ជនសង្ស័យ​លួចលុយម្ដាយធម៌​ជាង ៣ ម៉ឺនដុល្លារ ​ត្រូវសមត្ថកិច្ចចាប់ខ្លួន​បញ្ជូន​ទៅតុលាការ​

បុរសជនសង្ស័យ​ពីរនាក់​ត្រូវបានសមត្ថកិច្ចអាវុធហត្ថវាយខ្នោះ ​​បញ្ជូន​មកតុលាការនៅព្រឹកថ្ងៃទី ២១ ខែមិថុនា ​ជាប់ពាក់ព័ន្ធ និងករណីលួចលុយម៉ែធម៌ ៣៦ ៧៥០ ដុល្លារដែលទើបបើកចេញពីធនាគារ។

​ជនសង្ស័យ​ទី១ឈ្មោះ រៀម សុខា ហៅ ខេមរ៉ា ជាអតីតសង្ឃរស់នៅក្នុងវត្តស្ទឹងមានជ័យ។ ​​ពេលចាប់ខ្លួនសមត្ថកិច្ចបានដកហូតប្រាក់ចំនួន ២១ ០០០ ​ដុល្លារ​ជារបស់ជនរងគ្រោះ។

បុរសទី២ ឈ្មោះ ហោ សំអុល ត្រូវជាក្មួយរបស់ រៀម សុខា ពេលចាប់ខ្លួនសមត្ថកិច្ចបានដកហូត​ប្រាក់ចំនួន ១៥ ៧៥០ ដុល្លារ ជារបស់ជនរងគ្រោះ។

តាមពាក្យបណ្ដឹងរបស់ស្ត្រីជនរងគ្រោះឈ្មោះ អ៊ុក សាខន​ កាលពីថ្ងៃទី ១៧ មិថុនា ឆ្នាំ២០២២ ឈ្មោះ រៀម សុខា និងឈ្មោះ ហោ សំអុល បានលួចប្រាក់ខ្លួនចំនួន ៣៦ ៧៥០ដុល្លារ នៅភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ។ បន្ទាប់មកសមត្ថកិច្ចបានចុះទៅឃាត់ខ្លួនឈ្មោះ រៀម សុខា នៅផ្ទះកើតហេតុតែម្ដង ហើយដកហូត​លុយបានចំនួន ២១ ០០០ដុល្លារ។

សមត្ថកិច្ចបានបន្តទៅចាប់ខ្លួនឈ្មោះ ហោ សំអុល នៅភូមិឈ្នះជ័យ ស្រុកព្រះស្ដេច ខេត្តព្រៃវែង ហើយដកហូតលុយមកវិញចំនួន ១៥ ៧៥០ ដុល្លារ។

ទាក់ទិននិងអំពើលួចប្រាក់ម៉ែធម៌ខាងលើ ឈ្មោះ រៀម សុខា បានឆ្លើយសារភាពថា ខ្លួនបាន​ស្គាល់លោកស្រី អ៊ុក សាខន និងប្ដីដែលរស់នៅប្រទេសបារាំង​ក្នុងពេលដែលខ្លួន​បានទៅ​សូត្រមន្ត​កាលខ្លួនជាសង្ឃ ហើយក៏បានរាប់អានគ្នាជាកូនធ៌ម ម៉ែធ័មរហូតមក ហើយកាលពីថ្ងៃទី ១៦មិថុនា ឆ្នាំ២០២២ ម៉ែធ៌មបានប្រើខ្លួនឱ្យទៅបើកលុយពីធនាគារចំនួន ៣៦ ៧៥០ ដុល្លារ ដែលផ្ញើពីបរទេស​មកឱ្យ។ ​

ពេលមកដល់ផ្ទះក៏រាប់លុយជាមួយម៉ែធម៌ទុកដាក់រួចក៏ចេញដំណើរទៅខេត្តកំពង់ស្ពឺយកកាតវ៉ាក់សាំង ហើយខ្លួនចាក់សោរទ្វារមុខ មិនចាក់សោរទ្វារក្រោយទេ ហើយក្នុងពេលរាប់លុយនោះ ខ្លួនបាន​ថតរូបភាព​កន្លែងទុកលុយ បន្ទប់ និងផ្លូវចូលខាងក្រោយផ្ញើឱ្យឈ្មោះ ហោ សំអុល ដើម្បីចូលលួច។

លុះដល់ពេលល្ងាចត្រឡប់មកវិញ ឈ្មោះហោ សំអុល បានទូរស័ព្ទប្រាប់ថា លួចបានជោគ​ជ័យហើយ។ បន្ទាប់មកខ្លួនបានទៅជួបហោ សំអុល ដកយកប្រាក់ ២១ ០០០ ដុល្លារ នៅសល់​ប៉ុន្មានប្រគល់ឱ្យ ហោ សំអុល ហើយក៏បែកផ្លូវគ្នាទៅ លុះដល់ថ្ងៃទី១៨មិថុនា ក៏ត្រូវសមត្ថកិច្ចឃាត់​ខ្លួនតែម្ដង៕

អត្ថបទ៖ មករា