ស្នងការរាជធានីភ្នំពេញ​ ត្រៀមកម្លាំងជាង ៧០០នាក់ ដើម្បីការពារសន្តិសុខសណ្ដាប់​ធ្នាប់ សម្រាប់ការប្រឡងបាក់ឌុប

សម្រាប់ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម័យប្រឡង៖ ៥ ធ្នូ ២០២២ គឺស្នងការដ្ឋាននគរបាលរាជធានីភ្នំពេញ បានត្រៀមកម្លាំងនគរបាលចម្រុះជាង ៧០០នាក់ ដើម្បីការពារសន្តិសុខ និងសណ្ដាប់ធ្នាប់ ជុំវិញមណ្ឌលប្រឡងទាំង ៣០ នៅរាជធានីភ្នំពេញ។

លោកវរសេនីយ៍ឯក សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ មានប្រ​សាសន៍ប្រាប់កម្ពុជាថ្មី នៅយប់ថ្ងៃទី ២ ខែធ្នូនេះថា កម្លាំងនគរបាលរាជធានីភ្នំពេញជាង ៧០០នាក់ នឹងត្រូវដាក់ពង្រាយ នៅជុំវិញមណ្ឌលប្រឡងនាថ្ងៃច័ន្ទ និថ្ងៃអង្គារខាងមុខ ដើម្បីការពារសន្តិសុខ និងសណ្ដាប់ធ្នាប់ សម្រាប់ការប្រឡងបាក់ឌុបរយៈពេល ២ថ្ងៃ។

លោកវរសេនីយ៍ឯក សាន សុខសីហា បានឲ្យដឹងយ៉ាងដូច្នេះថា «ទាក់ទងនឹងផែនការ ការពារនៅថ្ងៃប្រឡងបាក់ឌុបហ្នឹង ថ្ងៃទី ៥ និងទី ៦ ខែធ្នូ ឆ្នាំ ២០២២ គឺការដ្ឋាននគរបាលរាជធានីភ្នំពេញ នឹងប្រើប្រាស់កម្លាំងចម្រុះសរុបជាង ៧០០នាក់ ដើម្បីការពារសន្តិសុខ និងរៀបចំសណ្ដាប់ធ្នាប់នៅមណ្ឌលប្រឡងចំនួន ៣០ និងមណ្ឌលកំណែចំនួន ១០ នៅទូទាំងរាជធានីភ្នំពេញ»។

សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ៥ ធ្នូ ២០២២ នឹងប្រព្រឹត្តទៅរយៈពេល ២ថ្ងៃ គឺនៅថ្ងៃទី ៥ និងថ្ងៃទី ៦ ខែធ្នូ ឆ្នាំ ២០២២។

រដ្ឋបាលរាជធានីភ្នំពេញ នៅថ្ងៃទី ២ ខែធ្នូនេះ ក៏បានចេញសេចក្ដីជូនដំណឹងថា ដើម្បីចូលរួមចំណែកឲ្យការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ៥ ធ្នូ ២០២២ ប្រព្រឹត្តទៅដោយរលូន និងជោគជ័យ ជាពិសេសរក្សាបាននូវសន្តិសុខ សុវត្ថិភាព សណ្តាប់ធ្នាប់ តម្លាភាព និងរបៀបរៀបរយ សាធារណៈ នៅជុំវិញមណ្ឌលប្រឡងទាំង ៣០មណ្ឌល នៅក្នុងរាជធានីភ្នំពេញ រដ្ឋបាលរាជធានីភ្នំពេញ បានណែនាំដល់អាជីវករ ដែលប្រកបអាជីវកម្មជុំវិញបរិវេណមណ្ឌលប្រឡង ៣ចំណុច ដូចជា៖

១- ផ្អាកជាបណ្ដោះអាសន្នចំពោះទីតាំងអាជីវកម្មថតចម្លងឯកសារ អ៊ិនធឺណិត និងអាជីវកម្មលក់ សម្ភារៈសិក្សាគ្រប់ប្រភេទ ចាប់ពីថ្ងៃទី ៤ ដល់ថ្ងៃទី ៦ ខែធ្នូ ឆ្នាំ ២០២២។

២- ផ្អាកជាបណ្ដោះអាសន្ននូវអាជីវកម្មនានា ដូចជា៖ ភោជនីយដ្ឋាន អាហារដ្ឋាន….ដែលស្ថិតនៅកៀក បរិវេណមណ្ឌលប្រឡង ចាប់ពីថ្ងៃទី ៤ ដល់ថ្ងៃទី ៦ ខែធ្នូ ឆ្នាំ ២០២២។

៣- ចំពោះទីតាំងអាជីវកម្ម ដែលមិនស្ថិតនៅកៀកបរិវេណមណ្ឌលប្រឡង ហាមបង្កសំឡេងរំខានដែលធ្វើឲ្យប៉ះពាល់ដល់ដំណើរការ នៃការប្រឡងរបស់បេក្ខជន៕

អត្ថបទ៖ ឃួន សុភ័ក្រ