿង, ម៉ូតូ ៤គ្រឿង។

បើតាមរបាយការណ៍ ប្រតិបត្តិការបង្ក្រាបនេះ ធ្វើឡើងកាលពីថ្ងៃទី១៤ ខែកុម្ភៈ ឆ្នាំ២០២៦ វេលាម៉ោង១៦និង៣០នាទី នៅចំណុចបន្ទប់លេខ៣៥១ សណ្ឋាគារណារីស្វីត ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង៕