​តាប៊ុយ​ រង​បណ្ដឹង​ពីម្ចាស់រថយន្ត​ព្រុស​ ៣ បទល្មើស​ និងទារ​សំណង​ជំងឺចិត្ត​ ១០ ម៉ឺនដុល្លារ​

ម្ចាស់រថយន្តព្រុស នៅថ្ងៃទី ២០ ខែធ្នូ ឆ្នាំ ២០២១ បានដាក់ពាក្យបណ្ដឹងទៅ​សាលាដំបូង​រាជធានី​ភ្នំពេញ ប្ដឹងលោក ឃី ហុង ហៅតាប៊ុយ ចំនួន ៣ បទល្មើស និងទាមទារសំណងជំងឺចិត្តចំនួន ១០ ម៉ឺន​ដុល្លារ។

កាលពីយប់រំលងអធ្រាត្រ ឈានចូលថ្ងៃទី ១៤ ខែធ្នូ ឆ្នាំ ២០២១ មានករណីគ្រោះថ្នាក់ចរាចរណ៍ បាន​កើតឡើង ដោយលោក តាប៊ុយ បានបើករថយន្ត Range Rover ក្នុងស្ថានភាពស្រវឹង ទៅបុករថយន្តម៉ាកព្រុស ពណ៌ស ពីក្រោយពេញទំហឹងលើមហាវិថីសហព័ន្ធរុស្សី ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ក្រោយកើតហេតុ ភាគីទាំងពីរបានសម្រុះសម្រួលគ្នា ដោយភាគីតាប៊ុយ សន្យាចេញថ្លៃជួសជុលរថយន្តជូនភាគីរងគ្រោះ។ នៅថ្ងៃបន្ទាប់ ភាគីរងគ្រោះ បានបង្ហាញវិក័យបត្រថ្លៃជួសជុលរថយន្តនូវទឹកប្រាក់ចំនួន ២ ២៥០ដុល្លារ បែរជាតាប៊ុយ បដិសេធមិនព្រមទទួលខុសត្រូវចេញថ្លៃជួសជុល ដោយចោទថាជាតម្លៃថ្លៃហួសហេតុ។ ប្រតិកម្មនេះ ធ្វើឱ្យម្ចាស់រថយន្តខឹងសម្បារ និងដាក់ពាក្យប្ដឹងទៅតុលាការ។

តាមពាក្យបណ្តឹងមានលោកមេធាវី ហ៊ុយ មាំង តំណាងឱ្យជនរងគ្រោះរៀបរាប់ថា មុនពេលកើតហេតុ តាប៊ុយ បានបើក​ដេញពីក្រោយដោយស៊ីផ្លេ និងបើកភ្លើងហ្វាកូតចុះឡើង១ នឹងបើកមកកៀកនឹងរថយន្តជនរងគ្រោះ ហើយធ្វើសកម្មភាពបើកកញ្ចក់ ស្រែកជេរ និងគំរាមសម្លាប់ជាច្រើនសារនៅតាមផ្លូវ ដោយមិនដឹងមូលហេតុ។

នៅក្នុងពាក្យបណ្តឹងបន្តថា ឃើញសភាពបែបនោះជនរងគ្រោះ បានព្យាយាមបើករថយន្តគេចចេញពីជនល្មើស ប៉ុន្តែមិនអាចគេចបានឡើយ សកម្មភាពនោះរហូតដល់កន្លែងកើតហេតុ ដោយជនរងគ្រោះសម្រេចចិត្តឈប់រថយន្ត និងរត់ចេញពីរថយន្តខ្លាចមានគ្រោះថ្នាក់ដល់ជីវិត ស្រាប់តែជនល្មើសបានបើកឡានបុករថយន្តជនរងគ្រោះពីក្រោយទាំងកំរោល។ ក្រោយបុករួចជនល្មើសនោះបានបើកកញ្ចក់ និងបានស្រែកជេរប្រមាថ ព្រមទាំងគំរាមសម្លាប់មកលើជនរងគ្រោះម្តងទៀត។

នៅក្នុងពាក្យបណ្តឹងបានរៀបរាប់បន្តថា ក្រោយធ្វើសកម្មភាពរួចជនល្មើសបានបើកឡានរត់គេចចេញពីកន្លែងកើតហេតុ នៅពេលនោះជនរងគ្រោះ បានបើករថយន្តដេញតាមពីក្រោយរហូតស្កាត់ឃាត់ឡានជនល្មើស នៅលើមហាវិថីសហព័ន្ធរុស្ស៉ី ជាប់របងអាយស្ម័យយាន្ត។ នៅពេលនោះជនល្មើសបានចុះពីលើឡាន ដោយមានសភាពស្រវឹងជោកជាំ ទន់ដៃទន់ជើងនិយាយ​មិនដឹងខុសមិនដឹងត្រូវ។

ជនរងគ្រោះបានប្ដឹង តាប៊ុយ ចំនួន ៣ បទល្មើសរួមមាន បើកបរបង្កឱ្យមានគ្រោះថ្នាក់ដល់អ្នកដទៃ បើកបរក្នុងស្ថានភាពស្រវឹង និងបទបរិហារកេរ្តិ៍។ ជនរងគ្រោះបានប្តឹងទារសំណងជំងឺចិត្តចំនួន ១០ម៉ឺនដុល្លារ ហើយយកថវិកានេះ ទៅបរិច្ចាគជូនមន្ទីរពេ្យគន្ធបុប្ផា៕