សន្តិសុខសង្គម

ចាប់ខ្លួនក្រុមចោរប្លន់ពីរនាក់ ក្រោយប្លន់ម៉ូតូអ្នករត់ម៉ូតូឌុបបានសម្រេច

បានផុស

៤ years មុន

នៅ

ថ្ងៃចន្ទ ៣១ មករា ២០២២

ដោយ

កម្លាំងនគរបាល នៃអធិការដ្ឋាននគរបាលក្រុងប៉ោយប៉ែត ខេត្តបន្ទាយមានជ័យ ធ្វើការស្រាវជ្រាវឃាត់ខ្លួនជនសង្ស័យជាក្រុមចោរប្លន់ពីរនាក់ បន្ទាប់ពីធ្វើសកម្មភាពរឹតក និងវាយអ្នករត់ម៉ូតូឌុបប្លន់យកម៉ូតូបានសម្រេច។

ការឃាត់ខ្លួននេះបានធ្វើឡើងការពីវេលាម៉ោង២២និង០០នាទីយប់ ថ្ងៃទី២៩ ខែមករា ឆ្នាំ២០២២ នៅ ចំណុចខារ៉ាអូខេ អគារថ្មី ស្ថិតក្នុងភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនមានទី១ ឈ្មោះ សុក សុវណ្ណ ហៅមិត ភេទប្រុស អាយុ១៨ឆ្នាំ ជនជាតិខ្មែរ មុខរបរកម្មករ។ ទី២ ឈ្មោះ ឡៅ ចិនឡុង ភេទប្រុស អាយុ២២ឆ្នាំ ជនជាតិខ្មែរ មុខរបរកម្មករ។ ទាំងពីរនាក់ស្នាក់នៅភូមិនិមិត្ត៣ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ ចំណែកជនរងគ្រោះមានឈ្មោះ ហង្ស កក្កដា ភេទប្រុស អាយុ៤១ឆ្នាំ មុខរបររត់ម៉ូតូឌុប ជិះម៉ូតូម៉ាកសង់ពណ៌ខ្មៅ ស៊េរីឆ្នាំ២០១៦ ផ្លាកលេខ បន្ទាយមានជ័យ 1P-5436។ រស់នៅភូមិក្បាលស្ពាន០១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

ជនរងគ្រោះបានរៀបរាប់ថា កាលពីវេលាម៉ោង២០និង២០នាទីយប់ថ្ងៃកើតហេតុ ជនសងស្ស័យទាំងពីរនាក់បានឲ្យជនរងគ្រោះដឹកចេញពីផ្លូវដើមពុទ្រាមកដីថ្មី លុះពេលជនរងគ្រោះដឹកដល់កន្លែងកើតហេតុ ក៏ធ្វើសកម្មភាពយកខ្សែមករិត ក និងវាយទៅលើជនរងគ្រោះបណ្តាលជាំភ្នែកម្ខាង ហើយភ្លាមៗនោះ ជនរងគ្រោះក៏ប្រតាយប្រតប់ទាញបានអាវក្រៅជនល្មើសបានមួយ ហើយជនល្មើសក៏ឡើងជិះម៉ូតូរបស់ជនរងគ្រោះចេញពីកន្លែងកើតហេតុ ដោយជនរងគ្រោះរត់តាមស្រែកថា ចោរៗ ដើម្បីអោយគេជួយ និងមានអ្នកជិតខាងនាំគ្នាតាមដែរតែតាមមិនទាន់ ។

សមត្ថកិច្ចបានឲ្យដឹងថា បន្ទាប់ពីទទួលបានពាក្យបណ្ដឹងពីជនរងគ្រោះ កម្លាំងជំនាញបានសហការណ៍ជាមួយកម្លាំងប៉ុស្តិ៍នគរបាលផ្សារកណ្ដាល និងកម្លាំងប៉ុស្តិ៍នគរបាលប៉ោយប៉ែត ធ្វើការស្រាវជ្រាវស៊ើបអង្កេតស្វែងរកជនសង្ស័យរហូតដល់ម៉ោង២២និង០០នាទីយប់ ទើបឃាត់បានជនសង្ស័យ ទាំងពីរនាក់ និងបានដកហូតម៉ូតូរបស់ជនរងគ្រោះមកវិញនៅចំណុចខារ៉ាអូខេ អគារថ្មី ស្ថិតក្នុងភូមិ អូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។

បន្ទាប់ពីឃាត់ខ្លួន ជនសង្ស័យត្រូវបានកម្លាំងជំនាញកសាងសំណុំរឿងបញ្ជូនបន្ត ដើម្បីអនុវត្តន៍តាមនីតិវិធី៕

អត្ថបទ៖ សុខុម

Related Topics:ករណីចោរកម្ម