គោយន្តន្ត្រៃ​រអិលធ្លាក់​ពីវត្តភ្នំកងវ៉ា​បណ្ដាលឲ្យមនុស្ស​ ៥ នាក់រងរបួសធ្ងន់ស្រាល

យ៉ាងហោចណាស់មនុស្សប្រុសស្រីចំនួន ៥ នាក់ បានរងរបួសធ្ងន់ស្រាលក្នុងឧបទ្ទវហេតុរអិលធ្លាក់គោយន្តស្ថិតនៅសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ កាលពីវេលាម៉ោង ៤ ល្ងាចថ្ងៃទី ២៩ ខែតុលា។

មន្ត្រីនគរបាលចរាចរណ៍ផ្លូវគោកក្រុងសិរីសោភ័ណបានប្រាប់អ្នកយកព័ត៌មានឲ្យដឹងថាថ្ងៃទី២៩ ខែតុលា ឆ្នាំ២០២២ នេះមាន គោយន្តកន្រៃ្តមួយគ្រឿងដឹកមនុស្សចុះពីលើវត្តភ្នំកងវ៉ា សង្កាត់កំពង់ស្វាយ ដែលមានផ្លូវចំណោត ហើយពេលនោះគោយន្តដាក់លេខមិនចូលក៏បណ្តាលឲ្យគោយន្តរអិលចុះយ៉ាងលឿនទៅបុកនឹងម៉ូតូរុឺម៉កដែលកំពុងឈប់ចាំប្រពន្ធចុះពីលើវត្ត ហើយក៏ជ្រុលធ្លាក់ទៅក្នុងស្រះទឹកធ្វើឲ្យមនុស្សនៅលើគោយន្តធ្លាក់ចេញពីគោយន្តដេករដូករណែលពេញផ្លូវ។

ក្រោយពីកើតហេតុហើយ អ្នករបួសត្រូវបាននគរបាលចរាចរណ៍ដឹកទៅមន្ទីរពេទ្យបង្អែកក្រុងសិរីសោភ័ណ ក្នុងនោះដោយមានមនុស្សម្នាក់របួសធ្ងន់ពេកនគរបាលចរាចរណ៍ដឹកបន្តយកទៅសង្គ្រោះបន្ទាន់នៅ មន្ទីរពេទ្យខេត្តមិត្តភាពកម្ពុជា ជប៉ុនមង្គលបូរី អ្នករបួសទាំង៥នាក់នេះមិនបានស្គាល់អត្តសញ្ញាណមិនស្គាល់ទេ ក្នុងនោះពុំមានអ្នកស្លាប់ឡើយ៕

អត្ថបទ៖ វ៉ាន់ ណាង