អតីតស្វាមី​មាន​គុំជាមួយ​ប្រពន្ធ​រៀបចំគម្រោង​ប្រើសាំង​ដុតផ្ទះ​ប៉ុនប៉ង​សម្លាប់​ទាំង​គ្រួសារ

បុរសម្នាក់ ប៉ុនប៉ងសម្លាប់អតីតគ្រួសាររបស់ខ្លួន ក្រោយពេលលែងលះគ្នាបានជិត១ឆ្នាំហើយ មានគំនុំដោយបានយកសាំងចំនួន ៣ ដបទឹកសុទ្ធ ទៅដុតផ្ទះ ខណៈឪពុកក្មេក និងម្ដាយក្មេករបស់ខ្លួនកំពុងនៅក្នុងផ្ទះ។

ហេតុការណ៍នេះ បានកើតឡើងនៅវេលាម៉ោង ៧ យប់ថ្ងៃទី ១៨ ខែមីនា ឆ្នាំ ២០២២ នៅចំណុចភូមិវត្តចាស់ ឃុំថ្មពួក ស្រុកថ្មពួក ខេត្តបន្ទាយមានជ័យ។

សមត្ថកិច្ចឱ្យដឹងថា បុរសជនសង្ស័យ មានឈ្មោះ រីក ទូរី អាយុ៣៩ឆ្នាំ នៅភូមិថ្នល់ដាច់ ឃុំថ្មពួក ស្រុកថ្មពួក បុរសនេះតែងតែប៉ុនប៉ង ថានិងសម្លាប់ ឪពុក ម្តាយក្មេក និងប្រពន្ធជារឿយៗដោយសាររឿងគំនុំ។

លោកអធិការដ្ឋាននគរបាលស្រុកថ្មពួកបានប្រាប់ឲ្យដឹងបន្តថា ពេលកើតហេតុ យាយ​និង​តានិងកូនបាននៅក្នុងផ្ទះពេលយប់​មិនបានចេញទៅណាទេពេល​នោះជនសង្ស័យ​បានយកសាំងចំនួន ៣ដបទឹកសុទ្ធចន្លុះ១ដើម ដែកកេះចំនួន១ សំរាប់ដុត និងបន្ទះក្ដារ ឈើមូល១កំណាត់ប្រវែងកន្លះម៉ែត្របានទៅដុតផ្ទះយាយ តា ដែលកំពុងនៅផ្ទះស្រប​ពេល​នោះយាយតា បានចេញមកប្រតាយប្រតប់ ជាមួយជនសង្ស័យ ពេញទំហឹង ដោយកំលាំង​ខ្សោយ​នាំគ្នារត់ចូលទៅបន្ទប់ក្នុងផ្ទះបិទទ្វារ ឯជនបង្ករលោតធាក់ទ្វារ និងជញ្ជាំងផ្ទះ ហើយ​បានយក​សាំង​ចំនួនមួយដបទឹកសុទ្ធចាក់ស្រោចទៅលើជញ្ជាំងផ្ទះ ដោយស្រែកគំរាមថានឹងដុតសម្លាប់​ទាំង​អស់ តែមិនបានសំរេច ដោយសារកូន និងអ្នកជិតខាងទៅជួយឃាត់ និងចាប់ឃាត់ជនសង្ស័យ​ប្រគល់​ទៅឲ្យសមត្ថកិច្ច។

ជនរងគ្រោះមានឈ្មោះ ជួប លាភ ភេទប្រុស អាយុ៦៩ឆ្នាំ រស់នៅចំណុចភូមិវត្តចាស់ ឃុំថ្មពួក ស្រុកថ្មពួក ខេត្តបន្ទាយមានជ័យ។

ជនសង្ស័យត្រូវបានកម្លាំងអធិការដ្ឋាននគរបាលស្រុកថ្មពួបញ្ជូនមកស្នងការនគរបាលខេត្តបន្ទាយមានជ័យ និងរៀបចំសំណុំរឿងបញ្ជូនទៅតុលាការដើម្បីដាក់ទោសតាមនីតិវិធីច្បាប់៕

អត្ថបទ៖ វ៉ាន់ ណាង